قازاقستان تاراپىن سىرتقى ىستەر ءمينيسترىنىڭ ورىنباسارى رومان ۆاسيلەنكو, ال بەلگيا تاراپىن بەلگيا ءسىم-ءىنىڭ ەكىجاقتى ىستەر بويىنشا باس ديرەكتورى انيك ۆان كالستەر باسقاردى.
تاراپتار ساياسي, ەكونوميكالىق جانە مادەني-گۋمانيتارلىق ىنتىماقتاستىقتى دامىتۋدىڭ كەلەشەگى, حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
كەزدەسۋ بارىسىندا ر.ۆاسيلەنكو بەلگيالىقتاردى پرەزيدەنتتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنىڭ باسىمدىقتارىمەن, بيلىك تارماقتارى اراسىندا وكىلەتتىكتەردى قايتا ءبولۋ بويىنشا رەفورمالاردىڭ بارىسىمەن, مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىنىڭ نەگىزگى ەرەجەلەرىمەن, سونداي-اق, ەلدىڭ بۇۇ قك-نە تۇراقتى ەمەس مۇشەلىگى كەزەڭىندەگى نەگىزگى باسىمدىقتارىمەن تانىستىردى.
ديپلوماتتار ساۋدا-ەكونوميكالىق قارىم-قاتىناستاردىڭ دامۋىنىڭ وڭ سەرپىنىن اتاپ ءوتتى. وسىلايشا, 2016 جىلدىڭ قورىتىندىسى بويىنشا ەلدەر اراسىنداعى ساۋدا اينالىمى 2015 جىلمەن سالىستىرعاندا 12%-عا ءوسىپ, 299,5 ملن اقش دوللارىن قۇرادى.
تاراپتار قازاقستان مەن بەلگيا سىرتقى ساياسات ۆەدومستۆولارىنىڭ ىنتىماقتاستىعىن جانداندىرۋعا ءوزارا مۇددەلەستىك تانىتتى.
«ەگەمەن-اقپارات»