ۇبت – بىلىمگە ۇمتىلعان جاستىڭ باعى. ارينە, باق ءبىلىم جيعان وقۋشىعا قوناتىنى اقيقات. سوندىقتان دا, اتا-انالار بايەك بولىپ, بايگەگە قوسىلعان ق ۇلىندارىنىڭ تىلەۋىن تىلەپ, كۇنۇزاق ۇبت ءوتىپ جاتقان ورىنداردى توڭىرەكتەپ ءجۇر.
جالپى, 20 ماۋسىم كۇنى باستالعان ۇلتتىق بىرىڭعاي تەستىلەۋدىڭ ءبىرىنشى لەگىنە قاتىسۋعا 16 468 تۇلەك ءوتىنىش بەرگەن ەكەن. ءبىلىم جانە عىلىم مينيسترلىگى تاراتقان اقپاراتقا سايكەس, ونىڭ ىشىندە قازاق تىلىندە – 12633, ورىس تىلىندە 3229 ادام تاپسىردى. تەستىلەۋ سىناعى قازاقستان بويىنشا 42 ۇبت وتكىزۋ پۋنكىتىندە جۇرگىزىلۋدە. ايتا كەتەرلىگى, ۇبت-نىڭ العاشقى كۇندەرىندە-اق ءتارتىپ بۇزعان 3 ادام اۋديتوريادان شىعارىلىپ, جاۋاپتارى جويىلعان. سونداي-اق, تەستىلەۋگە قاتىسۋشىلاردان 22 696 تىيىم سالىنعان زاتتار الىندى. العاشقى كۇنگى ورتاشا بالل 75,53-ءتى قۇراپ وتىر. ال وڭىرلەرگە كەلسەك, وڭتۇستىك قازاقستان وبلىسىندا ءبىرىنشى لەكپەن تاپسىرعان 4266 بالانىڭ 514-ءى 100 بالدان جوعارى جيناپ وتىر. ولاردىڭ ورتاسىندا وبلىس ورتالىعى وزىق تۇر. شىمكەنت شاھارىنداعى «بولاشاق» مەكتەبىنىڭ تۇلەگى يساتاي ءبىرجان 137 بالل, ال №47 مەكتەپ-گيمنازياسىنىڭ تۇلەگى ايگەرىم جولداسبەكوۆا 136 بالل جيناعان.
ەكىنشى كۇننىڭ قورىتىندىسى بۇگىن بەلگىلى بولادى.
جانەل الماعانبەتوۆا – استانا قالاسىنداعى الكەي مارعۇلان اتىنداعى №40 ورتا مەكتەپتىڭ تۇلەگى, «التىن بەلگى» يەگەرى. ۇبت-نىڭ العاشقى كۇنىندە س.سەيفۋللين اتىنداعى قازاق ۇلتتىق اگروتەحنيكالىق ۋنيۆەرسيتەتىنىڭ بازاسىنداعى پۋنكتە تەستىلەۋ سىناعىن تاپسىرعان جاس تالاپكەر سىننان سۇرىنبەي ءوتىپ, 128 بالل جينادى.
– جاڭا فورماتتى ۇبت-نىڭ نەگىزگى ەرەكشەلىگى وقۋ ساۋاتتىلىعىنىڭ ەنگىزىلۋى جانە ەكى ءپان تاڭداۋعا رۇقسات بەرىلۋى دەۋگە بولادى. مەن حيميا مەن بيولوگيانى تاڭداعان ەدىم. سونداي-اق, سۇراقتار جاۋاپتارىنىڭ كوپ نۇسقالىعى دا جاڭا فورماتتىڭ جاڭالىعى بولدى. بالل جينالۋى نەمەسە جينالماۋى وسى كوپ جاۋاپتى تاپسىرمالارعا بايلانىستى. ماسەلەن, ءبىر سۇراقتىڭ ەكى دۇرىس جاۋابى بەرىلىپ, ءۇش جاۋاپتى دۇرىس دەپ بەلگىلەسەڭىز, ءبىر بالىڭىز كەميدى. سول سيياقتى ءۇش دۇرىس جاۋاپ بەرىلىپ, ەكەۋىن عانا بەلگىلەسەڭىز دە ءبىر بالىڭىز ازايادى. باسقا قيىندىقتار بولعان جوق. ال اۋديتوريادا قولدانۋعا رۇقسات ەتىلمەگەن زاتتار بىردەن جينالىپ الىنىپ وتىردى, دەيدى يىعىنان اۋىر جۇك تۇسكەن ج.الماعانبەتوۆا. ازىق-تۇلىك تەحنولوگياسى ماماندىعىن كوزدەپ وتىرعان بويجەتكەن ءتورت ماماندىققا قۇجات تاپسىرۋدىڭ مۇمكىندىگىن دە ەسكەرمەك.
