ءانۇران – مەملەكەتتىڭ باستى رامىزدەرىنىڭ ءبىرى. گرەكتىڭ «gimneo» سوزىنەن شىققان «گيمن» تەرمينى «سالتاناتتى ءان» دەگەن ماعىنانى بىلدىرەتىنى دە بۇگىندە بارشاعا ءمالىم جايت. ءانۇران ەل ازاماتتارىن ءتيىمدى الەۋمەتتىك-ساياسي تۇرعىدان توپتاستىرىپ, ەتنومادەني تۇرعىدان تەڭدەستىرۋ ءۇشىن نەگىزگى مانگە يە, ماڭىزدى دىبىستىق ءرامىز سانالادى. قازاقستان رەسەي يمپەرياسىنىڭ قۇرامىندا بولعان كەزدە قازاقتاردىڭ بىرىڭعاي ءانۇرانى بولمادى. قازاقتاردى ۇلت-ازاتتىق كوتەرىلىستەرگە قارسى قايسار ەرلىككە رۋحتاندىراتىن اقىندار مەن جىراۋلاردىڭ جەكە اندەرى عانا بار ەدى. تاۋەلسىزدىك العاننان كەيىن قايسار حالقىمىزدىڭ بىرنەشە ۇرپاقتارىنىڭ كوپ عاسىرلىق ارمانى – ازاتتىق پەن زايىرلىلىقتى بەينەلەيتىن جاڭا ءانۇرانىن ازىرلەۋ قاجەتتىگى تۋىندادى. ءانۇراننىڭ ءسوزى دە مۋزىكاسى دا رۋحتى كوتەرەتىن سالتاناتتى, ۇلكەن مۇراتتارعا باستاۋ ءتيىس-ءتىن. ول – ادامعا قۋات بەرىپ, مەرەيىن اسىرىپ, ەرەكشە پاتريوتتىق سەزىمگە بولەيتىن مۋزىكالىق شىعارما. قازىرگى ءانۇران «قازاق ءۆالسىنىڭ كورولى» اتانعان سازگەر ءشامشى قالداياقوۆتىڭ ەلگە بۇرىننان تانىس «مەنىڭ قازاقستانىم» ءانىنىڭ نەگىزىندە جانە اقىن جۇمەكەن ناجىمەدەنوۆ شىعارماسىنىڭ ماتىنىنە ەلباسى نۇرسۇلتان نازارباەۆ ەنگىزگەن وزگەرىستەر بويىنشا مەملەكەتىمىزدىڭ رەسمي ءانۇرانى بولىپ ءبىرجولاتا بەكىتىلدى. العاش رەت «مەنىڭ قازاقستانىم» ءانىن مەملەكەتتىك گيمن ەتۋ تۋرالى ەلباسى ن.ءا. نازارباەۆ پارلامەنتكە جولداعان حاتىندا: «ەلىمىزدىڭ قاي تۇكپىرىنە بارسام دا كارى دە, جاس تا انۇراندىق مارتەبەسى بولماسا دا, اسا كورنەكتى كومپازيتورىمىز ءشامشى قالداياقوۆتىڭ اقىن جۇمەكەن ناجىمەدەنوۆتىڭ سوزىنە جازىلعان «مەنىڭ قازاقستانىمدى» ءانۇران ەسەبىندە شىرقاعاندارىنىڭ تالاي كۋاسى بولدىم. بىرىنشىدەن, ءانۇراندا عاسىرلار بويى تاۋەلسىزدىك ءۇشىن كۇرەسكەن بابالار ەرلىگى كورسەتىلۋى ءتيىس. ءانۇراننىڭ اۋەنىنەن وتانعا دەگەن سۇيىسپەنشىلىك, تۋعان جەرگە دەگەن شەكسىز ماحاببات اڭعارىلسا, سوزىنەن جان دۇنيەمىزدى تانىتار ۇلتتىق قاسيەتىمىز بەن بەيبىت پەيىلىمىز, دوسقا اشىق قۇشاعىمىز, ەركىندىككە قۇشتار كەڭ كوڭىلىمىز جاقسى كورىنىس تاپقان. ەكىنشىدەن, ماتىندە اتا-بابالاردان قالعان اسىل مۇرامىز – جەرىمىزدىڭ كەڭ بايتاقتىعى ورىن الۋى كەرەك. ۇشىنشىدەن, ەلىمىز بەن جەرىمىزدىڭ بايلىعى ءبىزدىڭ ۇرپاقتارىمىزدىڭ بولاشاعىنا جارقىن جول اشاتىنى دا ايقىن كورىنىس تاپقانى ءجون. ەڭ باستىسى, ءبىزدىڭ تاۋەلسىزدىگىمىزدىڭ التىن دىڭگەگى – ەل بىرلىگى باسا كورسەتىلۋى كەرەك. وسى ۋاقىتقا دەيىن بەيرەسمي ءانۇران قىزمەتىن اتقارىپ كەلگەن بۇل انگە رەسمي مارتەبە بەرەتىن كۇن جەتتى دەپ ەسەپتەيمىن», – دەپ جازعان ەدى. ءسويتىپ, «مەنىڭ قازاقستانىم» ءانى 2006 جىلى 6 قاڭتاردا رەسمي تۇردە پارلامەنتتە تالقىلانىپ, «مەملەكەتتىك رامىزدەر» تۋرالى جارلىققا ءتيىستى تۇزەتۋ ەنگىزىپ, مەملەكەت گيمنى بولىپ بەكىتىلدى. جاڭا ءانۇران باسپاسوزدە جاريالانعان كۇننەن, ياعني, 10 قاڭتاردان باستاپ كۇشىنە ەندى. ن.ءا. نازارباەۆ قازاقستان رەسپۋبليكاسىنىڭ پرەزيدەنتى قىزمەتىنە كىرىسۋ قۇرمەتىنە ارنالعان سالتاناتتى ءراسىمى كەزىندە 11 قاڭتاردا, استاناداعى اقوردادا العاش رەت ورىندالدى. تاۋەلسىز قازاقستاننىڭ جاڭا ءانۇرانىنىڭ تۇساۋكەسەرىنە الەمنىڭ 70 ەلىنەن كەلگەن مارتەبەلى قوناقتار كۋا بولعان. ءان جەڭىل ورىندالادى. ءسوزى جاتتاۋعا, ەستە ساقتاۋعا ىڭعايلى, ەكپىندى, جىگەرلى, سونداي-اق, تىلگە جەڭىل, جۇرەككە جىلى. بۇقارالىق سيپات الۋىنىڭ سىرى دا وسى قاسيەتىندە. بۇگىندە ءان ءوزىنىڭ ومىرشەڭدىگىن تانىتتى. الماتىداعى ى.التىنسارين اتىنداعى الماتى قالالىق №159 گيمنازيا ۇجىمى وسىناۋ وتكەن جىلدار ىشىندە مارتەبەلى ۇلتتىق سازدىڭ رۋحىن جاسوسپىرىمدەر الدىندا اسپانداتۋ ءۇشىن تالاي-تالاي مازمۇندى شارالار وتكىزدى. اقىن جۇمەكەن ناجىمەدەنوۆتىڭ جان جارى ءناسىپ اپامەن وقۋشىلار قاۋىشىپ, ەستەلىكتەر تىڭدادى. مۇنداي ۇيلەسىمدى جۇزدەسۋلەردىڭ جاس ۇرپاق تاربيەسىنە تيگىزەر پايداسى ۇشان-تەڭىز. ءاننىڭ ماتىنىنە ەلباسى نۇرسۇلتان نازارباەۆتىڭ ءسوزىنىڭ جازىلۋىنىڭ دا ءمانى زور, الەۋەتى اسقاق. ءبىر سوزبەن ايتقاندا, سامۇرىق ءاننىڭ ۇلى دالادا سالتانات قۇرۋى – قازاق رۋحىنىڭ اسپانداۋى دەپ بىلەمىن.
اياگۇل ميرازوۆا, قازاقستاننىڭ ەڭبەك ەرى
الماتى