«باۆاريا» حامەس رودريگەستى جالعا الدى
باۆاريا كولۋمبيا ۇلتتىق قۇراماسى مەن مادريدتىك «رەالدىڭ» جارتىلاي قورعاۋشىسى حامەس رودريگەستى كەيىنگى ساتىپ الۋ قۇقىمەن 2 جىلعا جالعا الدى. ول ميۋنحەندە مەديتسينالىق تەكسەرۋدەن وتكەننەن كەيىن نەمىس فۋتبول كلۋبىمەن كەلىسىمگە قول قويادى.
2014 جىلعى الەم چەمپيوناتىندا التى گول سوعىپ, ۇزدىك بومباردير اتانعان كولۋمبيالىقتى «كورولدىك كلۋب» ساتىپ العان بولاتىن. سوڭعى ءۇش جىلدا «رەال» ساپىندا ەكى رەت چەمپيوندار ليگاسىندا جەڭىمپاز اتاندى. يسپانيا چەمپيوناتى مەن فۋتبول كلۋبتارى اراسىنداعى الەم چەمپيوناتىندا جەڭىسكە جەتتى. جالپى, حامەس رودريگەس «رەال» ساپىندا 111 ماتچ وتكىزىپ, 36 گول سوقتى, 41 ناتيجەلى پاستىڭ اۆتورى اتاندى.
پەپە تۇركياعا اۋىستى
ىستامبۇلدىڭ «بەشيكتاش» فۋتبول كومانداسى پورتۋگاليا قۇراماسىنىڭ قورعاۋشىسى پەپەمەن (كە́پلەر لاۆەرا́ن لي́ما فەررە́يرا) كەلىسىمگە كەلگەنىن ءمالىم ەتتى.
4 شىلدە كۇنى ىستامبۇلعا ۇشىپ كەلگەن فۋتبولشىنى ءبىر توپ جانكۇيەرلەر كۇتىپ الدى.
كەلىسىمنىڭ مەرزىمى مەن پورتۋگاليالىقتىڭ تابىسى جونىندە ازىرگە ايتىلعان جوق. بۇدان بۇرىن, فۋتبولشىنىڭ تۇركيالىق كلۋبتان ەكى جىل ءۇشىن 10 ملن ەۋرو سۇراعانى تۋرالى اقپارات تاراعان بولاتىن.
ايتا كەتەيىك, ءمادريدتىڭ «رەالىمەن» پورتۋگاليالىق قورعاۋشى اراسىنداعى كەلىسىم مەرزىمى 2016/17 ماۋسىمنان كەيىن اياقتالدى. وسىلايشا, فۋتبولشى تۇرىكتەرگە تەگىن كەلدى.
ۋەين رۋني «ەۆەرتونعا» ورالدى
ليۆەرپۋلدىڭ «ەۆەرتون» فۋتبول كلۋبى 31 جاستاعى «مانچەستەر يۋنايتەد» شابۋىلشىسى ۋەين رۋنيمەن كەلىسىم جاساسقانىن ءمالىم ەتتى.
فۋتبولشى مەن كلۋب اراسىنداعى كەلىسىم 2 جىلعا بەلگىلەنگەن.
رۋني «ەۆەرتوننىڭ» جاستار كومانداسىندا 1995-تەن 2002 جىلعا دەيىن وينادى. 2002-2004 جىلدار اراسىندا نەگىزگى قۇرامدا ونەر كورسەتتى. سودان قازىرگى ۋاقىتقا دەيىن «مانچەستەر يۋنايتەدتىڭ» نامىسىن قورعادى.
وتكەن ماۋسىمدا رۋني ميۋ ساپىندا 39 ماتچ وتكىزىپ, 8 گول سوقتى, 10 ناتيجەلى پاس شىعارىپ بەردى. ونىڭ ترانسفەرلىك قۇنى شامامەن 15 ملن ەۋروعا باعالانىپ وتىر.
داني الۆەس فرانتسۋزدىڭ پسج كومانداسىنا اۋىستى
برازيليا قۇراماسىنىڭ قورعاۋشىسى داني الۆەس جاقىندا يتاليانىڭ «يۋۆەنتۋسىمەن» كەلىسىمىن ۇزگەن بولاتىن. بۇرىنعى باپكەرى حوسەپ گۆارديولانىڭ شاقىرۋىمەن «مانچەستەر سيتيگە» وتەدى دەگەن سىبىس تاراعانىمەن, فۋتبولشى ءپاريجدىڭ پسج كومانداسىن تاڭدادى.
«مانچەستەر سيتي» 34 جاستاعى فۋتبولشىعا ەكى جىلعا كەلىسىم-شارت ۇسىنعان بولاتىن. الايدا, پسج وعان اپتاسىنا 260 مىڭ ەۋرو جالاقى تولەۋگە ۋادە بەردى. ناتيجەسىندە برازيليالىق پسج مەن 2 جىلعا كەلىسىمگە وتىردى.
«يۋۆەنتۋس» دۋگلاس كوستانى جالعا الدى
ءتۋريننىڭ «يۋۆەنتۋسى» برازيليا قۇراماسى مەن ميۋنحەندىك «باۆاريانىڭ» فۋتبولشىسى دۋگلاس كوستانى كەيىنگى ساتىپ الۋ قۇقىمەن 1 جىلعا جالعا الدى.
جالداۋ مەرزىمى اياقتالعان سوڭ, يتاليالىقتار فۋتبولشىنى 40 ملن ەۋروعا ساتىپ الا الادى.
دۋگلاس كوستا 2015 جىلى ۋكراينانىڭ «شاحتيورىنان» «باۆارياعا» اۋىسقان بولاتىن. ەكى ماۋسىمدا ول نەمىستەر ساپسىندا 50 ماتچ وتكىزىپ, 8 گول سوقتى.