ەلورداداعى ۇبت وتكىزۋ پۋنكتتەرىنىڭ ءبىرى رەتىندە بەلگىلەنگەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ الدى دا بۇل كۇندەرى الاڭ كوڭىل اتا-انالاردان بوسامايدى. ءبىر قىزىعى, ءيىن تىرەسكەن كوپشىلىكتىڭ كوزى ارنايى قويىلعان ەكرانداردا. ەكرانداردان اركىم ءوزىنىڭ باۋىر ەتى بالاسىنىڭ اۋديتورياداعى احۋالىن ونلاين رەجىمدە كورە الادى. بۇل دا بولسا بيىلعى ۇبت سىناعىنىڭ ءبىر جەڭىلدىگى دەيدى اتا-انالار. اينۇر ەسىمدى جاس انا تۇڭعىش ۇلىنىڭ ۇبت تاپسىرعانىنا الاڭداۋلى بولسا دا الدەبىر كۇمان تۋسا, اپەللياتسيالىق جۇيەنىڭ زاڭدىلىقتارى بۇرىنعىداي ساقتالعانى كوڭىلگە مەدەۋ ەكەنىن ايتادى. ياعني, تەست تاپسىرمالارىنىڭ مازمۇنى بويىنشا دا, تەحنيكالىق سەبەپتەرى بويىنشا دا ءار پۋنكتتە قۇرىلعان اپەللياتسيالىق كوميسسياعا شاعىم تۇسىرۋگە بولادى. سونداي-اق, شەكتى دەڭگەيدەن وتە الماعان تالاپكەرلەر ۇبت-نى بيىل قايتا تاپسىرا الادى. وسى ارقىلى جوعارى وقۋ ورنىنا اقىلى نەگىزدە تۇسۋگە مۇمكىندىكتەرى بار.
«قازبىلىم» رەسپۋبليكالىق ورتالىعىنىڭ جەتەكشىسى اياتجان احمەتجان ۇلىنىڭ ايتۋىنشا, جاڭا فورماتتا ەكى بەيىندىك ءپاننىڭ پايدا بولۋى تالاپكەرلەر ءۇشىن ارتىقشىلىققا اينالىپ وتىر. ماسەلەن, تالاپكەر ماتەماتيكا مەن فيزيكانى قاتار تاڭداسا, 54 ماماندىققا ءتۇسۋ مۇمكىندىگى بار. «وسى سالا بويىنشا 175 ماماندىق وقىتىلادى ەكەن. دەمەك, فيزيكا مەن ماتەماتيكانى تاڭداۋ ارقىلى تالاپكەردىڭ 40 پايىز وقۋ گرانتىن ۇتىپ الۋ مۇمكىندىگى بار دەگەن ءسوز. بۇرىن جالعىز تاڭداۋ پانىمەن مۇنداي مۇمكىندىك از بولاتىن», دەيدى ول.
قالاي دەسەك تە, بيىل ءبىراز تالقىنىڭ وزەگىنە اينالعان جاڭا فورماتتى ۇبت-نىڭ العاشقى ناتيجەلەرى بەلگىلى بولا باستادى. ۇبت كورسەتكىشى بۇرىنعىداي مەكتەپ جۇمىسىنىڭ رەيتينگىسى بولمايتىندىعىنا قۋانىپ جۇرگەندەر دە جەتەرلىك. ەڭ باستىسى, ۇبت-نىڭ بولاشاققا ۇمتىلىستىڭ بەرىك باسپالداعىنا اينالۋى.
دۋمان اناش, «ەگەمەن قازاقستان»