1980 جىلعى ماسكەۋلىك جازعى وليمپياداعا ارناپ سالىنعان ستاديوندى جاڭارتۋ ءساۋىر ايىنىڭ سوڭىندا باستالدى. قالانىڭ ەڭ باستى سپورت نىسانىنداعى قازىرگى جۇمىستار ۋاقىتتىڭ تالابى جانە الدا كەلە جاتقان سپورتتىق شارالارعا بايلانىستى. سەبەبى, مۇندا تامىز ايىنىڭ باسىندا جىل سايىنعى وبلىستىق «تىڭ-تسەلينا – 2017» سپارتاكياداسى مەن 2018 جىلى ەۋرازيالىق توپ كاسىپورىندارى جۇمىسكەرلەرىنىڭ اراسىندا كورپوراتيۆتىك جارىستار شەڭبەرىندە ءىى ERG سپارتاكياداسى وتەدى.
«2017 جىلعا اۋقىمدى جۇمىستار جوسپارلانعان. جۇگىرۋ جولىندا ۇزىندىعى ەكى شاقىرىمعا جەتەتىن تارتان جابىندىسى ودان دا ساپالىسىنا اۋىستىرىلۋدا. بۇدان بولەك, باسكەتبول, ۆولەيبول الاڭدارى مەن تريبۋنالارداعى بارلىق ورىندىقتار جاڭارتىلادى. جايلى پلاستيكالىق ورىندىقتارعا 1800-دەن استام سپورت جانكۇيەرى سىيىپ كەتەدى. الاۋ قۇرىلعىسىن دا جاڭعىرتۋ جوسپاردا بار. سەبەبى, وليمپيادالىق الاۋدى جاعۋ – كەز كەلگەن جارىستىڭ اجىراماس بولىگى. بيىل ءداستۇر بويىنشا سپورت اتريبۋتى قاتىسۋشىلاردى جەڭىسكە جەتۋگە شابىتتاندىراتىن بولادى», دەيدى «گورنياك» جاستار سپورت كلۋبىنىڭ ديرەكتورى ەدگار اكوپيان.
ERG ءوز قىزمەتىن باستاعان كۇننەن بەرى قازاقستانداعى سالاماتتى ءومىر سالتى مەن سپورتتى دامىتۋعا ەرەكشە كوڭىل ءبولىپ كەلەدى. جىل سايىن اكىمدىكتەرمەن جاسالعان الەۋمەتتىك ماڭىزى بار جوبالاردى جۇزەگە اسىرۋ بويىنشا ءوزارا ارىپتەستىك تۋرالى مەموراندۋمنىڭ اياسىندا سپورت جوبالارىن قولداۋعا قوماقتى قارجى بولىنەدى. سوڭعى بەس جىلدىڭ وزىندە (2012-2016 جج.) ەۋرازيالىق توپ قوستاناي وبلىسىنا 5 ملرد تەڭگە ينۆەستيتسيا قۇيعان.
«رۋدنىيداعى ءىرى سپورت نىسانىن جاڭارتۋ – ERG-ءدىڭ «تۋعان جەر – رودنىە گورودا» باستاماسىمەن قولعا الىنعان ستراتەگيالىق باعىتىنىڭ جارقىن دالەلى مەن جەمىسى. ول ەۋرازيالىق توپ كاسىپورىندارى ورنالاسقان ايماقتاردى كەشەندى تۇردە دامىتۋدى قامتاماسىز ەتۋگە ارنالعان. سونىڭ ىشىندە قوستاناي وبلىسى دا بار. اكىمدىكتەرمەن بىرلەسىپ قالا تۇرعىندارىنىڭ, ءبىزدىڭ جۇمىسشىلاردىڭ جايلى, ءارى قاۋىپسىز ءومىر ءسۇرۋى ءۇشىن قولدان كەلگەن بار شارالاردى ودان ءارى جاساي بەرەمىز», دەدى «سسكوب» اق پرەزيدەنتى بەرەكە مۇحامەتقاليەۆ.
ءنازيرا جارىمبەتوۆا, «ەگەمەن قازاقستان»