بيىل وڭىردە ديقانشىلار گەكتارىنا 22-23 تسەنتنەردەن ءونىم الىپ وتىر. ماسەلەن وڭىردەگى العاشقى ەگىن وراعى باستالعان ءوڭىر ت.رىسقۇلوۆ اۋدانىنداعى «لۋگوۆوي جىلقى زاۋىتى» جاۋاپكەرشىلىگى شەكتەۋلى سەرىكتەستىگى بيىل 11 مىڭ گەكتار القاپقا استىق سەپكەن. ونىڭ 4380 گەكتارى كۇزدىك بيداي جانە 7000 گەكتارى جازدىق ارپا.
بۇگىندە ەگىن جيناۋ ناۋقانىنا 60-قا جۋىق اۋىلشارۋاشىلىق تەحنيكالارى جۇمىلدىرىلعان. ونىڭ ىشىندە 13 «دجون-دير» كومبايندارى ءدان باستىرۋدا. اتالعان «دجون-دير» كومبايندارىنىڭ ارقايسىسى كۇنىنە 70 گەكتاردىڭ استىعىن ورىپ, ءبىر تاۋلىكتە 800 گەكتار استىقتى جيناي الادى. سونىمەن قاتار وڭىردەگى شۋ, قورداي جانە بايزاق اۋداندارىندا دا ەگىن ورۋ ناۋقانى باستالىپ كەتتى. ەندى بيىلعى ەگىن دە ەرەكشە ءونىم بەرۋگە ءتيىس. ماسەلەن جىل سايىن تەحنيكالىق بازا جوسپارلى تۇردە جاڭارتىلىپ وتىرادى. ايتالىق, بىلتىرعى جىلى 2,1 ميلليارد تەڭگەگە 266 بىرلىك جاڭا اۋىل شارۋاشىلىعى تەحنيكالارى ساتىپ الىنعان. ونىڭ ىشىندە 160 بىرلىك تراكتور, 19 كومباين, قالعان 87 بىرلىك ءار ءتۇرلى تەحنيكالار بار. ال, بيىل جىل باسىنان بەرى 815 ميلليون تەڭگەگە 93 تراكتور, 9 كومباين جانە 38 ءارتۇرلى تەحنيكالار الىندى. ۇستىمىزدەگى جىلى اۋىل شارۋاشىلىعى تەحنيكالارىنىڭ جاڭارۋ كورسەتكىشى وتكەن جىلمەن سالىستىرعاندا ارتادى دەپ جوسپارلانۋدا.
اعىمداعى جىلى وبلىس بويىنشا 106,7 مىڭ گەكتار القاپقا كۇزدىك بيداي, 139 مىڭ گەكتارعا جازدىق ارپا, 15 مىڭ گەكتارعا داندىك جۇگەرى, 2,2 مىڭ گەكتارعا جازدىق بيداي, 9 مىڭ گەكتارعا قانت قىزىلشاسى, 87,7 مىڭ گەكتاردان استام مايلى داقىلدار, 36,8 مىڭ گەكتارعا كوكونىس جانە باقشا داقىلدارى سەبىلگەن. سونداي-اق, وتكەن جىلى ەگىس القاپتارىنان جينالعان ءونىمنىڭ ورتاشا كورسەتكىشى 24 تسەنتنەردى قۇراعان بولاتىن. ال ەندى شۋ, قورداي, بايزاق اۋداندارىنداعى ەگىن جيناۋ ناۋقانىنىڭ كورسەتكىشى دە تومەن بولماۋعا ءتيىس.
حاميت ەسامان,
«ەگەمەن قازاقستان»
جامبىل وبلىسى