شىعىس قازاقستان وبلىسىندا قاتتى داۋىل سالدارىنان 35 نىساننىڭ شاتىرى قيرادى. ولاردىڭ قاتارىندا تۇرعىن ۇيلەر, شارۋاشىلىق قۇرىلىستار, دەنساۋلىق ساقتاۋ, ءبىلىم جانە مادەنيەت نىساندارى بار.
دۇلەي جەل ۇلان, جارما جانە گلۋبوكوۆسكي اۋداندارى مەن وسكەمەن قالاسىندا سوقتى. قالالىق اۋرۋحانا كومەگىنە 5 زارداپ شەگۋشى جۇگىندى. دارىگەرلەردىڭ قاراۋىنان كەيىن ەكەۋى ۇيلەرىنە قايتارىلدى, دەپ حابارلادى وبلىستىق تج دەپارتامەنتى.
«112» جانە «101» جەلىلەرىنە وسكەمەن مەن قالا ماڭىنداعى اۋدانداردان شامامەن 100 قوڭىراۋ شالىندى. قازىرگى ۋاقىتتا اۋداندىق جانە قالالىق تج قىزمەتكەرلەرى شالىنعان ءار قوڭىراۋعا جاۋاپ بەرىپ, وقيعا ورنىنا بارۋدا.
تج دەپارتامەنتى قۇتقارۋ قىزمەتتەرىنىڭ الدىن الا, جەكسەنبى كۇنى تۇستەن كەيىن «قازگيدرومەت» اقپاراتىنىڭ نەگىزىندە ءموبيلدى بايلانىستار جانە ۆەدومستۆونىڭ رەسمي سايتى ارقىلى تۇرعىنداردى 17 شىلدە كۇنگى اۋا رايى بولجامىمەن, جەل ەكپىنى سەكۋندىنا 20 مەترگە دەيىن جەتەتىنىن حاباردار ەتكەندىگىن ايتۋدا.