بيىلعى فينالعا وسى جوبانىڭ ەكى دۇركىن چەمپيوندارى – قازاقستاندىق «استانا ارلاندارى» (2013, 2015) مەن كۋبالىق «كۋبا قابىلاندارى» (2014, 2016) شىققان بولاتىن. فينالدىق ايقاستا ەكى كوماندا جانكۇيەرلەرگە ناعىز بوكس كەشىن سىيلادى. كۋبالىق تاجىريبەلى بىلعارى قولعاپ شەبەرلەرىنە لايىقتى قارسىلىق كورسەتىپ, تاباندىلىق تانىتقان «ارلاندارىمىز» جوبانىڭ ءۇش دۇركىن چەمپيونى اتاندى.
كەشتىڭ شىمىلدىعىن 49 كيلو سالماقتاعى تەمىرتاس ءجۇسىپوۆ پەن يوحانۋس ارگيلاگوس اشىپ بەردى. كەزدەسۋ باستالا سالا قازاقستاندىق بوكسشى قارسىلاسىن بەت قاراتقان جوق. ءجۇسىپوۆ قارسىلاسىنان جاس جاعىنان دا, تاجىريبە جاعىنان دا باسىم ەكەنىن انىق بايقاتتى. ال ەكىنشى جەكپە-جەككە شىققان ءىلياس سۇلەيمەنوۆ قازاق جانكۇيەرلەرىنە ەسىمى اسا تانىمال ەمەس كۋبالىق بوكسشى حاۆەر يبانەستەن باسىم ءتۇستى. ءبىرىنشى راۋندتى ءبىر-بىرىمەن اڭدىسىپ وتكىزگەن بوكسشىلار, ەكىنشى راۋندتان باستاپ شيراق قيمىلداي باستادى. ءۇشىنشى راۋندتا كۋبالىق بوكسشى باسىمدىلىققا يە بولعانداي كورىنگەن. الايدا, ءىلياس قارسىلاسىنا مۇرشا بەرگەن جوق. ەسەپ 3:0.
ءۇشىنشى كەزدەسۋ «ارلاندار» ءۇشىن ءساتسىز باستالدى. 91 كيلوداعى انتون پينچۋك كۋبالىق ەريسلاندي ساۆونعا ەسە جىبەرسە, انتوننىڭ ءىزىن الا 64 كيلو سالماقتاعى وسى جوبانىڭ دەبيۋتانتى ءدىلمۇرات ءميجيتوۆتى وتە تاجىريبەلى قارسىلاسى ەندي كرۋز ءسال عانا باسىمدىقپەن (1:2) ۇتىپ كەتتى. ال العاشقى بەستىكتىڭ سوڭعى كەزدەسۋىندە 75 كيلوداعى تاعى ءبىر تالانتتى بوكسشىمىز امانقۇل ءابىلحان ريو وليمپياداسىنىڭ چەمپيونى ارلەن لوپەسپەن تەڭ دارەجەدە جۇدىرىقتاسقان ەدى. بىراق تورەشىلەر جەڭىستى ءبىراۋىزدان (0:3) كۋبالىق بوكسشىعا بەردى. ءسويتىپ, العاشقى بەس كەزدەسۋدىڭ قورىتىندىسى بويىنشا ەسەپ – 2:3, «قابىلاندار» العا شىقتى.
ەكىنشى بەستىك كەزدەسۋى دە «ارلاندار» ءۇشىن جەڭىلىسپەن باستالدى. ارمان رىسبەك (81 كگ) ريو وليمپياداسىنىڭ چەمپيونى حۋليو سەزار لا كرۋزبەن جۇدىرىقتاسىپ, 0:3 ەسەبىمەن جەڭىلىسكە ۇشىرادى. ارماننىڭ جەڭىلىسى ساتسىزدىك ەمەس. كەزدەسۋگە دەيىن-اق بوكس ماماندارى دا, جانكۇيەرلەر دە لا كرۋزدى فاۆوريت رەتىندە ساناعان ەدى. ارماننان كەيىن شارشى الاڭعا كوماندا كاپيتانى ولجاس ساتتىباەۆ پەن يوسباني ۆەيتيا شىقتى. جەكپە-جەكتىڭ ءبىرىنشى راۋندى كۋبالىق بوكسشىنىڭ باسىمدىعىمەن ءوتتى. كەزدەسۋدىڭ قالعان بولىگىندە ولجاس قارسىلاسى ۆەيتيانى بىلگەنىنەن جاڭىلدىرۋعا تىرىسقان. ايتسە دە, كۋبالىق بوكسشى ساتتىباەۆتىڭ ويلاعانىن جۇزەگە اسىرۋعا مۇمكىندىك قالدىرعان جوق. جالپى ەسەپ – 2:5.
