مۇندا استانا, الماتى باعىتتارى بويىنشا ۇشاقتار قاتىناپ كەلسە, بۇدان بىلاي شىمكەنتكە دە ايقارا جول اشىلىپ وتىر. ونىڭ العاشقى جولاۋشىسى رەتىندە مەكتەپ وقۋشىسى ايسۇلۋ ەرلىكقىزى تىركەلدى. اكە-شەشەسىن قاتتى ساعىنعانى تۇرىنەن دە, سوزىنەن دە ءبىلىنىپ تۇردى. بۇرىن پويىزبەن تاۋلىكتەپ ساپارلاسا, ەندى وتباسىنا تەز-اق جەتە الادى. ايتوللا ۋاشەۆ تە قاتتى قۋانۋلى. دەنساۋلىعى دىمكاس جان بيىل سارىاعاش شيپاجايىنا جەتۋ ءۇشىن كوپ مەحنات كورىپتى.
«بارلىق تالاپتارعا ساي جابدىقتالعان 50 ورىندى «سيردجەي-200» ۇشاعى شىمكەنت قالاسىنا اپتاسىنا ەكى رەت قاتىنايدى. بيلەتتىڭ باعاسى-20 مىڭ تەڭگە. جۇردەك پويىز «تالگوعا» قاراعاندا ارزان. ەكىنشىدەن, ارالىق ۋاقىت 9 ەسەگە دەيىن قىسقارادى. بۇگىن ۇشاق لىق تولى. سوعان قاراعاندا ءۇمىت اقتالادى دەگەن سەنىم باسىم. ويتكەنى, «سەرپىن»-2050» باعدارلاماسى بويىنشا وڭتۇستىك جاقتاردان جاستار كوپ وقيدى. ونىڭ ۇستىنە ىشكى ميگراتسيا ۇدەرىسىن رەتتەۋ جونىندەگى ۇكىمەت باعدارلاماسىنا وراي كوشىپ كەلۋشىلەر دە, سونىمەن بىرگە دەمالۋشىلار قاتارى دا قالىڭ. وسى جايتتار جان-جاقتى ەسكەرىلگەن», دەيدى مەكەمەنىڭ ديرەكتورى مارات حاسەنوۆ.
جولاۋشىلارعا «سكات» اۆياكومپانياسى قىزمەت كورسەتەدى.
ءومىر ەسقالي, «ەگەمەن قازاقستان».
سولتۇستىك قازاقستان وبلىسى