پرەمەر تمد ەلدەرى ۇكىمەت باسشىلارى كەڭەسىنىڭ وتىرىسىنا قاتىستى

شاعىن فورماتتا وتكەن وتىرىستا ۇكىمەتتەردىڭ باسشىلارى يننوۆاتسيالار, اتوم ەنەرگياسى, كولىك قاۋىپسىزدىگى, گەودەزيا, راديوناۆيگاتسيا, كونترافاكتىلىك ونىمدەردى شىعارۋعا قارسى ءىس-قيمىل, سونىمەن قاتار زياتكەرلىك مەنشىكتى قورعاۋ سالالارىنداعى ىنتىماقتاستىقتى جانداندىرۋ ماسەلەلەرىن تالقىلادى.  قاتىسۋشىلار كەڭ فورماتتا جالعاسقان كەڭەس جۇمىسىندا قازاقستاندىق ماتەريالتانۋ توقاماعى بازاسىنداعى تاجىريبەلىك كەشەندى بىرلەسىپ پايدالانۋ تۋرالى كەلىسىمدى, سونىمەن قاتار 2017-2019 جىلدارعا ارنالعان حالىقارالىق تاسىمالدار كەزىندە تمد-عا مۇشە مەملەكەتتەردىڭ اۋماعىندا كولىك قاۋىپسىزدىگى ستراتەگياسىن ىسكە اسىرۋ جونىندەگى ءبىرىنشى كەزەكتەگى شارالار جوسپارىن تالقىلادى.  تمد ەلدەرىنىڭ ۇكىمەت باسشىلارى كەڭەسىنىڭ قورىتىندىسى بويىنشا بىرقاتار قۇجاتتارعا, اتاپ ايتقاندا مەملەكەتارالىق يننوۆاتسيالىق ىنتىماقتاستىق باعدارلاماسىن ىسكە اسىرۋ بويىنشا 2017-2019 جىلدارعا ارنالعان ءىس-شارالار كەشەنى تۋرالى قۇجاتقا, اتوم ەنەرگياسىن بەيبىت ماقساتتا پايدالانۋ سالاسىنداعى نورماتيۆتىك-قۇقىقتىق جانە نورماتيۆتىك-تەحنيكالىق رەتتەۋ, سايكەستىكتى باعالاۋ, ستاندارتتاۋ, اككرەديتتەۋ جانە مەترولوگيالىق قامتاماسىز ەتۋ بويىنشا تاسىلدەردى ۇيلەستىرۋ تۋرالى كەلىسىمگە قول قويىلدى.  بۇدان وزگە, كونترافاكتىلىك ءونىم وندىرۋگە جانە تاراتۋعا قارسى ءىس-قيمىل سالاسىنداعى ىنتىماقتاستىق تۋرالى كەلىسىمگە, زياتكەرلىك مەنشىكتى قۇقىقتىق قورعاۋ جانە ساقتاۋ سالاسىندا ىنتىماقتاستىق ورناتۋ جانە زياتكەرلىك مەنشىكتى قۇقىقتىق قورعاۋ جانە ساقتاۋ ماسەلەلەرى جونىندەگى مەملەكەتارالىق كەڭەس قۇرۋ تۋرالى كەلىسىمگە وزگەرىستەر ەنگىزۋ تۋرالى حاتتاماعا قول قويىلدى.  سونداي-اق, تمد ەلدەرىنىڭ مەملەكەتارالىق رادياتسيالىق باعدارلاماسى جانە تمد مەملەكەتتەرى باسشىلارى كەڭەسىنىڭ 2016 جىلعى 16 قىركۇيەكتەگى تمد ەكونوميكالىق سوتى تۋرالى شەشىمىن ىسكە اسىرۋعا قاتىستى قۇجاتتارعا قول قويىلدى.