القالى جيىندى مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ قۇتتىقتاۋ سوزىمەن اشتى.
مەملەكەت جانە قوعام قايراتكەرى مىرزاتاي جولداسبەكوۆ ءوز سوزىندە ەلەكتروندىق تەحنولوگيا قارىشتاپ دامىعانىنا قارماستان رۋحاني بايلىقتىڭ باستى كوزى كىتاپ بولىپ قالا بەرەتىنىن ايتتى.
بۇدان كەيىن يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى موداشتۆا داميرچيلۋ, بەلگىلى عالىمدار تۇرسىن جۇرتباي, قارجاۋباي سارتقوجا ۇلى, ۇلى اقىن اباي قۇنانباي ۇلىنىڭ ۇرپاعى ءلايلا بايماعامبەتوۆا ءسوز سويلەپ, كىتاپتىڭ ادامزات ومىرىندەگى ماڭىزدىلىعىن اتاپ ءوتتى. «قۇندى تارتۋ» اكتسياسى اياسىندا س.سەيفۋللين اتىنداعى الماتى وبلىستىق امبەباپ عىلىمي كىتاپحاناسىنىڭ ديرەكتورى ماقپال نۇرعاليەۆا, قالامگەرلەر تابىل قۇلياس, اقايدار ىسىم ۇلى, تولىمبەك ءابدىرايىم ۇلى ۇلتتىق اكادەميالىق كىتاپحانا قورىنا باعالى كىتاپتار تارتۋ ەتتى.
«كىتاپ – تاريح, كىتاپ – قازىنا» اتتى كورمەگە ءار جىلدارداعى قۇران باسىلىمدارىنىڭ توپتامالارى, اراب, لاتىن, شاعاتاي جازۋلارىمەن شىققان كونە كىتاپتار مەن قولجازبالار قويىلعان.
ولاردىڭ ىشىندە, تۇركى دۇنيەسىنىڭ ورتاق ماقتانىشتارى ا.بايتۇرسىنوۆتىڭ 1909 جىلى شىققان «قىرىق مىسالى» مەن م.اۋەزوۆتىڭ «اباي جولى» رومانىنىڭ اۆتوردىڭ قولتاڭباسىمەن ساقتالعان العاشقى باسىلىمىن, ابايدىڭ پارسى تىلىندەگى ولەڭدەر جيناعىن ايرىقشا اتاپ وتۋگە بولادى.
جيىن سوڭى ارنايى سەمينار-ترەنينگتەر مەن عىلىمي دارىستەرگە, كۇيتاباقتار مەن ەسكى مەرزىمدى باسىلىمداردىڭ كورمەسىنە ۇلاستى.
ايتا كەتۋ كەرەك, تۇركى اكادەمياسى حالىقارالىق ۇيىمى مەن قر ۇلتتىق اكادەميالىق كىتاپحاناسى اراسىندا تىعىز سەرىكتەستىك بايلانىس ورناعان. بۇعان دەيىن حابارلاعانىمىزداي, اكادەميا 90-نان استام اتالىم بويىنشا ءوزى ازىرلەپ شىعارعان بارلىق كىتاپتارىن اتالعان كىتاپحانا قورىنا تارتۋ ەتكەن بولاتىن.