فينالدىق كەزدەسۋدىڭ ەڭ تارتىستى جەكپە-جەگى +91 كيلودان جوعارى سالماقتا ءوتتى. وسى كەزدەسۋدە ولجاس بوقاەۆ جەڭىسكە جەتسە, «ارلاندارعا» ءۇمىت وتى قايتا جانار ەدى. ال يواندي تويراك جەڭىسكە جەتسە, كۋبالىقتار مەرزىمىنەن بۇرىن جوبانىڭ چەمپيونى اتانادى. جەكپە-جەك باستالا سالا «قازاقستان» سپورت كەشەنىنە جينالعان جانكۇيەرلەر قيقۋعا سالىپ, ولجاستىڭ نامىسىن جاني ءتۇستى. بوقاەۆتىڭ ءوزى دە وسى كەزدەسۋدە جەڭىسكە جەتپەسە, ارىپتەستەرىنىڭ جەڭىسى اۋا قۇشاتىنىن سەزىپ, ءار راۋند سايىن شيراق قيمىلداپ, وزىنەن 15 كيلو اۋىر قارسىلاسىن جەڭۋگە بارىن سالدى. ء سويتىپ, ولجاس بوقاەۆ تاجىريبەلى كۋبالىق بوكسشى يواندي تويراكتى تاس-تالقان ەتىپ ۇتىپ, كومانداسىنىڭ جەڭىسكە دەگەن ءۇمىت وتىن قايتا جاقتى. ولجاستان كەيىن شارشى الاڭعا شىققان زاكىر سافيۋللين (60 كگ) مەن اسلانبەك شىمبەرگەنوۆ (69 كگ) وليمپيادا چەمپيونى (لازارو الۆارەس) مەن جۇلدەگەرىنە (يگلەسياس سوتولونگو) ەش مۇمكىندىك بەرگەن جوق. فينالدىڭ نەگىزگى ون جەكپە-جەگىنەن كەيىن ناتيجە تەڭەسىپ, 5:5 ەسەبىمەن اياقتالدى.
نەگىزگى ەسەپ تەڭ اياقتالىپ, تارازى باسى تەڭ تۇسكەن سوڭ جەڭىمپاز كلۋبتى انىقتاۋ ءۇشىن 52 كيلو سالماقتا قوسىمشا كەزدەسۋ ءوتتى. «ارلاندار» ساپىنان سىنعا تۇسكەن 2014 جىلعى اسكەريلەر اراسىنداعى الەم چەمپيونى ولجاس باينيازوۆ كۋبالىق قارسىلاسى فرانك زالديۆاردى قاپى قالدىرىپ, كومانداسىنا وتە قيىن وتكەن كەزدەسۋدە جەڭىس سىيلادى. وسىلايشا, «استانا ارلاندارى» دۇنيەجۇزىلىك بوكس سەرياسىنىڭ (WSB) جەتىنشى ماۋسىمداعى جەڭىمپازى بولىپ عانا قويماي, جوبانىڭ ءۇش دۇركىن چەمپيونى اتاندى.
بيىلعى فينالدا چەمپيون اتانۋ ءۇشىن «كۋبا قابىلاندارى» ءوز ەلىنىڭ ءبىرىنشى ءنومىرلى بوكسشى سانالعان يگلەسياس سوتولونگو (69 كگ), ارلەن لوپەس (75 كگ) پەن حۋليو سەسار لا كرۋس (81 كگ) سەكىلدى وليمپيادا چەمپيوندارىن الىپ كەلگەنىن ايتا كەتكەن ءجون. ولارعا قارسى شىققان ەلىمىزدىڭ ەكىنشى ءنومىرلى بوكسشىلارى كۋبالىقتاردىڭ اتاق-داڭقتارىنان ەش قايمىققان جوق. بۇرىن قازاق بوكسشىلارى كۋبالىق بىلعارى قولعاپ شەبەرلەرىمەن سەسكەنىپ, جاسقانىپ جۇدىرىقتاساتىن. ال قازىر ءبارى كەرىسىنشە. كۋبالىقتار قازاق بوكسشىلارىمەن ساناسىپ, يمەنە جۇدىرىقتاساتىن بولدى. بۇل دەگەنىمىز كۋبا بوكسىنىڭ السىرەپ كەتكەنى ەمەس, قازاق بوكسشىلارىنىڭ بوستاندىق ارالىنىڭ بوكسشىلارىنان دەڭگەيى جاعىنان اسىپ تۇسكەنىن اڭعارتادى.
ءالي بيتورە, «ەگەمەن قازاقستان»