ءاۋ باستا قالادان ءۇي ساتىپ الا قويارلىق جاس وتباسىنىڭ جيناپ قويعان قارجىسى دا بولمادى. 2012 جىلى ولار تۇرعىنۇيقۇرىلىسجيناق بانكىنەن دەپوزيت اشىپ, ماقساتتى تۇردە باسپاناعا اقشا جيناي باستادى. – جۇبايىمىز ەكەۋمىز ايلىق جالاقىمىزدان ارتىلعان اقشانى, دەپوزيتكە جينادىق. بالا-شاعانىڭ تاماعى, كيىمى بار دەگەندەي, اقشا ۇنەمدەۋ وڭاي دا ەمەس. ءبىز الدىمىزعا ماقسات قويدىق. جاڭا پاتەر ءبىزدىڭ ارمانىمىز بولاتىن. ەندى, مىنە, ءوز باسپانامىز بولاتىنىنا سەنە الماي تۇرمىن. ءبىر بولمە بولسا دا, ءىشى كەڭ, بولمەسىنىڭ ءوزى – 42 شارشى مەتر. بىزگە ازىرگە جەتەدى. ەندى دوستارىمىزبەن, تۋىستارىمىزبەن قونىس تويىمىزدى تويلايتىن كۇن دە الىس ەمەس, قازىر ءۇيدى جاساۋعا, جيھاز قاراۋعا كىرىستىك, – دەيدى ع.شولپانباەۆا قۋانىشىن جاسىرا الماي. سول كۇنى 70 وتباسى ءدال وسىنداي جاڭا قونىس قۋانىشىنا كەنەلدى. «نۇرلى جەر» باعدارلاماسى اياسىندا سالىنعان 5 قاباتتى ءۇي قوستاناي قالاسىنىڭ سوۆحوز كوشەسىندە بوي تۇزەگەن بولاتىن. ودان 50 وتباسى ەكى بولمەلى, 10 وتباسى ءۇش بولمەلى, 10 وتباسى ءبىر بولمەلى پاتەردىڭ كىلتىن الدى. ونىڭ سالىنۋىنا 557 ميلليون تەڭگە جۇمسالدى. – بۇگىندە وبلىس ورتالىعىندا 1 692 پاتەرلى 25 ءۇيدىڭ قۇرىلىسى ءجۇرىپ جاتىر. بۇل قۇرىلىستا دا «تۇرعىن- ۇيقۇرىلىسجيناقبانك» اكتسيونەرلىك قوعامى بەلسەندىلىك تانىتادى دەپ بىلەمىز. قونىس تويلارىڭىز قۇتتى بولسىن, ۇيلەرىڭىز بەرەكەگە تولسىن! – دەدى باسپانالى بولعان قالالىقتاردى قۇتتىقتاعان وبلىس اكىمى ارحيمەد مۇحامبەتوۆ. جاڭا ۇيدەن قونىس تەپكەن تۇرعىنداردىڭ بارلىعى دا قالا اكىمدىگىندە باسپانا كەزەگىندە تۇرعاندار مەن «تۇرعىنۇيقۇرىلىسجيناقبانكىنىڭ» سالىمشىلارى ەدى. ولارعا پاتەرىنىڭ ءبىر شارشى مەترى 117,6 مىڭ تەڭگەدەن ءتۇستى. ء«وز ءۇيىم – ولەڭ توسەگىم» دەگەندەي, ءوز باسپاناسىن سارىلا كۇتكەندەر ەلباسى نۇرسۇلتان نازارباەۆتىڭ ەكونوميكالىق-الەۋمەتتىك كەمەل ساياساتىنىڭ ارقاسىندا وسىنداي جەڭىلدىكتەردى دە سەزىندى. قۋانىشقا قۋانىش ۇستەمە بولعانداي.
ءنازيرا جارىمبەتوۆا, «ەگەمەن قازاقستان»
قوستاناي