مينيستر بالالار ۇيىنە سوڭعى ۇلگىدەگى مەديتسينالىق فيزيوكابينەتكە ارنالعان «بينوم» مەديتسينالىق قۇرىلعىسىن سىيعا تارتسا, ءوڭىر باسشىسى 20 تاربيەلەنۋشىگە ەكسپو -2017 كورمەسىنىڭ بيلەتتەرىن تارتۋ ەتتى.
«مۇندا بالالاردىڭ ەشتەڭەگە الاڭ بولماي وسۋىنە, وقۋىنا, جالپى ازامات بولىپ قالىپتاسۋلارىنا بارلىق جاعداي جاسالىنۋى ءتيىس. سوندىقتان مەكەمە قىزمەتكەرلەرىنە ۇلكەن جاۋاپكەرشىلىك ارتىلادى»,- دەگەن وبلىس اكىمى جانسەيىت قانسەيىت ۇلى بالالاردىڭ استاناعا بارىپ-قايتۋ شىعىندارىن دا ءوز ەسەبىنەن جۇزەگە اسىراتىنىن جەتكىزدى.
اتالعان مەكەمە جىل باسىنان بەرى قر ءدىن ىستەرى جانە ازاماتتىق قوعام مينيسترلىگىنىڭ قامقورلىعىنا الىنعان بولاتىن. قازىرگى تاڭدا مۇندا 3 جاستان 11 جاسقا دەيىنگى 68 جەتىم جانە اتا-اناسىنىڭ قامقورلىعىنسىز قالعان بالالار تاربيەلەنەدى. مەكەمەدە 45 قىزمەتكەر جۇمىس ىستەيدى. ونىڭ 21-ءى پەداگوگ, ونبەسى تاربيەشى, تورتەۋى دارىگەر.
ايتا كەتەيىك, 2016-2017 جىل ارالىعىندا بالالار ءۇيىنىڭ 9 تاربيەلەنۋشىسى قامقورشىلىققا, 3-تاربيەلەنۋشىسى پاتروناتتىق تاربيەگە بەرىلىپ, 6 بالا تۋعان وتباسىنا قايتارىلعان.
تاربيەلەنۋشىلەردىڭ بارلىعى تۇرعىن ءۇي الۋعا كەزەككە قويىلعان. جەتىم بالالاردىڭ جاردەم اقىلارى ءوز ەسەپ شوتتارىنا ءتۇسىپ وتىرادى. 46 مەكتەپ جاسىنداعى بالا, قالاداعى №33 ك. قاسىم ۇلى اتىنداعى جالپى ورتا مەكتەپتە ءبىلىم الادى, 22 بالا مەكتەپكە دەيىنگى توپتاردا تاربيەلەنەدى. مەكتەپكە دەيىنگى توپتار «زەرەك بالا» باعدارلاماسى بويىنشا ءدارىس الادى.
بالالار ۇيىندە وقۋ-تاربيە جۇمىسى تولىعىمەن قازاق تىلىندە جۇرگىزىلەدى, بي, ۆوكال, قول ونەر ۇيىرمەسى جۇمىس ىستەيدى. ۇيىرمەگە 58 بالا قاتىسادى. ساباقتان تىس ۋاقىتتا ءتۇرلى ءىس-شارالار ۇيىمداستىرىلادى. بالالار وقۋ قۇرالدارمەن تولىق قامتىلعان.