ۇلتتىڭ رۋحىن كوتەرەتىن, حالىقتىڭ ساناسىن سەرپىلتەتىن قۇندى قۇجات جاريالانعان كۇننەن باستاپ قوعامدا قىزۋ تالقىلاۋ تۋدىردى. ەلباسى ايتقان ەڭ باستى مۇرات – ەنشىمىزدەگى رۋحاني ەن بايلىقتى يگەرۋ ارقىلى جاڭعىرۋ جولىنا ءتۇسۋ بولىپ تابىلادى. ىقىلىم زاماننان سىر تارتاتىن كونە جازبالار, مادەني مۇرالار دا رۋحاني جاڭعىرۋىمىزدىڭ نەگىزى بولماق. مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىن ناسيحاتتاۋ ماقساتىندا قازاقستاننىڭ ەڭبەك سىڭىرگەن قايراتكەرى, جازۋشى كادىربەك سەگىزباەۆ, حالىقارالىق «الاش» ادەبي سىيلىعىنىڭ يەگەرى, اقىن ءحانبيبى ەسەنعاراەۆا جانە قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, اقىن ۇلىقبەك ەسداۋلەت جامبىل جەرىنە كەلىپ, جۇرتشىلىقپەن جۇزدەستى.
قالامگەرلەر اۋەلى جامبىل, جۋالى جانە بايزاق اۋداندارىندا بولىپ, جەرگىلىكتى تۇرعىندارمەن كەزدەستى. ەلباسى ماقالاسىندا ايتىلعان وزەكتى ماسەلەلەر توڭىرەگىندە وي قوزعاعان اقىن-جازۋشىلار ءوڭىر تۇرعىندارىنىڭ ساۋالدارىنا دا جاۋاپ بەردى. بۇدان كەيىن تاراز قالالىق مادەنيەت ۇيىندە قورىتىندى جيىن ءوتىپ, وندا ەلباسىنىڭ باعدارلامالىق ماقالاسى كەڭىنەن تالقىلاندى. مىنبەر بيىگىنەن ءسوز العان كادىربەك سەگىزباي ۇلى ءتىل تاعدىرى توڭىرەگىندە اڭگىمە قوزعاپ, جاستاردى, اسىرەسە, ءتىلدى قۇرمەتتەۋگە, ءتىلدى بۇزىپ سويلەمەۋگە شاقىردى. سونداي-اق, جازۋشى جىل وتكەن سايىن سويلەۋ مادەنيەتىمىزدىڭ جۇتاڭدانىپ بارا جاتقانىن دا ايتىپ ءوتتى. «كوپ جاستار قازىر دۇرىس سويلەي المايدى. جانە جازۋ مادەنيەتى مەن مانەرى دە جاس جازۋشىلار مەن جۋرناليستەردىڭ ۇنەمى ەسىندە بولۋى كەرەك», دەدى جازۋشى. ال ءحانبيبى ەسەنعاراەۆا قازاقتىڭ تاعدىرى مەن لاتىن ءالىپبيىن ۇشتاستىرىپ, اسەرلى اڭگىمە ءوربىتتى. اڭگىمە بارىسىندا ءوزىنىڭ ادەبيەتكە كەلۋ جولىن, تۋىندىلارىنىڭ تاريحىن دا وقىرمانعا بايانداپ بەردى. «بالا كۇنىمىزدە گازەت-جۋرنالداردى لاتىن الىپبيىندە وقي بەرەتىن ەدىك. لاتىن الىپبيىنە كوشۋ – ماڭىزىن جوعالتپايتىن ماسەلە. ەلباسىنىڭ وسى ويدى دەر كەزىندە قوزعاپ, قوعامعا قوزعاۋ سالعانىن دا ايتىپ وتكەن ءجون», دەپ, جينالعان كوپشىلىككە اقىن رەتىندە ولەڭ وقىپ بەردى. سونداي-اق, ۇلىقبەك ەسداۋلەت باعدارلامالىق ماقالانىڭ تۇتاس مازمۇنىن قامتىعان رۋحاني جاڭعىرۋ جونىندە وي قوزعاي كەلىپ, قازاقتىڭ كورنەكتى اقىن-جازۋشىلارىنىڭ تاڭداۋلى شىعارمالارىن الەمنىڭ ەڭ وزىق تىلدەرىنە اۋدارۋ قاجەتتىگىنە توقتالدى. اسىرەسە, جاس قالامگەرلەردىڭ شىعارمالارىن شەت تىلدەرگە اۋدارۋ ماسەلەسى وزەكتى ەكەنىن جەتكىزدى. «تاراز جەرى ەجەلدەن اقىنداردىڭ مەكەنى. سول ءۇردىس بۇگىندە دە ۇزىلگەن جوق. تارازدا نەسىپبەك ءداۋتاي ۇلى باستاعان تالانتتى قالامگەر ازاماتتار بار. جاس اقىندار دا بار. ەندى سول كورنەكتى قالامگەرلەر مەن جاستاردى شەت تىلدەرگە اۋدارۋ ماسەلەسىن شەشكەن دۇرىس. وسى ماسەلەنى جامبىل وبلىسىنىڭ اكىمى قولعا السا دۇرىس بولار ەدى», دەگەن ۇسىنىسىن دا ايتتى. بۇدان كەيىن ولەڭ وقىپ, كوپشىلىك تىلەگىن قاناعاتتاندىردى. ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان دۇنيەلەردىڭ ءبارى دە ۇلتتىڭ بولاشاعىنا كەرەك. ال سانالى ادامنىڭ ۇنەمى ءبىلىمىن جەتىلدىرىپ, ءوزىن ءوزى رۋحاني تۇرعىدا شىڭداي بەرەتىنىن ەسكەرسەك, اتالعان ماقالانىڭ ماڭىزدىلىعىن ودان ءارى تەرەڭ تۇسىنۋگە بولادى. ادەبي تۇلعالارمەن كەزدەسۋدە حالىق ماقالادا ايتىلعان ويلاردىڭ اسا وزەكتى ەكەنىن جەتكىزىپ, الماتى جانە شىمكەنت قالالارىنان ارنايى كەلگەن قالامگەرلەرگە العىسىن ءبىلدىردى.
حاميت ەسامان, «ەگەمەن قازاقستان»
جامبىل وبلىسى