حيميالىق قارۋ قولدانۋ – حالىقارالىق قۇقىق نورمالارىن بۇزۋ

ءوزىنىڭ بايانداماسىندا ي.ناكاميتسۋ ۇيىم ميسسياسىنىڭ حيميالىق قارۋعا تىيىم سالۋدى قالىپتاستىرۋ بويىنشا اتقارعان جۇمىستارىنىڭ نەگىزگى قورىتىندىلارى تۋرالى ايتىپ بەردى. ۇسىنىلعان ەسەپتە وتكەن جىلدىڭ 15-16 قىركۇيەگىندە سيريانىڭ ۋمم-حوش اۋدانىنا شابۋىل بارىسىندا جانە ۇستىمىزدەگى جىلدىڭ 4 ساۋىرىندە حان شەيحۋندەگى سوڭعى كيكىلجىڭ كەزىندە حيميالىق قارۋ قولدانىلعانى تۋرالى ايعاق كولدەنەڭ تارتىلدى. وسىعان وراي, بۇۇ-نىڭ جوعارى وكىلى بۇل ارەكەتتەردىڭ حالىقارالىق قۇقىق نورمالارىن ورەسكەل بۇزۋ بولىپ تابىلاتىنىن جانە ەشقانداي اقتاۋعا جاتپايتىن قادام سانالاتىنىن اتاپ كورسەتتى.  قازاقستان دەلەگاتسياسى ميسسيا قىزمەتىنىڭ قورىتىندىلارىنا سىلتەمە جاساي وتىرىپ, حيميالىق قارۋ قولدانۋ سيرياداعى شەشىمىن تاپپاي كەلە جاتقان اسا كۇردەلى ماسەلەلەردىڭ ءبىرى بولىپ قالىپ وتىرعانىن جاريا ەتتى. وسىنداي اۋىر دا قاۋىپتى حيميالىق زاتتار قولدانۋ ۇلكەن قىلمىس بولىپ تابىلاتىنىن جانە مۇنى ايىپتاي كەلە, قازاقستان اتالعان وقيعانى جان-جاقتى جانە شىنايى زەرتتەپ, كىنالىلەردى جاۋاپكەرشىلىككە تارتۋعا شاقىردى. وسىعان وراي قازاقستاننىڭ بۇۇ-داعى تۇراقتى وكىلى قايرات وماروۆ ي.ناكاميتسۋ حانىم حيميالىق قارۋدى قولدانۋدى تەكسەرۋ جونىندەگى بىرلەسكەن  باسقارۋشى توپتىڭ جەتەكشىسى ەدمۋند مۋلەمەن بىرلەسىپ, سيريادا وبەكتيۆتى تەكسەرۋ جۇرگىزۋ ءۇشىن قولدان كەلگەن مۇمكىندىكتىڭ ءبارىن قولدانادى دەگەن سەنىم ءبىلدىردى.  اتالعان پروبلەمالى ماسەلە بو­يىنشا اتقارىلعان جۇمىستار تۋرالى ۇسىنىلعان ەسەپتى تىڭداي كەلىپ, قاۋىپسىزدىك كەڭەسى مۇشەلەرىنىڭ باسىم بولىگى ميسسيا قىزمەتىن جالعاستىرۋ كەرەك دەگەن ۇستانىم ءبىلدىردى جانە سيريادا حيميالىق قارۋ قولدانۋعا قاتىستى تەكسەرۋدە تولىق ناتيجەگە قول جەتكىزىلەتىنىنە ءۇمىت ارتتى.