«دامۋ» قورىنىڭ باسقارما توراعاسى اباي سارقۇلوۆ ەكىنشى دەڭگەيلى بانكتەر مەن ميكروقارجى ۇيىمدارى ارقىلى 1,5 ملرد تەڭگەنىڭ 31 مىڭ جوباسى جەڭىلدىكپەن نەسيەلەندىرىلگەنىن اتاپ ءوتتى. كاسىپكەرلەردىڭ 9,7 مىڭ جوباسى 1 ترلن 811 ملرد تەڭگەگە سۋبسيديالاندى. كەپىل مۇلكى جەتىسپەگەن كاسىپكەرلەردىڭ 3 مىڭ جوباسى 104,3 ملرد تەڭگەگە كەپىلدەمە الدى. 3,3 مىڭعا جۋىق كاسىپكەر ءبىلىمىن جەتىلدىردى.
تەك قانا 2016 جىلى «دامۋ» قورىنىڭ قولداۋىن العان كاسىپورىندار 4 ترلن تەڭگەنىڭ ءونىمىن شىعارىپ, قىزمەتىن كورسەتكەن. 253 ملرد تەڭگە سالىق تولەپ, 26 مىڭ جۇمىس ورنىن اشتى. وسىلايشا بيزنەسكە سالىنعان ءاربىر 1 تەڭگە سالىق تۇرىندە 4 تەڭگە بولىپ قايتقان. 2016جىلى قوردىڭ جەكە كاپيتالى 100 ملرد تەڭگەگە جۋىقتاپ (98,7 ملرد), قازاقستان بانك سەكتورىنىڭ جالپى سوماسىنىڭ 3,5% قۇرادى. قور اكتيۆتەرى 349,4 ملرد تەڭگەنى قۇرايدى. بۇل – قازاقستان بانكتەرى اكتيۆىنىڭ جالپى سوماسىنىڭ 1,4 پايىزى.
«دامۋ»قورى الداعى جىلدارى دامۋدىڭ بىرنەشە باعىتىن كوزدەپ وتىر. اتاپ ايتقاندا: كورسەتىلەتىن بارلىق قىزمەتتەردى تولىقتاي اۆتوماتتاندىرۋ, قارجى سۋپەرماركەتىن قۇرۋ, ميكروقارجىلاندىرۋ, ءىسىن جاڭا باستاعان جانە بيزنەسى بار كاسىپكەرلەردى وقىتۋ.
بىلتىر وسى ۋاقىتتان بەرى «جاڭا بيزنەس اشۋدى قولداۋ», «ستۋدەنت جاستار اراسىندا كاسىپكەرلىك باستامالاردى قولداۋ» جانە «ستارتاپ اكادەميا» جوبالارى اياسىندا 3 834 ادام وقىپ, ونىڭ 357-ءى ءوز بيزنەستەرىن اشتى. 39 جوبا قور باعدارلامالارى اياسىندا قارجى الدى. 817 ادام قاشىقتان وقىتىلدى.
سول سياقتى كومپانيانىڭ شەت ەلدىك سپيكەرلەرى – KODIT نەسيەلەرگە كەپىلدەمە بەرۋ قورى (كورەيا), تۇركيا شاعىن جانە ورتا كاسىپكەرلىكتى قولداۋ جانە دامىتۋ ۇيىمى, BPIFrance فرانتسۋز يننوۆاتسيالىق اگەنتتىگى جانە مالايزيا شاعىن جانە ورتا بيزنەس كورپوراتسياسى وكىلدەرى كاسىپكەرلىكتىڭ الەمدىك ۇزدىك تاجىريبەلەرى تۋرالى اڭگىمەلەپ, «دامۋ» قورىنا وتاندىق كاسىپورىنداردىڭ باسەكەگە قابىلەتتىلىگىن كوتەرۋ بويىنشا اقىل-كەڭەستەرىن بەردى.
سونداي-اق سەسسيا كەزىندە «دامۋ» قورى مەن حالىقارالىق ۇيىمدار اراسىندا قازاقستاندىق كاسىپكەرلەرگە مەملەكەت تاراپىنان قولداۋدى دامىتۋ جانە ەكونوميكالىق, ساۋدا ارىپتەستىگىن جاقسارتۋدى كوزدەگەن مەموراندۋم مەن ارىپتەستىك جايلى كەلىسىمدەرگە قول قويۋ ءراسىمى ءوتتى.
ايناش ەسالي,
«ەگەمەن قازاقستان».
الماتى