«Eurasian Book Fair – 2017» حالىقارالىق كىتاپ كورمەسى اياسىندا وتكەن سالتاناتتى شاراعا كورنەكتى مەملەكەت جانە قوعام قايراتكەرلەرى, حالىقارالىق ۇيىم باسشىلارى, قازاقستانداعى ديپلوماتيالىق كورپۋس جەتەكشىلەرى, بەلگىلى تۇركىتانۋشى, ادەبيەتشى عالىمدار, سونداي-اق زيالى قاۋىم وكىلدەرى قاتىستى.
الەمدىك تۇركولوگيا عىلىمى ءۇشىن قۇندى سانالاتىن بۇل سوزدىك تولىق نۇسقادا تۇڭعىش رەت جاريالانىپ وتىر. كوپتومدىقتى وقىرمان قاۋىمعا اكادەميا باسشىسى دارحان قىدىرالى تانىستىردى.
ءامىر ءناجىپ التىن وردا داۋىرىندە جازىلعان قۇتىپتىڭ «حۇسراۋ مەن شىرىنى» اتتى اسا قۇندى ادەبي كوركەم شىعارمانىڭ ىشىندەگى 2500 ءسوزدى قامتيتىن «يستوريكو-سراۆنيتەلنىي سلوۆار تيۋركسكيح يازىكوۆ XIV ۆەكا» دەپ اتالاتىن 4 تومدىق ەڭبەگىن ءبىتىرىپ, كوزى تىرىسىندە باسپاعا تاپسىرعان بولاتىن. وكىنىشكە قاراي, بۇل ەڭبەكتىڭ ءبىرىنشى تومى عانا 1979 جىلى ماسكەۋدە جارىققا شىقتى دا, قالعان تومدارى عالىمنىڭ كوزى تىرىسىندە باسىلماي, توقتاپ قالادى.
عۇلاما عالىم قازاقستان تاۋەلسىزدىگىن جاريالاعان ەلەڭ-الاڭدا ءوزىنىڭ سىرلاس باۋىرى, اكادەميك ءابدۋالي قايداريگە قولجازبا مۇرالارىن اماناتتاپتى. «مەن اقىل-ويىمدى تۇركولوگياعا باعىشتادىم. دەنەم ماسكەۋدە قالادى, بىراق سۇيەگىمە قازاقتار يە بولادى, جۇرەگىم دە سەندەرمەن بىرگە... ورتاعاسىرلىق جازبا ەسكەرتكىشتەردىڭ كوبىسى بۇگىنگى قازاق جەرىندە دۇنيەگە كەلگەن, دەمەك ولاردىڭ مۇراگەرلەرى دە – سەندەرسىڭدەر. مەن ولاردىڭ ءبىرازىن جاريالادىم. بىراق جاريالانباعاندارى دا بار. ەكى-ءۇش توم ەتىپ قولجازباسىن دايىنداپ قويدىم. جاريالاپ, شىعارۋدى امانات ەتەم».
حالىقارالىق تۇركى اكادەمياسى تۇركولوگتاردىڭ قولجازبا مۇراسى مەن جەكە ءارحيۆىن, قۇندى كىتاپحاناسىن جيناۋ, ساقتاۋ, زەرتتەۋلەرىن جاريالاۋ جۇمىستارىن جۇيەلى اتقارىپ كەلەدى. قر ۇعا اكادەميگى ءا.قايداري ءوزىنىڭ كىتاپحاناسى مەن قولجازبا قورىن اكادەمياعا تاپسىرعانى بەلگىلى. وسى قوردىڭ ىشىندە ءا.ءناجىپتىڭ اسا باعالى قولجازباسى دا اكادەميا قورجىنىنا كەپ تۇسكەن بولاتىن.
وسىدان كەيىن اكادەميا كورنەكتى عالىم ءا.ءناجىپتىڭ «يستوريكو-سراۆنيتەلنىي سلوۆار تيۋركسكيح يازىكوۆ XIV ۆەكا» دەگەن ەڭبەگىن تولىق دايىنداپ باسۋ جۇمىسىن جوسپارلايدى. الەمدىك تۇركولوگيا عىلىمىنىڭ باعدارىنا جول سىلتەپ, ساپالىق دەڭگەيىن جاڭا بەلەسكە كوتەرەتىن بۇل 4 تومدىق بۇگىن جۇيەلەنىپ, «قازىرگى تۇركولوگيا» سەرياسىمەن وقىرمانعا جول تارتىپ وتىر.
بۇل ىرگەلى دە كەشەندى ەڭبەكتە ەسكى ەسكەرتكىشتەگى 2500 ءسوز تۇركى تىلدەرىنىڭ تاريحي سوزدىكتەرى مەن XI-XV عاسىرلار ارالىعىندا جازىلعان 20-دان استام كونە ادەبي جادىگەرلەرمەن, سونداي-اق 20-دان استام قازىرگى تۇركى تىلدەرىنىڭ باي ماتەريالىمەن سالىستىرىلا بەرىلگەن. اراب-پارسى, سونىمەن بىرگە موڭعول, بۋريات, قالماق تىلدەرىمەن دە قاجەتىنشە سالىستىرۋلار جاسالعان.
اسا كورنەكتى تۇركولوگ ءامىر ءناجىپ 1899 جىلى بۇرىنعى سەمەي وبلىسى, ماقانشى اۋدانى, باقتى اۋىلىندا دۇنيەگە كەلگەن. الدىمەن اۋىل مولداسىنان, كەيىن قحر شاۋەشەكتە رەسەي كونسۋلىنىڭ جانىنان اشىلعان گيمنازيادا, ودان كەيىن سەمەيدە مۇعالىمدەر سەمينارياسىندا وقىعاندا الەم تىلدەرىنىنىڭ سىرىن تانۋعا ءساتتى قادام جاساپ, ورىس, اراب, پارسى تىلدەرىن ۇيرەنەدى. 20-دان استام تۇركى حالىقتارىنىڭ تىلىندە ەركىن سويلەپ, جازا دا بىلگەن فيلولوگيا عىلىمدارىنىڭ دوكتورى, پروفەسسور, تۇركولوگتاردىڭ كەڭەستىك كوميتەتىنىڭ مۇشەسى, تۇركيا تۇرىك ءتىلى قۇرىلىمىنىڭ مۇشەسى بولعان.