– شالقار اعا, قازاق كۇرەسى ۋاقىتپەن بىرگە قارقىندى تۇردە قارىشتاپ دامىپ كەلەدى. ءسىز كۇرەسكەن كەز بەن قازىرگى كۇرەستە ايىرماشىلىق بايقالا ما؟
– مەن 2012 جىلى كۇرەستىم عوي. سودان بەرى پالەندەي ءبىر وزگەرىس بولدى دەپ ايتا المايمىن. بۇل سىندا كۇرەسىپ جۇرگەندەر سامبو, دزيۋدو كۇرەسىنىڭ جىگىتتەرى. باسقا سپورتتان «قازاقستان بارىسىنا» قاتىسىپ جاتقان ەشكىم جوق. جۇلدەلى ورىندار دا اينالدىرعان 10 بالۋاننىڭ اراسىندا اينالىپ ءجۇر.
– جۇلدەلەر 10 بالۋاننىڭ اراسىندا جۇرگەنى وزگەلەردىڭ وسالدىعىن بايقاتا ما؟
– بىزدە سول 10 بالۋاننان اسىپ ءتۇسىپ جاتقان ەشكىم جوق قوي. بولسا, كىمدى ايتا الاسىز؟ دەگەنمەن, بەيبىت ىستىباەۆ جىگىتتىك تانىتىپ بيىل جارىسقا قاتىسپاي, باسقا بالۋاندارعا جولىن بەردى. سول سياقتى شىمكەنتتىك جۇمانازار ەرسۇلتانوۆ تا سوڭىنان ەرگەن ىنىلەرىنە جول بەرىپ, ازاماتتىق تانىتتى. وسىلاي-وسىلاي جاستارعا جول اشىلىپ كەلە جاتىر. قالعان مىقتى بالۋاندار بوزكىلەمدە ءالى ءجۇر. ءبىر جاعىنان ولاردىڭ جۇرگەنى دۇرىس. جاستار سول بالۋانداردى جەڭۋگە تىرىسىپ, الدارىنا بيىك ماقسات قويىپ كەلەدى. بىلايشا ايتقاندا جاستارعا سەرپىن بەرەدى.
– ارمان شوراەۆ ءبىر سوزىندە «بولاشاقتا «قازاقستان بارىسىنا» ىرىكتەۋدى رەيتينگ ارقىلى وتكىزۋىمىز مۇمكىن» دەپ ەدى. رەيتينگپەن قاتىستىرۋ بىزگە نە بەرەدى؟
– وتكەندە ارمان تولەگەن ۇلىمەن وسى رەيتينگ تۋرالى اقىلداسقانبىز. مەنىڭ ويىمشا, بۇل جۇيە قازىرگى ۋاقىتتا بىزگە كەلمەيتىن سياقتى. ويتكەنى, جوعارىدا ايتقانىمداي «قازاقستان بارىسىنا» قاتىسىپ جاتقان بالۋانداردىڭ كوبى سامبو, دزيۋدو كۇرەسىنەن كەلگەندەر دەدىم عوي. ولار رەيتينگ جيناۋ ءۇشىن مىندەتتى تۇردە قازاق كۇرەسىمەن شۇعىلدانىپ, قازاق كۇرەسىنەن وتەتىن تۋرنيرلەرگە قاتىسىپ, ۇپاي جيناۋ كەرەك بولادى. ال, مىنا جاقتا ولاردىڭ ءوز سپورت تۇرلەرىنەن وليمپيادا, الەم, ازيا چەمپيوناتتارىنا قاتىسۋ كەرەك بولادى. رەيتينگ, جيناي الماسا «قازاقستان بارىسىنا» قاتىسا الماي قالادى. ولار تۋرنيرگە قاتىسپاسا, جارىس كورىگى قىزبايتىنى بەلگىلى. سوندىقتان, وسى جايتتىڭ ءبارىن ساراپتاپ, اقىلداسىپ, ويلاسا وتىرىپ بولاشاقتىڭ ەنشىسىنە قالدىردىق. بىراق, ءتۇبى وسى رەيتينگكە كەلەتىن سياقتىمىز.
– ءسىز تورەشىلەر كوميتەتىنىڭ توراعاسىسىز. بيىلعى تورەشىلىك جاعى قالاي بولادى؟ كەيدە بەلدەسۋلەردەن سوڭ جانكۇيەرلەر اراسىندا ۇپايىن بەرمەي قالدى دەگەن سوزدەر سىزدەردىڭ باعىتتارىڭىزعا قاراي ايتىلىپ جاتاتىنى جاسىرىن ەمەس...
– بيىل دا تورەشىلىك جاعىنان الىپ بارا جاتقان اسا قاتتى وزگەرىس جوق. تەك ءبىر جايت, فينالدىق باسەكەدە تورەشىلەر جاڭا ەرەجەگە ساي, الدىن الا 200 000 تەڭگە جارنا تولەيتىن بولادى. جىل باسىندا بۇكىل رەسپۋبليكا تورەشىلەرىن جيناپ, ولاردان ەمتيحان الىپ ىرىكتەدىك. ارالارىندا سۇرىنگەندەرى دە بولدى. سىننان وتكەن 12 تورەشىنى فينالدىق بەلدەسۋگە دايىندادىق. بىراق, فينالدا ءالى كىمدەر شىعاتىن انىقتالمادى. ونى ەرتەڭ جارىس الدىندا انىقتايتىن بولامىز.
– «قازاقستان بارىسىنىڭ» فينالىندا تورەلىك ەتەتىندەر جارنا تولەگەنى قانشالىقتى دۇرىس؟ ناتيجە جەمىسىن بەرەدى دەپ ەسەپتەيسىز بە؟
– ارينە, جەمىسىن بەرەدى دەپ ويلايمىز. فينالدا قازىلىق ەتەتىن تورەشىلەردىڭ ءوزى ءوز وبلىستارىنان كەلگەن بالۋاندارمەن ءبىر زالدا جاتتىعىپ, ولارعا باپكەر بولعاندار. سول ءۇشىن بەلدەسۋ كەزىندە ءوز جاعىنا بۇرا تارتپاس ءۇشىن, ءادىل تورەلىك ەتۋ ءۇشىن ولاردان 200 مىڭ تەڭگە جارنا الىپ وتىرمىز. مەنىڭشە, ول دا از اقشا ەمەس. ەگەر, كەزدەسۋ جانجالسىز, تالاس-تارتىسسىز وتسە, وندا سول تورەشىگە 200 مىڭ تەڭگەسىن قايتارىپ, ۇستىنە 350 مىڭ تەڭگە سىياقى قوسىپ بەرەتىن بولامىز. جالپى, ءوز باسىم مۇنى دۇرىس جۇيە دەپ ەسەپتەيمىن.
اڭگىمەلەسكەن ءالي بيتورە,
«ەگەمەن قازاقستان»