شارا قازاقستان مەن قىتاي ەلدەرى اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولۋىنا وراي ۇيىمداستىرىلدى. اقپارات جانە كوممۋنيكاتسيالار مينيسترلىگىنىڭ ۇيىمداستىرۋىمەن, «قازاقپارات» حالىقارالىق اقپارات اگەنتتىگى مەن جەنمين حۋاباو» جۋرنالىنىڭ اتقارۋىمەن وتكەن شاراعا ەكى تاراپتىڭ جاۋاپتى وكىلدەرى قاتىستى.
بيىل قىتايدىڭ قازاقستانداعى تۋريزم جىلى. فوتوكورمەنىڭ ۇيىمداستىرىلۋىنىڭ ءبىر سەبەبى وسى ەكەنىن «قازاقپارات» باسشىسى اسقار قۇمىران ايتتى. ال قحر ادەبي تۋىندىلاردىڭ شەت تىلدەرىندە باسىلۋى جانە تارالۋى جونىندەگى باسقارما باستىعىنىڭ ورىنباسارى فا جىڭ حۋايباسقارمانىڭ بىلتىر «قازاقپارات» اگەنتتىگىمەن ىنتىماقتاستىق تۋرالى كەلىسىمگە قول قويعانىن, وتكىزىلىپ وتىرعان شارا سول كەلىسىمنىڭ ناتيجەسى ەكەنىن باياندادى.
فوتوكورمەگە ەكى ەلدىڭ ەڭ كورىكتى جەرلەرىنىڭ سۋرەتتەرى قويىلدى. مىسالى, كاسپي تەڭىزى, باياناۋىل ۇلتتىق مەملەكەتتىك تابيعي پاركى, بۋراباي كولىنىڭ, استانانىڭ كورىكتى عيماراتتارىنىڭ, تۇركىستانداعى قوجا احمەت ياساۋي اتىنداعى كەسەنەنىڭ فوتولارى ەلىمىز تاراپىنان قويىلسا, قىتاي ەلى تاراپىنان ۇلى قىتاي قورعانىنىڭ, بەيجىڭنىڭ ورتالىعىنداعى كىرۋگە تىيىم سالىنعان جەر – مين جانە تسين يمپەرياسىنىڭ يمپەراتور سارايىنىڭ, يۋننانداعى 270 ميلليون جىل بۇرىن قالىپتاسقان كۋنمين قالاسىنىڭ, شەنسين ولكەسىندەگى بينسيان بۋددا حرامىنىڭ, سياويان مۇناراسىنىڭ, گانسۋ ولكەسىندەگى ۋيمەنگۋان كونە جۇرتىنىڭ فوتوسۋرەتتەرى قويىلدى. جالپى, كورمەدەن ەكى ەلدىڭ قورعاۋعا الىنعان اڭ-قۇستارىن, ءۇي جانۋارلارىن, دوستىق راۋىشتەگى كەزدەسۋلەردى بەينەلەيتىن كوپتەگەن فوتولاردى ۇشىراتتىق.
ايگۇل سەيىلوۆا, «ەگەمەن قازاقستان»