استانانىڭ ىرگەسىندەگى قوسشى اۋىلىندا اشىلعان «التىن تاعا» ساۋدا كەشەنىنىڭ اۋماعى 1 650 شارشى مەتردى قۇرايدى. وندا تەك ساۋدا پاۆيلوندارى عانا ەمەس, ۆەتەرينارلىق زەرتحانا, قاساپحانا, شۇجىق تسەحى, توڭازىتقىش كامەراسى, كوكونىس جانە جەمىس-جيدەك قويماسى بار. وعان قوسا, 2500 قوي-ەشكى, 300 باس ءىرى قارا مەن جىلقى ت ۇلىگىن قاماپ ۇستايتىن 15 اشىق مال قورا دا قاراستىرىلعان.
ساۋدا كەشەنى وكىلدەرىنىڭ ايتۋىنشا, مۇنداي بازار ەلىمىزدە تەك جامبىل وبلىسىنىڭ قورداي كەنتىندە عانا بار. «التىن تاعا» بازارىندا كوكونىس, جەمىس-جيدەك, ەت جانە ەت ونىمدەرى, بالىق, ءسۇت جانە ءسۇت ونىمدەرى, ارپا, تۇرمىستىق حيميا جانە كۇندەلىكتى تۇتىناتىن تاۋارلار ساتىلادى.
شۇجىق تسەحىندا ەت ونىمدەرىنىڭ سۇرلەنگەن, جارتىلاي سۇرلەنگەن ءتارىزدى 50 ءتۇرى شىعارىلادى. تسەحتىڭ قۋاتى تاۋلىگىنە 2 توننا ەت ونىمدەرىن قۇرايدى. سونداي-اق, كوكونىس جانە جەمىس-جيدەك قويماسىندا 1 000 توننا ءونىم ساقتاۋعا بولادى. قويمانىڭ ءىشى سالقىنداتقىش, بەلگىلى ءبىر اۋا تەمپەراتۋراسىن ۇستاپ تۇرۋ ءۇشىن قاجەتتى قوندىرعىلارمەن جابدىقتالعان.
وعان قوسا, ساۋدا ورنىندا سىرتتان كەلگەن ساۋداگەرلەر ءۇشىن جاتاقحانا, 100 ورىندىق اسحانا جانە 200 كولىككە ارنالعان اۆتوتۇراق قاراستىرىلعان. «التىن تاعا» بازارى تاس جولدىڭ بويىندا ورنالاسقاندىقتان ءارى بەينەباقىلاۋ كامەراسىمەن جابدىقتالعاندىقتان اۋىل شاۋاشىلىعى تاۋارلارىن ونىدىرۋشىلەر ءۇشىن وتە قولايلى. وسى ساۋدا ورنى ارقىلى ەلوردا تۇرعىندارى مەن استانالىق ەلدى مەكەندەردەگى حالىق ساپالى ءارى ەكولوگيالىق تازا اۋىل شارۋاشىلىعى ونىمدەرىن تۇتىناتىن بولادى.