كونتسەرت شىمىلدىعىن الماتى قالاسىنىڭ اكىمى باۋىرجان بايبەك اشتى. ول استانا قالاسىنىڭ ءرولى ەرەكشە ەكەنىن اتاپ ءوتىپ, ەلوردانىڭ ەلىمىزدىڭ جەتىستىگىن, بولاشاققا ۇمتىلىسىن ايقىندايتىنىن جەتكىزدى. «بارلىق قازاقستاندىقتار جاقسى كورەتىن الماتى – ەل تاريحىنا تاۋەلسىزدىكتىڭ التىن بەسىگى رەتىندە ەندى. پرەزيدەنتتىڭ تۇراقتى قامقورلىعىنىڭ ارقاسىندا الماتى زاماناۋي مەگاپوليسكە اينالىپ, ەۋروپالىق قالالارمەن باسەكەگە تۇسە الاتىن دەڭگەيگە جەتتى. الماتىنىڭ استاناداعى مادەني كۇندەرى اياسىندا ءبىز سىزدەرگە ەلىمىزدىڭ باي مادەني مۇراسىن ۇسىنامىز»-دەدى قالا اكىمى. ول پرەزيدەنتتىڭ حالىقارالىق جوعارى مارتەبەسىنىڭ ارقاسىندا «ەكسپو-2017» كورمەسىنىڭ استانادا وتكىزىلىپ جاتقانىن ايتتى. «ەكسپو-2017» - بۇل زاماناۋي تەحنولوگيا مەن ينۆەستيتسيا تارتۋ عانا ەمەس, سونىمەن قاتار سانانى وزگەرتۋ, يننوۆاتسيالىق ويلاۋدى قالىپتاستىرۋ. ەكسپو –بۇل ەلباسى ۇسىنعان رۋحاني جاڭعىرۋدىڭ ءبىر جوباسى» - دەدى ب.بايبەك. ول ءوز سوزىندە حالىقارالىق كورمە اياسىندا وتكىزىلىپ جاتقان مادەني كۇندەر بارىسىندا, ياعني, 11-19 ماۋسىم ارالىعىندا 400-دەن استام الماتىلىق ارتىستەر ءوز ونەرلەرىن تارتۋ ەتەتىنىن حابارلادى.
سولايشا مادەني كۇندەر «الماتىدان ماحابباتپەن» اتتى كونتسەرتپەن باستالدى. كونتسەرتتە «دوسمۇقاسان» توبى, نۇرلان ابدۋللين, ءمادينا سادۋاقاسوۆا, مارجان اراپباەۆا, «جىگىتتەر», «كەشيۋ» توپتارى, ايقىن, لۋينا, روزا رىمباەۆا سىندى ەلىمىزگە تانىمال ونەر جۇلدىزدارى ءان شىرقادى. ال, الماتىنىڭ مەملەكەتتىك قۋىرشاق تەاترى ق.قۋانىشباەۆ اتىنداعى قازاق مۋزىكالىق دراما تەاترىندا كۇنىنە ەكى رەت قازاق جانە ورىس تىلدەرىندە «ق ۇلىنشاق پەن بولتىرىك», «كوڭىلدى ايۋلار» اتتى ۇزدىك سپەكتاكلدەرىن قوياتىن بولادى. سونداي-اق, «الماتىنىڭ ەتنو –اۋىلى» كورمە جارمەڭكەسى, «سازگەن سازى» فولكلورلىق-ەتنوگرافيالىق ءانسامبلىنىڭ جانە «اسقار تاۋلى الماتى» كونتسەرتتەرى مادەني كۇندەر اياسىندا كورەرمەندەرگە تارتۋ ەتىلەدى.
ايگۇل سەيىلوۆا, «ەگەمەن قازاقستان»