مىنە, كوپتەن كۇتكەن كۇن دە كەلىپ جەتتى. «بالا داۋىسى–2017» ۇلتتىق بالالار ءان بايقاۋىنا قاتىسۋعا تىلەك بىلدىرگەن 120-عا جۋىق ۇمىتكەر وبلىستىق مادەنيەت ورتالىعىنا جينالىپ, ساحناعا شىعۋ كەزەكتەرىن تاعاتسىزدانا توسىپ تۇردى. ءبىز كوپشىلىك اراسىنان وڭىرگە تانىمال «اينالايىن» بي توبىنىڭ جەتەكشىسى بوتاگوز مامەتوۆانى جولىقتىرىپ, ول ۇكىلەپ بايگەگە قوسقان بالاقايلاردىڭ قانداي دايىندىقپەن كەلگەنىن سۇرادىق. – مەن ءبىر جاعىنان پەتروپاۆل قازاق كلاسسيكالىق گيمنازياسىنداعى مۋزىكالىق ستۋديادا جۇمىس ىستەيمىن. مۇندا تالانتتى وقۋشىلار از ەمەس. ونشاقتىسىن باپتاپ اكەلدىم. ولاردىڭ اراسىندا اياۋلىم كارىباي بولاشاعىنان ۇلكەن ءۇمىت كۇتتىرەدى. قازاق, ورىس, اعىلشىن تىلدەرىندە ءان شىرقايدى. بايقاۋدى ۇيىمداستىرۋشى تولعاناي حاسەنقىزىنىڭ ايتۋىنشا, بايقاۋ بالالار ءان شىعارماشىلىعىن دامىتۋدى كوزدەيدى. مۋزىكالىق ءبىلىم الۋلارىنا كومەكتەسەدى. مۋزىكالىق پروديۋسەر ايجان كەرىمقۇلوۆا مەن ءانشى, جۇل-دىزدى تالىمگەر لۋينا ىرىكتەۋ كەزەڭىنە تورەلىك ەتىپ, «بالا داۋىسى» جوباسىنىڭ وڭىرلىك جەڭىمپازىن انىقتايتىن بولادى. سايىس ەرەجەسى بويىنشا رەتتىك ءنومىر ۇلەستىرىلىپ, ءبىرىنشى كىرۋ كەزەگى اينۇر تىلەۋليناعا بۇيىردى. «سالەم, استانا» وبلىستىق بايقاۋىنىڭ گران-پري يەگەرى «قيسمەت» ءانىن تاڭداپتى. ونى تامىلجىتا شىرقاپ جۇرگەن گاۋحار قاسپاقوۆا اپاسىنا بارىنشا ۇقساۋعا تىرىستى. نۇرايىم ەسقوجا مۇنداي بەدەلدى دوداعا العاش رەت قاتىسقانىنا قاراماستان ءوزىن ەركىن, بايسالدى ۇستادى. جان دۇنيەسىمەن ورىنداعان اندەرى جۇرەكتەرگە جەتىپ جاتتى. ۇزىن-سونار كەزەك كۇتكەن قاتىسۋشىلاردىڭ ءان سايىسى كوپكە دەيىن سوزىلىپ, اركىم ۆوكالدىق, ارتىستىك قارىم-قابىلەتتەرىن تانىتۋعا بارىنشا ۇمتىلدى. قازىلاردىڭ شەشىمىمەن تايىنشا قالاسىنداعى №5 قازاق مەكتەبىنىڭ وقۋشىسى اسەل تاسماقانوۆا جەڭىمپاز دەپ تانىلىپ, رەسپۋبليكالىق كەزەڭگە جولداما الدى.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى