پىشاقپەن كەسە بەرگەنىم سول ەدى, قاقتالعان شۇجىقتىڭ اراسىنان تەمىردىڭ بولشەگى جارعاق قۇلاق سەكىلدى سالبىراپ شىعا كەلمەسى بار ما؟ «بۇگىن مەنى پەرىشتەم قاقتى. ەرتەڭ وسىنداي جايتقا وزگەلەر كەزىكسە شە؟» دەپ ىشتەي قاپالانىپ, جۋرناليستىك تاۋەكەلگە بەل بۋدىم. ناسىرعا شاپقان كەلەڭسىز ءىستى اياعىنا دەيىن جەتكىزۋدى ءجون كوردىم. الدىمەن وبلىستىق دەنساۋلىق ساقتاۋ باسقارماسىنا حابارلاستىم. ونداعىلار ارنارسەنى سىلتاۋراتىپ, اقىرى باسشىلاردىڭ رۇقساتىنسىز اقپارات بەرە المايتىندارىن كولدەنەڭ تارتتى. ءبىر كەزدە باسقارما جەتەكشىسىنىڭ ورىنباسارى تاتيانا گورلوۆاعا قولىمىز جەتتى-اۋ! ول شاعىم يەسىن قولداۋدىڭ ورنىنا «بۇدان تۇك ونبەيدى. ويتكەنى, شەتەلدىك ءوندىرۋشى كومپانيالارعا شارا قولدانا المايمىز. ال ساتۋشىنىڭ كىناسى جوق», دەپ ءۇمىتىمىزدى شورت ءۇزدى.
«جازعان قۇلدا شارشاۋ جوقتىڭ» كەرىمەن تاۋاردى زەرتحانادا تەكسەرىپ الۋدى ۇيعاردىم. «كەز كەلگەن تاۋار وندىرۋشىگە ازىق-ت ۇلىك قاۋىپسىزدىگىن قامتاماسىز ەتۋدىڭ شارت-تالاپتارىن قويا بىلمەسەك, بولاشاق ۇرپاق دەنساۋلىعى نە بولماق؟» دەگەن ويمەن حاتتامانى قولتىعىمىزعا قىستىرىپ, ەمەن ەسىكتى ەركىن اتتاپ كىردىم. «قىرسىق قىرىق اعايىندى» دەگەن راس ەكەن. زەرتحاناداعىلار تاۋاردىڭ سىرتىنداعى تاڭبالاۋ قاعازىن /ماركيروۆكا/ تالاپ ەتتى. «بولماعان, جوق دۇنيەنى قايدان تابامىن؟» دەپ قانشا بەزەك قاقسام دا, ماڭايلارىنا جۋىتاتىن ءتۇرى كورىنبەدى. ادىلدىكتىڭ تۇبىنە جەتەم بە دەگەن ويىم كوزدەن بۇل-بۇل ۇشىپ, ورەكپىگەن كوڭىلىم سۋ سەپكەندەي باسىلىپ قالدى.
«داۋدى شەشەن بىتىرمەيدى, شەبەر بىتىرەدى» دەمەكشى, قوعامدىق ۇيىمنىڭ قىزمەتىنە جۇگىنۋدەن باسقا امال قالمادى. وبلىستىق كاسىپكەرلەر مەن تۇتىنۋشىلاردىڭ قۇقىعىن قورعاۋ قاۋىمداستىعىنىڭ ءتورايىمى نادەجدا دۋبوۆاياعا ءمان-جايدى ءتۇسىندىرىپ ەدىم, بىردەن ىسكە كىرىستى. «مۇنداي جاۋاپسىزدىققا استە جول بەرۋگە بولمايدى. جازاسىن تارتتىرۋ كەرەك. قاجەت بولسا, سوتقا دەيىن دابىل قاعامىز» دەپ, كوڭىلىمدى كوتەرىپ تاستادى. ۇزىن ءسوزدىڭ قىسقاسى, 30 جىلعا جۋىق تۇرعىنداردىڭ تۇيتكىلدى ماسەلەلەرىن شەشىپ بەرۋدە ىلكىمدىلىك كورسەتىپ جۇرگەن نادەجدا ۆلاديميروۆنا ءوندىرۋشى كومپانيادان 50 مىڭ تەڭگە مورالدىق شىعىندى زاماتتا ءوندىرىپ بەرگىزدى.
ال مەنىڭ باسىمنان وتكەن سەرگەلدەڭگە, بولماسا وسىعان ۇقساس جايتتارعا زاڭعا شورقاق, قاراپايىم ادامدار تاپ بولسا, شۇجىق ورنىنا تەمىر شايناپ وتىرا بەرمەك پە؟
گۇلگۇل قۋاتقىزى, جۋرناليست
سولتۇستىك قازاقستان وبلىسى