جۋىردا تارازدىق تىڭدارماندار ايگىلى ونەرپازبەن جۇزدەسىپ, اندەرىن تىڭدادى. تاراز قالاسىنا ارنايى كەلگەن ول ت.رىسقۇلوۆ اتىنداعى ورتالىق ساياباقتا جۇرتشىلىقپەن جۇزدەسىپ, قوشەمەتكە يە بولدى. «كونە تاراز» تاريحي-مادەني كەشەنىندە بولىپ, اۋليەاتانىڭ بۇگىنگى كەلبەتىمەن تانىستى. الەمدىك ساحنا ساڭلاعى وتكەن شاقتارىنان قىزىقتى ەستەلىكتەر ايتىپ, كوپشىلىككە جاقسى اسەر سىيلادى. نەگىزى روبەرتينو لورەتتي ەلىمىزگە استانا تورىندە ءوتىپ جاتقان ەكسپو-2017 حالىقارالىق مامانداندىرىلعان كورمەسىنىڭ قۇرمەتىنە وراي كەلگەن ەكەن. استانا شاھارىنان سوڭ تاراز قالاسىنا ارنايى كەلۋدى ءجون ساناعان ءانشى قازاقستانعا ءار كەلگەن سايىن ۇلكەن اسەردە بولاتىنىن جەتكىزدى. «مەن قازاقستانعا ءبىرىنشى رەت كەلىپ وتىرعان جوقپىن. وسىدان تۋرا ون جىل بۇرىن دا قازاقستاندىق تىڭدارماندارمەن قاۋىشقانىم ەل ەسىندە شىعار. تاريحي تاراز قالاسىندا دا بولعانمىن. اراعا ون جىل سالىپ قايتا كەلگەنىمدە, تاراز قالاسىنىڭ ايتارلىقتاي ءوسىپ, وركەندەگەنىن بايقادىم. سونداي-اق, استانا قالاسىندا ءوتىپ جاتقان ەكسپو كورمەسى مەنى كەرەمەت اسەرگە بولەدى. استانانىڭ تاڭعاجايىپ قالاعا اينالعانىن كورىپ, تامساندىم», دەدى ونەرپاز. كەزىندە الەم تىڭدارماندارىنا «Jamaica», «O sole mio», «Ave Maria» سەكىلدى اندەرىمەن تانىمال لورەتتي كوڭىل تۇكپىرىندە جۇرگەن كوپشىلىككە بەيمالىم ويلارىمەن دە ءبولىستى. اسىرەسە, كوپشىلىكتى قىزىقتىرعانى, ول ءوزىنىڭ 1960 جىلى العان التىن تاباقشاسىن ەلباسى نۇرسۇلتان نازارباەۆقا سىيعا تارتقىسى كەلەتىن نيەتىنىڭ بار ەكەنىن ايتقانى بولدى. سونداي-اق, ول ءوزىنىڭ انشىلىك ونەرىنە جۋىق ارادا نۇكتە قويادى ەكەن. قازاق ەلىن قۇرمەتتەيتىن ول استانا قالاسىندا وتەتىن شىعارماشىلىق كەشىندە سوڭعى رەت ءان شىرقايتىنىن جەتكىزدى. حاميت ەسامان, «ەگەمەن قازاقستان»
جامبىل وبلىسى