بىرەۋلەر قولداسا, ەندى ءبىرى تۇبەگەيلى قارسىلىق تانىتۋدا. ەلوردالىق اكىمدىك قالادا اقىلى تۇراقتار قانشالىقتى كەرەك دەگەن ساۋالعا مونيتورينگ جۇرگىزدى. رەسمي مالىمەتتەر بويىنشا, استانادا قازىرگى كۇنگە 350 مىڭ كولىك تىركەلگەن. جىل سايىن بۇل كورسەتكىش 6-8%-عا وسەدى. ارينە, بۇل جولداردا كولىك قوزعالىسىنا قيىندىقتار تۋدىرادى.
PriceWaterHouseCoopers حالىقارالىق كەڭەسشىلەرى تۇركىستان, دوستىق, ورىنبور كوشەلەرى مەن نۇرجول بۋلۆارى بويىنشا ورنالاسقان پاركينگتەر مەن تۇرعىن ءۇي كەشەندەرىنىڭ ماڭىنداعى اۋماقتاردا كولىكتەردىڭ قويىلۋىنا ساراپتاما جاساعان. مونيتورينگ بۇگىنگى كۇنى اقىلى تۇراقتار ەنگىزۋدىڭ ءبىرىنشى كەزەڭى ءوتىپ جاتقان نۇرجول بۋلۆارى اۋماعىندا ساعات 7:00-دەن 2:00-گە دەيىن جۇرگىزىلدى. كوشە-جول جەلىلەرىن زەرتتەۋدىڭ ناتيجەسىندە, بۇل اۋماقتا كۇنى بويى ورتا ەسەپپەن 600 كولىك تۇراقتايتىنى بەلگىلى بولدى, ونىڭ 238-ءى تۇراق ەرەجەسىن بۇزادى. ءار ەكىنشى جۇرگىزۋشى ءوز كولىگىن رۇقسات ەتىلمەگەن جەرگە قويعان. حالىقارالىق زەرتتەۋلەر بويىنشا, الەمنىڭ دامىعان ءىرى قالالارىنىڭ ەشقايسىسىندا استاناداعىداي تۇراق ەرەجەسىن بۇزبايدى ەكەن. كوپتەگەن ەلدەردە قوماقتى ايىپپۇل سالىنادى جانە زاڭدى بۇزعان جۇرگىزۋشىنىڭ كولىگىن تيەپ اكەتۋ جۇيەسى ەنگىزىلگەن.
جازاعا تارتۋ جۇرگىزۋشىلەردى تارتىپكە كەلتىرىپ, جاياۋ جۇرگىنشىلەر ءۇشىن جايلىلىق دەڭگەيى جوعارىلايدى جانە وزگە دە قولدانۋشىلار ءۇشىن قولجەتىمدى تۇراق ورىندارى پايدا بولادى. سونىمەن قاتار, زەرتتەۋدىڭ قورىتىندىسى بويىنشا بەلگىلى بولعانداي, تەمىر تۇلپار يەلەرىنىڭ 80%-ى كولىكتەرىن نۇرجول ساياجولىنا قالدىرىپ, 8-9 ساعاتقا جۇمىستارىنا جايبراقات كەتە بارادى ەكەن. ءبىر سوزبەن ايتقاندا, 380 كولىك كۇنى بويى كوشە تۇراعىندا ورىن الىپ, بوسقا تۇرادى. وزگەلەر بۇل اۋداندا 1-2 ساعات بويى بوس ورىن تاپپاي سابىلىپ جۇرگەندە, بىرەۋلەر جەكە گاراجى رەتىندە كوشە تۇراعىن پايدالانادى.
الەۋمەتتىك ساۋالناما كورسەتكەندەي, سۇرالعانداردىڭ 50%-ى كولىك قوياتىن بوس ورىن بولمايتىندىقتان ءوز كەزدەسۋلەرىن كەيىنگە قالدىرادى نەمەسە باس تارتاتىن كورىنەدى.
ەستەرىڭىزگە سالامىز, كولىكتەر كوپ جۇرەتىن ورىنداردا اقىلى تۇراقتار قۇرۋ كەپتەلىستەردىڭ الدىن الۋ جانە جول قوزعالىسى ەرەجەسىن بۇزۋ سانىنىڭ ازايۋىنا سەپتىگىن تيگىزەتىن الەمدىك تاجىريبەدەگى ءتيىمدى شارالاردىڭ ءبىرى بولىپ سانالادى. ەلوردادا «استانا قالاسىنىڭ تۇراق كەڭىستىگىن باسقارۋ» جوباسىنىڭ ءبىرىنشى كەزەڭى 19 ماۋسىم نۇرجول ساياجولىندا سىناق رەتىندە جۇزەگە اسىرىلا باستاعان بولاتىن. ازىرگە اقى الىنبايدى. كەلەشەكتە اقىلى تۇراق قۇنى ساعاتىنا 100 تەڭگە بولادى.