وتىرىسقا ءماجىلىس باسشىسى نۇرلان نىعماتۋلين توراعالىق ەتتى. ونىڭ ىشىندە قىزۋ تالقىلانعانى ۇلتتىق ەكونوميكا ءمينيسترى تيمۋر سۇلەيمەنوۆ تانىستىرعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جارناما ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بولدى.
دەپۋتاتتار جالپى وتىرىس اياسىندا تالقىلاپ, ءبىرىنشى وقىلىمدا ماقۇلداعان قۇجاتتىڭ ءبىرى – «مەملەكەتتىك اۋديت جانە قارجىلىق باقىلاۋ تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بولدى. تاقىرىپقا قاتىستى نەگىزگى باياندامانى ءماجىلىس دەپۋتاتى ومارحان وكسىكباەۆ, ال قوسىمشا باياندامانى قارجى جانە بيۋدجەت كوميتەتىنىڭ مۇشەسى قوجاحان جاباعيەۆ جاسادى. بۇل قۇجات مەملەكەتتىك اۋديت جۇيەسىن ودان ءارى جەتىلدىرۋدى كوزدەيدى. «مەملەكەتتىك ورگانداردىڭ جانە كۆازيمەملەكەتتىك سەكتور سۋبەكتىلەرىنىڭ قىزمەتىن باعالاۋ نەگىزىندە مەملەكەت قاراجاتى مەن مەملەكەتتىڭ اكتيۆتەرىن پايدالانۋ مەن باسقارۋدىڭ تيىمدىلىگىن ودان ءارى ارتتىرۋعا ىقپال ەتەتىن قۇقىقتىق تەتىك جاقساردى. جۇرگىزىلگەن تەكسەرۋلەردىڭ قورىتىندىلارى بويىنشا جاۋاپتىلىق كۇشەيتىلدى جانە ۇسىنىمدار ينستيتۋتى ەنگىزىلدى. بۇلار مەملەكەتتىك اۋديتورلاردى كاسىبيلەندىرۋدىڭ كەلەسى كەزەڭى بولىپ تابىلادى», دەدى دەپۋتات و.وكسىكباەۆ. بايانداماشىنىڭ سوزىنە قاراعاندا, زاڭ جوباسىن ازىرلەۋشىلەردىڭ جۇمىس توبىنا 40-تان استام ۇسىنىس كەلىپ تۇسكەن. ونىڭ ءبارى دە مۇددەلى مينيسترلىكتەر مەن ءتيىستى ۆەدومستۆولار اراسىندا قىزۋ تالقىلانىپ, لايىقتى شەشىمدەر قابىلدانعان. وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جارناما ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا قىزۋ ءارى ۇزاق تالقىلانىپ, ماقۇلداندى. سەبەبى, ءماجىلىس توراعاسىنىڭ ايتۋىنشا, ەلىمىزدەگى جارناما قىزمەتى سالاسىندا شەشىمىن تاپپاعان ماسەلەلەر شاش ەتەكتەن كورىنەدى. «بۇگىنگى تاڭدا ءبىزدىڭ ەلىمىزدە جارناما ورنالاستىرۋدىڭ ءتارتىبى 17 نورماتيۆتىك اكت ارقىلى رەتتەلۋى كوپ نارسەنى اڭعارتسا كەرەك. وسىعان سۇيەنگەن جەرگىلىكتى اتقارۋشى ورگانداردىڭ ارقايسىسى ءوز بەتىمەن ارەكەت ەتە وتىرىپ, ءتۇيىندى ءتيىمدى شەشىپ جاتقانداي كورىنەدى. الايدا, ءىس جۇزىندە ولاي ەمەس. ماسەلەن, سالىقشىلار LED-ەكران مەن جارنامالىق باننەردىڭ ايىرماسى جوق دەپ ساناپ, تولەمدى تەڭ ەسەپتەيدى. سول سياقتى رەسپۋبليكالىق ماڭىزى بار جول جيەگىندەگى جارنامالاردىڭ بارلىعىندا مەملەكەتتىك سيپاتقا ءتان ماڭىز جوق, جۇيەسىز ورنالاستىرىلعان. سوندىقتان دا بۇل سالاعا اۋقىمدى جاڭاشىلدىقتار مەن تەمىردەي ءتارتىپ ورناتۋ ءسوزسىز قاجەت», دەدى ن.نىعماتۋلين. ۇلتتىق ەكونوميكا ءمينيسترى تانىستىرعان زاڭ جوباسى جارناما قىزمەتىن مەملەكەتتىك رەتتەۋدى جۇيەلەۋگە جانە جارناما سالاسىنداعى, ونىڭ ىشىندە ءتۇرلى زاڭ بۇزۋشىلىقتارعا جول بەرمەۋ بولىگىندەگى زاڭنامانى جەتىلدىرۋگە باعىتتالعان ەكەن. ءمينيستردىڭ تۇسىندىرۋىنشە, جارناما قىزمەتىن مەملەكەتتىك رەتتەۋدى جۇيەلەۋ شەڭبەرىندە جارناما سالاسىنداعى ۋاكىلەتتى ورگان مەن جارناما سالاسىنداعى رەتتەۋشى مەملەكەتتىك ورگانداردى انىقتاۋ كوزدەلۋدە. «سوندىقتان دا, زاڭ جوباسىندا اۋماقتاردى اباتتاندىرۋ تارتىبىنە ۇقساس جارناما سالاسىنداعى ۋاكىلەتتى ورگاننىڭ سىرتقى (كورنەكى) جارنامانى ەلدى مەكەندەردە اشىق كەڭىستىكتە ورنالاستىرۋدىڭ ۇلگىلىك قاعيدالارىن بەكىتۋدى ماقسات ەتىپ وتىرمىز. سونداي-اق, الەۋمەتتىك جارنامانى كەڭىنەن تاراتۋ ارقىلى قوعامنىڭ ادامگەرشىلىك-مادەني تاربيەسىنىڭ دەڭگەيىن ارتتىرۋ, ەلدىڭ يميدجدىك ساياساتىن ىلگەرىلەتۋ ءۇشىن ونى كۇشەيتۋ ماقساتىندا, زاڭ جوباسىندا مىندەتتى تەلە-راديو ارنالار ءۇشىن ءبىر اي ىشىندە بەرىلەتىن حابارلاردىڭ جالپى كولەمىنىڭ كەمىندە 1 پايىزى مولشەرىندە وتەۋسىز نەگىزدە الەۋمەتتىك جارنامانى ورنالاستىرۋ بويىنشا تالاپ ەنگىزىلەتىن بولادى», دەدى ت.سۇلەيمەنوۆ. ايتا كەتەيىك, داۋىسقا سالۋ ناتيجەسىندە ءبىراۋىزدان ماقۇلدانعان اتالعان زاڭ جوباسىندا قازاقستان رەسپۋبليكاسىنىڭ 5 كودەكسى مەن 9 زاڭىنا وزگەرىستەر مەن تولىقتىرۋلار ەنگىزۋ كوزدەلەدى.
نۇرلىبەك دوسىباي, «ەگەمەن قازاقستان»