باياناۋىلدىڭ مايقايىڭ كەنتىندە 9 مىڭداي حالىق تۇرسا, 3-مىڭدايىن ەلگە ورالعان قانداستارىمىز قۇراپ وتىر. اعايىنداردىڭ ورتاعا كەلۋى – كەنت تىرلىگىنە رۋحاني وزگەرىس اكەلىپ, مەكتەبىندە بالا سانىن كوبەيتىپ, مادەني ءومىرى دە جايناپ سالا بەردى. وزدەرى الىستان اڭساپ جەتكەندە بوتەن اتاۋلاردىڭ جۇرەكتەرىن اۋىرتىپ, قانشاما جىل ءمانىن تۇسىنە الماي ءجۇردى. سوندىقتان, كەنت اكىمدىگى كوشەلەردىڭ اتاۋىن اۋىستىرۋ جونىندەگى ۇسىنىستارعا وراي, بارلىق تۇرعىندارمەن كەزدەسۋلەر وتكىزدى. قازاق جەرىندە, قازاق ەلىندە تۇرىپ وتكەننەن قالعان قىزىل اتاۋلارمەن ءومىر ءسۇرۋدىڭ ۋاقىتى ءوتتى.
ەندى كەنتتىڭ كوشەلەرىندە بالەنباي جىل ءومىر سۇرگەن بۇل قىزىل اتاۋلاردىڭ ورنىنا ەندى شاكىر كەنجەباەۆ اتىنداعى, دوستىق, تاۋەلسىزدىك جانە كەنشى دەگەن تۋعان اتاۋلار بەرىلەدى. مىسالى, شاكىر كەنجەباەۆ اعامىز كەزىندە "مايقايىڭ-التىن" كەن-بايىتۋ كومبيناتىندا كوپ جىل ەڭبەك ەتكەن كەنشى. سونىمەن بىرگە, لەنين, سپورتيۆنايا, لەرمونتوۆ, م.گوركي, ر.ليۋكسەمبۋرگ, تەلمان, جيلپلوششادكا كوشەلەرى – استانا, سارىارقا, باياناۋىل, بايتەرەك دەپ جاڭارىپ, جاڭعىرادى.
ءسويتىپ, رۋحاني ويانعان, ەلىم, جەرىم دەگەن تۇرعىنداردىڭ كوشە اتاۋلارىن اۋىستىرۋ بويىنشا وسىنداي ءورشىل ۇسىنىستارى اۋدان اكىمدىگىنە جىبەرىلدى. اۋدان باسشىسىنىڭ قاۋلىسى شىققان سوڭ وبلىستىق ونوماستيكالىق كوميسسيا قارايدى. ونوماستيكالىق كوميسسيا ءبىزدىڭ قازاقتىڭ سارىارقا, استانا, بايتەرەك, تاۋەلسىزدىك دەگەن ۇلى ۇعىمدارىنا جارقىراتىپ جول اشىپ بەرەرى ءسوزسىز. كەنت اكىمدىگىنىڭ حابارىنا قاراعاندا, قازىر قۇجاتتاردى راسىمدەۋ جۇمىستارى باستالدى. ولاي بولسا, الداعى جاز ايىنداعى مەرەكەلەردىڭ بىرىندە جاڭارعان, جاڭعىرعان كوشە اتاۋلارىنىڭ قۋانىشىن بىرگە اتاپ وتەمىز, -دەيدى تۇرعىندار.
فاريدا بىقاي
«ەگەمەن قازاقستان
پاۆلودار وبلىسى,