كورەي بالەتى بارشا جۇرتتى تاڭداندىردى

مۇندا ليبرەتتو, مۋزىكا, حورەوگرافيا جانە سۋرەت ونەرى توعىسا كەلىپ, ياعني ءتورت سالانىڭ بىرىگۋىنەن بەكزات ونەردىڭ باسى قۇرالاتىنىن ايتا كەتۋىمىز كەرەك. بالەتتىڭ باستى ارەكەتى – بي مەن پانتوميما دەسەك, وعان وتاندىق ماماندار دا ايرىقشا كوڭىل ءبولىپ, الەمدىك دەڭگەيدەگى بالەت ترۋپپالارىمەن شىعارماشىلىق بايلانىس ورناتۋعا بارىنشا مۇددەلى ەكەندىكتەرىن بىلدىرۋدە. سونىڭ ءبىرى, مىنە, كورەيلىك بالەت جۇلدىزدارىنىڭ ءبىزدىڭ ەلىمىزگە ساپارى ەلىمىزدىڭ مادەني ومىرىندەگى ەڭ ايتۋلى وقيعاعا اينالدى. حالىقارالىق فەستيۆال جاي عانا كەلىپ-كەتۋ ءۇشىن ەمەس, سونىمەن قاتار, ول ساحنالىق تاجىريبە الماساتىن, وي-پىكىرلەر تۇيىستىرەتىن بي الاڭىنا اينالىپ, قانشاما جاڭا ەسىمدەرگە جول اشادى.  الەمدىك ءتۇرلى حورەوگرافيالىق مەكتەپتەردىڭ وكىلدەرىن, وزىندىك ستيلدەرى مەن قاعيدالارىن تانىستىرۋ ارقىلى بالەت ونەرىنىڭ شەبەرلەرى ەل مەن ەلدىڭ, حالىق پەن حالىقتىڭ اراسىن جاقىنداستىراتىن شىعارماشىلىق دوستىق قارىم-قاتىناستاردى مۇنان ءارى دامىتۋعا ىنتالى. ونەر مەرەكەسى كلاسسيكالىق بي ونەرىمەن قاتار زاماناۋي بي ونەرى ستيلدەرىن كەڭىنەن ناسيحاتتاۋعا جول اشپاق. ايتا كەتەتىن جايت, ۇجىم ناچو دۋاتو, رايموندو رەبەك, وحاد ناحارين سىندى شوقتىعى بيىك قازىرگى زامانعى حورەوگرافتاردىڭ اۆتورلىق بالەتتەرىن ۇسىندى. «This is modern» كەشىنىڭ باعدارلاماسىنا «ەلف», «اق ءتۇس», «مينۋس 7» اتتى تانىمال قويىلىمدار ەنگەن. – ءبىز قازاقستاندا العاش رەت ونەر كورسەتىپ وتىرمىز. قازىرگى تاڭدا ترۋپپادا شامامەن 60 شاقتى ءارتىس بار, ال گاسترولدىك ساپارعا وسىلاردان 35 ءبيشىنى تاڭداپ الدىق. «استانا وپەرا» تەاترى كورەرمەندەرىنە ارنالعان گاسترولدىك رەپەرتۋارعا قوسىلعان بالەتتەردى ءبىز جىلدا «Korean ballet festival» (سەۋل) فەستيۆالىندە ۇسىنىپ ءجۇرمىز. بۇل شاعىن سپەكتاكلدەردى كورەرمەندەر قاتتى جاقسى كورەدى ءارى اسىعا كۇتەدى, سوندىقتان ءبىز سول قويىلىمداردى سىزدەرگە دە الىپ كەلۋدى ۇيعاردىق. الەم بويىنشا ءبىزدىڭ بالەتتىڭ جانكۇيەرلەرى وتە كوپ. قازاق ەلىنە ساپارىمىز دا سونداي جارقىن ساتتەرگە تولى بولدى, − دەپ ويىن ورتاعا سالدى «Universal Ballet» ارتىستىك ديرەكتورىنىڭ ورىنباسارى تيەن ريۋ. ەسكە سالا كەتەيىك, ترۋپپا وسىعان دەيىن جاپونيا, كولۋمبيا, تۇركيا, قىتاي, وار, رەسەي, فرانتسيا, اقش, كانادا, ومان جانە سينگاپۋر قالالارىندا ونەر كورسەتىپ, الەمدىك تۋرنەسىن ويداعىداي تامامداعان بولاتىن.  بۇگىندە «Universal Ballet»-ءتىڭ باس ديرەكتورى دجۋليا مۋنعا, كوركەمدىك جەتەكشىسى برايان يۋ جانە قۇرمەتتى كوركەمدىك جەتەكشىسى ولەگ ۆينوگرادوۆقا كوپشىلىكتىڭ بەرىپ وتىرعان باعاسى وتە جوعارى جانە مۇنان كەيىنگى جەتىستىكتەرىنە بارىنشا سەنىمدى. ويتكەنى, ۇشتىك وداق ازيالىق كەربەزدىك پەن ۇيلەسىمدىلىكتى باتىستىق كلاسسيكالىق بالەتتىڭ كۇشى مەن اسەمدىگىمەن وتە ءساتتى قيىستىرا الىپ وتىر. سول ءۇشىن دە بۇلار الەمگە تانىمال جانە ارىپتەستەرىنىڭ قۇرمەتىنە يە. ۇجىم سونىمەن قاتار, «ونەردەگى كوشباسشىلىق» پرەزيدەنتتىك ماراپاتىنا يە بولعان (1999).  الەمدىك بالەتتىڭ جاۋھارى – «اققۋ كولى», «دون كيحوت», «جيزەل», «بايادەركا», سونىمەن قاتار, دجون كرانكونىڭ «ونەگين», ۋيليام فورسايتتىڭ «التىن شيە پىسكەن جەر», يرجي كيلياننىڭ «التى بي», «كىشكەنتاي اجال», ت.ب. قازىرگى زامانعى ۇلگىلەرىمەن قاتار ترۋپپا رەپەرتۋارىندا كورەي فولكلورىنىڭ كلاسسيكالىق بالەتپەن ۇيلەسكەن ۇلتتىق حورەوگرافيالىق تۋىندىلارى – «شيم شون – قيىر شىعىس اڭىزى» جانە «چانحۋانگ ماحابباتى» بار.

قارشىعا كۇلەن