وسىدان بەس جىل بۇرىن سىر بويىنىڭ باتىرى بۇحارباي ەستەكباي ۇلىنىڭ 200 جىلدىعىنا قىزىلوردا وبلىسى, جالاعاش اۋدانىنداعى تۇراتىن ۇرپاقتارى ۇلكەن اس بەردى. اسپەن بىرگە اتا-بابا ءداستۇرى اتتالماي, الامان بايگە باستالادى. بايگەگە ەلدىڭ تۇكپىر-تۇكپىرىنەن كەلگەن جاقسىلار جۇيرىكتەرىن قوستى. سايگ ۇلىكتەر اق تەر, كوك تەر بولىپ مارە سىزىعىنا جاقىنداعاندا الدىنا تۇلپار سالماي كەلە جاتقان كۇرەڭ جۇيرىكتىڭ شاباندوزى جالپ ەتىپ, اتتان قۇلاپ تۇسەدى.
جىعىلعان بالانى تورەشىلەر ات ارتىنا مىنگىزىپ, كۇرەڭدى قۋىپ جەتىپ, اتقا قايتا مىنگىزەدى. شاباندوزدى قايتا مىنگىزەم دەگەنشە الدىڭعى توپ جارتى اينالىم وزىپ كەتسە دە, ارتىنان قۋىپ جەتىپ, ءتورتىنشى بولىپ مارە سىزىعىن كەسىپ وتەدى. ءدال وسى ساتتە تەبىرەنبەگەن, دەلەبەسى قوزباعان ادام سيرەك بولعانى ءسوزسىز. الاماندا جۇيرىك پەن جىعىلعان بالانىڭ ەرلىگىنە ريزا بولعان سەناتور قوجاحمەت بايماحانوۆ ءوز قالتاسىنان 300 مىڭ تەڭگە الىپ, بايگە اتاسا كەرەك.
وسى وقيعاعا كۋا بولعان, تاماشا ءساتتى ءتۇسىرىپ العان قىزىلوردالىق ءفوتوتىلشى بولات وماراليەۆ بىلاي دەيدى: «ۇلتتىق سارا سايىستىڭ قۇدىرەتى دە وسى! سوندا جىلقى دەگەن كيەلى مالدىڭ ءبىر ادىم دا جارىس ەرەجەسىن بۇزباي, بارىن سالىپ العا ۇمتىلعانى, شاباندوزى اتقا قايتا قونعاندا, ودان بەتەر تۇلەي شاپقانى ءدۇيىم ەلدىڭ دەلبەسىن قوزدىرىپ, ءبىر ايقاي باستالدى. وسى جولى حالىق شۋلاپ, بايگەنى كۇرەڭگە بەرۋ كەرەك دەپ تۇرىپ الدى. سول جولى باس بايگە كۇرەڭگە بەرىلدى مە جوق پا, بىلمەدىم. تورەشىلەر دە بايگە ءتارتىبىن ساقتاۋى كەرەك».
مۇندايدا بايگە تورەشىلەرى ءتۇرلى پايىم ايتادى. قاتىپ قالعان ەرەجە جوق. ەگەر ەگەسى جىعىلعان سايگ ۇلىك ءبىرىنشى كەلسە, ەكىنشى اتتىڭ بايگەسىن بەرۋ كەرەك دەسە, ات مارەگە جەتپەي جىعىلعاندا, شاباندوز ءوزى جاياۋ جۇگىرىپ مارەگە باس كيىمىن لاقتىرىپ وتكىزسە – بايگە سونىكى دەيدى. ال ەندى بۇحارباي باتىردىڭ اسىنداعى اتقا كەلسەك, ءبىرىنشى بولىپ وزىپ كەلە جاتقان كۇرەڭگە تورەشىلەر شاباندوز بالانى ەرگە وتىرعىزامىز دەپ ۋاقىت الدىرىپ الدى. بالانى اتقا وتىرعىزام دەگەنشە ون شاقتى تۇلپار وزىپ كەتتى. كۇرەڭ ات وزىنەن وزعان جۇيرىكتەردى قۋىپ جەتەم دەگەنشە مارەگە جاقىنداپ قالدى. سوندا دا بولسا دۇلەي كۇرەڭ كوبىن قۋىپ جەتىپ ءتورتىنشى كەلدى, دەيدى ءفوتوتىلشى.
ايناش ەسالي, «ەگەمەن قازاقستان»
الماتى
سۋرەتتى تۇسىرگەن بولات وماراليەۆ