تۋريزم سالاسىنداعى كاسىپكەرلەردى قولداۋعا باعىتتالعان «ساياحات» ايماقتىق باعدارلاماسى بالالار لاگەرىن كەڭەيتۋ جانە قايتا جاڭارتۋ, بالالارعا ارنالعان دەمالىس ۇيلەرىنە كۇردەلى جوندەۋ جۇرگىزۋ, ينفراقۇرىلىمىن جاڭارتۋ, تەحنيكالىق بازاسىن جاڭعىرتۋ سەكىلدى كوپتەگەن ماسەلەلەردى كوزدەگەن ەدى. ەڭ باستى ماقسات - لاگەردىڭ بالالارعا ىڭعايلى, جايلى, قولايلى قاۋىپسىز بولۋى. بۇل جوبانى ىسكە اسىرۋ ءۇشىن تۋريزم سالاسىنداعى كاسىپكەرلەردى قولداۋعا باعىتتالعان «ساياحات» ايماقتىق باعدارلاماسى شەڭبەرىندە «قازاقستان حالىق بانكى» اق ارقىلى قارجىلاندىرىلعان.
لاگەر 32 جىلدان بەرى جۇمىس ىستەپ كەلەدى. سوڭعى بەس جىل ىشىندە ەكى رەت «بالالاردى ساۋىقتىراتىن ۇزدىك ورتالىق» اتاعىنا يە بولدى. «فلامينگو» ۇجىمىنداعى بالالاردىڭ دەمالىسى نەگىزىنەن ينتەللەكتۋالدىق جانە فيزيكالىق دامۋىنا, تاربيەلەنۋىنە, تارتىپتىلىكتىگىنە, پاتريوتتىلىققا, تابيعاتقا ۇقىپتىلىقپەن قاراۋعا باعىتتالعان.
بالالار لاگەرىندە ءار توپ 12 كۇننەن دەمالادى. قازىر جاڭا جاڭارعان لاگەردە جازعى ماۋسىمدا 5 توپتى بىردەن قابىلداي الادى. ءبىر ماۋسىمدا 425 بالا دەمالىپ شىعادى. مۇندا 6 جاستان باستاپ 13 جاسقا دەيىنگى بالالار قابىلدانادى. اقىسى 65 000 مىڭ تەڭگەدەن 75 000 مىڭ تەڭگە ارالىعىندا. ءار توپتى قابىلداۋ بارىسىندا جەتىم جانە از قامتىلعان وتباسى بالالارىن اقىسىز الىپ وتىرۋ دا داستۇرگە اينالعان. جوبا 65-تەن استام ادامدى جاڭا جۇمىس ورنىمەن قامتاماسىز ەتتى.
-17 جىل بويى «فلامينگو» بالالاردى ساۋىقتىرۋ ورتالىعىندا كۇردەلى جوندەۋ جۇمىستارىن جۇرگىزۋ سول مەكەمەدە قىزمەت جاساۋشىلار مەن دەمالۋشى بالالار ءۇشىن ارمان بولىپ كەلگەن بولسا, بۇل ارمان مەملەكەت تاراپىنان جەڭىلدىكپەن بەرىلەتىن نەسيەنىڭ ارقاسىندا جۇزەگە استى. اتا-انالار قام جەمەۋلەرىنە بولادى. بالالاردىڭ قاۋىپسىزدىگى مەن ساۋىقتىرۋ, كوڭىل كوتەرۋ شارالارى جولعا قويىلعان. ءار بالانى ءوز بالامىزداي كورەمىز.ء بىز ءۇشىن ەڭ باستىسى - بالالاردىڭ كۇلكىسى مەن قۋانىشى,-دەدى «فلامينگو» جشس باسشىسى جانبولات ىزەت ۇلى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى