اينۇر ابدىراسىلقىزى مەن مارجان ەرشۋدىڭ ادەمى ءازىل, ايشىقتى جىرمەن ورىلگەن سۇحباتى كوپشىلىكتى بىردەن باۋراپ الدى. كەش تىزگىنىن ۇستاعان مارجاننىڭ اينۇرعا ارناعان ءاربىر ۇتقىر ءسوز, ۇتىمدى ءازىلى, اينۇردىڭ وعان جاۋابى, ولەڭ ولكەسىندەگى قوس اققۋداي جاراسىمدىلىقپەن تىڭدارمانعا ەرەكشە اسەر سىيلادى.
شىعارماشىلىق كەشكە پارلامەنت سەناتىنىڭ دەپۋتاتى جابال ەرعاليەۆ, قوعام قايراتكەرى ورازكۇل اسانعازى, بەلگىلى قالامگەرلەر جولتاي ءالماش ۇلى, جۇمانازار سومجۇرەك, كامال الپەيىسوۆا, قۋاندىق شاماحاي, سونداي-اق, تولەمىرزا بالتاباەۆ, نۇرگۇل قاراعويشينا الما تۇسىپبەكوۆا جانە ت.ب. زيالى قاۋىم وكىلدەرى قاتىستى. ايماقتاردان ءدىن ىستەرى باسقارماسى وكىلدەرى, ءدىني ۋنيۆەرسيتەتتىڭ ستۋدەنتتەرى قاتىستى. ستۋدەنتتەر مەن وقۋشىلار اقىننىڭ جىرلارىنان شاشۋ شاشىپ كەش كوركىن قىزدىرا ءتۇستى.
اينۇردىڭ شىعارماشىلىعىمەن, قىزمەتىمەن, عىلىمي ەڭبەگىمەن تانىس تۇلعالار ايتقان اقجارما تىلەكتەر مەن لەبىزدەر اسەرلى شىقتى. اعا-اپالارىمىزدىڭ سوزدەرىنەن اينۇردىڭ ۇلت مۇددەسى جولىنداعى كۇرەسكەرلىك رۋحىن, كەسەك əرەكەتتەرىن, تەرەڭدىگىن, كەڭدىگىن مويىنداۋ, ءتانتى بولۋ اڭعارىلدى.
...سوناۋ تۇركىستاننان كەلگەن بىرگە وقىعان قۇربى-قۇرداستارى, جەرلەستەرى ايتقان اڭگىمەلەردىڭ دە ءجونى بولەك. ستۋدەنتتىك پارتادان باستالعان دوستىقتىڭ كورىنىسى, ادەمى ءازىل, رياسىز پەيىلدى اڭعارتقان دوستار دا اينۇردىڭ ەشكىمگە ۇقسامايتىن, دارا بولمىسىنان سىر شەرتكەندەي.
كەشتە اينۇردىڭ وزىنە ارنالعان ءان شىرقالىپ, ولەڭ دە وقىلدى. ورەلى ولەڭ, تاعىلىمدى اڭگىمەگە سۋساعان قاۋىم وسى جولى ءبىر جاساپ قالعانى انىق.
«قۇيىلىپ كوكتەن جىرىم,
ارىلىپ ايعا جانىم,
پانيدەن وتكەن كۇنى
مەن ساعان اينالامىن», − دەپ اقىن كىتابىن قولعا الا كۇبىرلەپ بارا جاتقان بوزبالا-بويجەتكەندەرگە قاراپ جىلى جىميدىق. ءيا, راسىندا كەش اسەرلى ءوتتى.
اتىرگۇل ءتاشىم,
«ەگەمەن قازاقستان»