ول فورۋم اياسىنداعى وي-پايىمدار ءوزارا قارىم-قاتىناستى جاقسارتۋعا, ال ۇنقاتىسۋلار پلاتفورماسى پىكىرلەر مەن يدەيالار الماسۋعا, تاريحي جانە مادەني اسپەكتىلەر بويىنشا ناقتى تۇجىرىمدامالاردى ازىرلەۋگە ىقپال ەتەتىنىنە سەنىم ءبىلدىردى.
«مۇنداي فورۋمدار وتە ماڭىزى ءارى وزەكتى دەپ ويلايمىن. نەگە؟ سەبەبى, وسى تەكتەس جيىندار عالىمداردىڭ ءبىر-بىرىمەن ىقپالداستىق ورناتۋىنا, بۇگىنگى تاڭدا وتە وزەكتى بولىپ تۇرعان ماسەلەلەر بويىنشا پىكىرتالاس ۇيىمداستىرۋعا سەپ بولادى. بۇل – وتە ماڭىزدى. ءبىز ءوزىمىزدىڭ باستاۋىمىزدى قايدان العانىمىزدى جانە قازىر كىم ەكەنىمىزدى ءبىلۋىمىز ءۇشىن ءجۇرىپ وتكەن جولىمىزدى سارالاپ, ەكشەپ وتىرعانىمىز ءجون. قازاقستان پرەزيدەنتى نۇرسۇلتان نازارباەۆ ءاردايىم مادەني مۇرا مەن قۇندىلىقتارعا نەگىزدەلگەن جارقىن بولاشاقتى قۇرۋعا ايرىقشا ماڭىز بەرىپ كەلەدى. ماسەلەن, ماعان نۇرسۇلتان ءابىش ۇلىنىڭ «بولاشاققا باعدار: رۋحاني جاڭعىرۋ» ماقالاسىندا ايتقان ويلارى ۇنادى. قازاقستان پرەزيدەنتى ۇلت دامۋىنداعى فۋندامەنتالدى تۇجىرىمدامانىڭ وزەگى ساياسي-ەكونوميكالىق جاڭعىرۋعا نەگىزدەلۋى كەرەك ەكەنىن ايتتى. الايدا, ءبىز مادەنيەتكە جانە ۇلتتىق بىرتەكتىلىك ماسەلەلەرىنە دە ايرىقشا كوڭىل بولمەسەك, وندا جاڭعىرۋ ۇدەرىسى دە ءوز دەڭگەيىندە جۇرمەيتىنىن ۇمىتپاۋىمىز كەرەك. مەن نۇرسۇلتان نازارباەۆتىڭ ءبىزدىڭ ءوز وتكەنىمىزدى, وركەنيەتىمىزدى تانىپ-بىلمەي, جاڭعىرۋدىڭ جاي ءسوز كۇيىندە قالاتىنى توڭىرەگىندە ايتقان ويىن دا قۇپتايمىن. جاھاندانۋ زامانىندا بارلىق وركەنيەتتەر ءبىر-بىرىمەن بايلانىس ورناتا وتىرىپ, قوزعالىستا بولۋى كەرەك. بۇل ارقايسىمىزدىڭ باسەكەگە قابىلەتتى بولۋىمىزعا دا سەپ بولارى انىق. دەمەك, ءبىز جاڭعىرۋ تۋرالى ايتقاندا وسىنى ەسكەرۋىمىز كەرەك», – دەدى م. سۋمرو. سونداي-اق, ول كۇن تارتىبىندە تۇرعان ماسەلەلەردى تالاي جىلداردان بەرى ەرەكشە قاستەرلەپ كەلگەن قۇندىلىقتاردان بولە-جارا قاراستىرۋعا بولمايتىنىن, ول ءۇشىن زەرتتەۋشىلەرگە, ونىڭ ىشىندە تاريحشىلارعا عىلىم مەن تەحنولوگيانىڭ دامۋىن تەجەيتىن فاكتورلارعا تەرەڭ, ءارى جان-جاقتى بويلاپ, ساراپتاما جۇرگىزۋ ءۇشىن ۇلكەن مۇمكىندىك بەرۋ قاجەتتىگىن اتاپ ءوتتى.
بۇعان قوسا, مانزۋر حۋسەين سۋمرو قازاقستاندى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋىمەن قۇتتىقتادى. «بۇل – جالپى ءوڭىر ءۇشىن وتە جاقسى جاڭالىق. ال ءبىز, عالىمدار رەتىندە عالامدىق جانە وڭىرلىك دامۋ اياسىنداعى ماسەلەلەردى تالداپ, تالقىلاۋعا, سارالاۋعا اتسالىسۋىمىز كەرەك», – دەدى بۇل جونىندە ەكونوميكالىق ىنتىماقتاستىق ۇيىمى عىلىم قورىنىڭ (ەسو Science Foundation) پرەزيدەنتى.
«ەسو Science Foundation» – مەملەكەتارالىق ۇيىم. ونىڭ قۇرامىندا 10 مەملەكەت بار. قازاقستان دا سول ەلدەردىڭ قاتارىندا تۇر. پاكىستاننىڭ يسلامابادىندا ورنالاسقان ۇيىم نەگىزىنەن عىلىم, تەحنولوگيا, يننوۆاتسيا ماسەلەلەرىن نازاردا ۇستاپ وتىرادى.
ءلايلا ەدىلقىزى, «ەگەمەن قازاقستان»