بۇگىن ۇكىمەت وتىرىسىندا قر پرەمەر-ءمينيسترى باقىتجان ساعىنتاەۆ ەلىمىزدىڭ وسى جىلدىڭ 6 ايىنداعى جالپى ىشكى ءونىمى ءوسىمىن وڭ باعالادى, دەپ حابارلايدى قازاقپارات.
«ستاتيستيكالىق مالىمەتتەر كورسەتكىشى جامان ەمەس. بۇل ورتاق جۇمىسىمىز, ەلباسىنىڭ تاپسىرماسىن ورتالىق وڭىرلەردەگى جەرگىلىكتى اتقارۋشى ورگاندار بىرلەسىپ اتقاردىق. ءوسىم جوعارىدا اتاپ وتىلگەندەي 4,2 پايىز بولدى. دەگەنمەن, نەگىزگى جۇمىستاردى ەكىنشى جارتىجىلدىقتا اتقارۋعا تۋرا كەلەدى. ءبىز ءدال وسى قارقىندى ۇستاپ تۇرۋعا ءتيىسپىز. سوندىقتان بوساڭسۋعا بولمايدى», دەدى باقىتجان ساعىنتاەۆ.
سونداي-اق, ول الداعى ۋاقىتتا مەملەكەت باسشىسىنىڭ تاپسىرمالارىن ورىنداۋ ءۇشىن ورتالىق جانە جەرگىلىكتى اتقارۋشى ورگاندار ءتيىستى شارالار قابىلداۋى قاجەت ەكەندىگىن باسا ايتتى.
«سونىمەن قاتار, بيۋدجەت قارجىسىنىڭ شىعىس بولىگىنىڭ ورىندالۋىنا مونيتورينگ جۇرگىزۋ قاجەت. ارتتا قالىپ جاتقان جايتتاردى دا كورىپ وتىرمىز. ءالى دە جارتى جىل ۋاقىت بار», دەدى ۇكىمەت باسشىسى.