جاسىرىن تسەحتى ۇيىمداستىرعان قوستانايلىق ەر ادام ۇستالدى. ونى ىشكى ىستەر مينيسترلىگىنىڭ ۇيىمداسقان قىلمىسپەن كۇرەس جونىندەگى ءبولىمىنىڭ قىزمەتكەرلەرى «بايكال» ماركالى ءتورت تاپانشانى 32 پاترونىمەن ساتايىن دەپ تۇرعاندا قولعا تۇسىرگەن.
ول مىلتىقتاردى جاسىرىن تۇردە سۇرانىم بويىنشا قايتا جاساپ بەرىپ وتىرعان. كۇدىكتىگە ءتىنتۋ جۇرگىزىلگەندە, ونىڭ گاراجى مەن تسەحىنان 2 تاپانشا, 3 تەگىس ۇڭعىلى جانە شاعىن ۇڭعىلى مىلتىقتار, 3 پم تاپانشاسىنىڭ باسەڭدەتكىشى, ءتۇرلى كاليبرگە 2 مىڭنىڭ سىرتىندا پاترون, وق اتاتىن قارۋلداردىڭ قوسالقى بولشەكتەرى, قارۋ جوندەۋگە قاجەتتى جابدىقتار, پاتروندار جاسايتىن زاتتار, 500 گرامم وق ءدارى جانە 8 اڭشى پىشاعى تابىلعان. قازىر سوتقا دەيىنگى تەرگەۋ جانە ساراپتاۋ جۇمىستارى جۇرگىزىلىپ جاتىر.
ءنازيرا جارىمبەتوۆا,
"ەگەمەن قازاقستان"
قوستاناي