جاقىندا عانا الماتى وبلىسى الاكول اۋدانى ىنتالى اۋىلىنىڭ 38 جاسار تۇرعىنى رىسبەك بۇعىسەل ۇلى تۇتقيىل ۇستاعان جۇرەك تالماسىنان قايتىس بولعان ەدى.
قولىندا كارى اناسى بار, تابان ەت, ماڭداي تەرىمەن ەڭبەك ەتىپ, ۇلكەن ءبىر شاڭىراقتى اسىراپ وتىرعان ارىستاي ازاماتتىڭ اياق استىنان كەلگەن قازاسى ارينە اۋىلىمىزعا, اسىرەسە مارقۇمنىڭ وتباسى, تۋىس-تۋعاندارىنا وڭاي تيگەن جوق.
تورقالى توي بولىپ, توپىراقتى ءولىم شىققان وتباسىنا تايلى-تاياعى قالماي جينالىپ, شارۋاسىنا كومەكتەسىپ, كوڭىل جاردەم, قول جاردەمىن ايامايتىن اۋىل ادامدارى بۇل جولى دا جوسىننان جاڭىلعان جوق. ءتىرى ادامعا تىرشىلىك. قاسيەتتى رامازان ايىنىڭ العاشقى كۇندەرىمەن ارالاسا كەلگەن ەگىن ەگۋ, جەر جىرتۋ جۇمىسى كەزىندە مادەنبەك, بۇلعىنبەك, مۇقيات باستاعان اۋىل ازاماتتارى باس بولىپ تەمىر تەحنيكانى ەڭ الدىمەن رىسبەك مارقۇمنىڭ جەرىنە سالدى. 30-دان اسا ادام مەن 20 شاقتى تەحنيكانىڭ كۇشى جۇمىلدىرىلىپ, جەرىن جىرتىپ, تۇقىمىن سەۋىپ بەردى. «تىرلىكتىڭ ديىرمەنىن بىرلىك تارتادى» دەگەن وسى.
ء«بىز ەجەلدەن قارالى ۇيگە قارايلاسقان قازاقپىز عوي, كىمنىڭ باسىندا قانداي جاعداي بولادى, اللا بىلەدى. وسىنداي جاعدايدا ءبىر-ءبىرىمىزدىڭ قاسىمىزدان تابىلىپ, سەپتەسپەسەك ءبىر اۋىل بولىپ وتىرعانىمىزدىڭ قانداي پايداسى بار؟» دەيدى اۋىل تۇرعىنى بۇلعىنبەك قوجاقاپان ۇلى.
بۇل – بەرەكە! ەندى ءبىر جاعىنان جىلاعاندى جۇباتىپ, جىعىلعاندى سۇيەيتىن اتا ءداستۇر, ارداقتى سالتىمىز. ەشقانداي اكىمشىلىكتىڭ ارنايى ۇيىمداستىرۋىنسىز-اق اپتاپ ىستىقتا اتىز باسىنا كەلگەن اۋىل ادامدارىنىڭ كوپشىلىگىنىڭ اۋىزدارى ورازا. قاشاندا ۇلكەنگە قۇرمەت, كىشىگە ىزەت جاساپ جۇرەتىن اق كوڭىل, اشىق جارقىن ازاماتتىڭ اعايىن تۋىسىنىڭ باسىنا تۇسكەن قارا تاۋداي قايعىسىن ءبولىسىپ, تىرلىگىنە سەپتەسكەن بۇل قايرىمدىلىق شارا, ساۋاپتى ىستەرى كوپكە ۇلگى بولسا كەرەك.
قادىرسۇلتان نۇسىپقان
الاكول اۋدانى ىنتالى اۋىلى