بۇگىن ۇكىمەت ۇيىندە قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ «تسيفرلىق قازاقستان» باعدارلاماسىنىڭ جوباسى اياسىندا مەملەكەتتىك ورگانداردىڭ قىزمەتىن تسيفرلاندىرۋ ماسەلەلەرى جونىندە كەڭەس وتكىزدى. بۇل تۋرالى primeminister.kz حابارلادى.
كەڭەس بارىسىندا ينتەللەكتۋالدى كولىك جۇيەسىن قۇرۋ, گەولوگيالىق بارلاۋدىڭ ينتەراكتيۆتى ۇلتتىق دەرەكتەر بازاسىن ەنگىزۋ, تۇرعىن ءۇي الۋعا كەزەكتە تۇرعانداردىڭ ەلەكتروندى دەرەكتەر بازاسىن قۇرۋ, ۆيرتۋالدى مۋزەيلەر جەلىسىن جۇرگىزۋ جانە كىتاپحانا قورىن تسيفرلاندىرۋ, سونىمەن قاتار زاڭناما جۇيەسىن تسيفرلاندىرۋ, سونىڭ ىشىندە سوت ساراپتاماسىن اۆتوماتتاندىرۋ ماسەلەلەرى تالقىلاندى.
مەملەكەتتىك ورگانداردىڭ تسيفرلىق فورماتقا اۋىسۋ تاسىلدەرى تۋرالى قر ينۆەستيتسيالار جانە دامۋ ءمينيسترى ج. قاسىمبەك, قر مادەنيەت جانە سپورت ءمينيسترى ا. مۇحامەدي ۇلى, قر قورعانىس جانە اەروعارىش ونەركاسىبى ءمينيسترى ب. اتامقۇلوۆ جانە قر ادىلەت ءمينيسترى م. بەكەتاەۆ باياندادى.
پرەمەر-مينيستر باقىتجان ساعىنتاەۆ كەڭەس قورىتىندىسى بويىنشا بىرقاتار ناقتى تاپسىرمالار بەردى.