گۇلميرا يسىمباەۆا جۇمىس ساپارىن «نۇر وتان» پارتياسى الماتى قالالىق فيليالى توراعاسىنىڭ ورىنباسارى جۇلدىز وماربەكوۆامەن, سونداي-اق, قالالىق دەنساۋلىق ساقتاۋ باسقارماسىنىڭ باسشىسى ۆاليحان احمەتوۆپەن بىرگە قالاداعى №11 ەمحانانىڭ ۇجىمىمەن كەزدەسۋدەن باستادى. كەزدەسۋ بارىسىندا ول ەلىمىزدىڭ دەنساۋلىق ساقتاۋ سالاسىندا جۇزەگە اسىرىلىپ جاتقان ەلەۋلى رەفورمالار مەن وڭ وزگەرىستەر جايلى كەڭىنەن ايتتى. سونداي-اق, الەۋمەتتىك مەديتسينالىق ساقتاندىرۋ جۇيەسىنىڭ ماڭىزىنا توقتالىپ, حالىقتىڭ ءال-اۋقاتىن ارتتىرۋ مەن دەنساۋلىعىن ساقتاۋدا اتالعان جۇيەنىڭ ومىرشەڭ ەكەنىن تىلگە تيەك ەتتى.
سونىمەن قاتار, «100 ناقتى قادام» ۇلت جوسپارى مەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قامتىلعان مىندەتتەردى جۇزەگە اسىرۋدىڭ تەتىكتەرى دە اڭگىمە وزەگىنە اينالدى.
ءماجىلىس توراعاسىنىڭ ورىنباسارى قالا ىرگەسىندەگى قىزاناق پەن قيار ونىمدەرىن وسىرەتىن «BRB APK» جىلىجاي كەشەنىنە ارنايى ات باسىن بۇرىپ, اتالعان ءوندىرىس ۇجىمىنىڭ جۇمىسىمەن تانىستى. جاس ماماندارمەن ديدارلاسىپ, «نۇرلى جول», «نۇرلى جەر» سياقتى مەملەكەتتىك باعدارلامالارعا قاتىستى وزەكتى ساۋالدارعا جاۋاپ بەردى جانە اتالعان باعدارلامالاردىڭ مول مۇمكىندىكتەرى مەن جەڭىلدىكتەرى جايلى جان-جاقتى ءسوز قوزعادى.
گ.يسىمباەۆا كەلەسى كەزەكتە الاتاۋ اۋدانىندا ورنالاسقان الماتى يندۋستريالىق ايماعىن ارالاپ, نىسانداردىڭ وندىرىستىك قۋاتىمەن تانىستى. قالانىڭ ناۋرىزباي اۋدانىندا 1200 وقۋشىعا ارنالىپ سالىنىپ جاتقان ءبىلىم وشاعىنىڭ قۇرىلىس جۇمىستارىن ءوز كوزىمەن كورىپ, اتالعان اۋدانداعى №36 ەمحانانىڭ سالتاناتتى اشىلۋ راسىمىنە قاتىستى.
ارمان وكتيابر, «ەگەمەن قازاقستان»
الماتى