فۋتبول فۋتبولدان قازاقستان كۋبوگى جولىنداعى جارىستىڭ ءبىرىنشى جارتىلاي فينالدىق ويىندارى ءوتتى. شىمكەنتتىڭ «ورداباسى» كلۋبى ءوز الاڭىندا «قايراتپەن» 0:0 ەسەبىمەن تەڭ ءتۇستى. بۇل كەزدەسۋدە «قايراتتىڭ» قورعاۋشىسى ەلدوس احمەتوۆ ورەسكەل ويىنى ءۇشىن 74-مينۋتتا الاڭنان قۋىلدى. ال ءوز الاڭىندا «اتىراۋدى» قابىلداعان قاراعاندىنىڭ «شاحتەرى» 1:0 ەسەبىمەن جەڭىسكە جەتتى. ويىن تاعدىرىن شەشكەن جالعىز گولدى ماتچتىڭ 25-مينۋتىندا «كەنشىلەردىڭ» شابۋىلشىسى داۋرەنبەك تاجىمبەتوۆ سوقتى. جارتىلاي فينالدىڭ قارىمتا ويىندارى 21 ماۋسىم كۇنى وتەدى. ۆەلوسپورت مامىر ايىنىڭ 28-ءى كۇنى الماتىدا ءداستۇرلى ۆەلوشەرۋ وتەدى. وسىمەن بەسىنشى رەت ۇيىمداستىرىلىپ وتىرعان بۇل سپورتتىق شارادا ۆەلوشاباندوزدار 10 شاقىرىم قاشىقتىق بويىنشا كۇش سىنايدى. شەرۋ ءال-فارابي داڭعىلىنان باستالىپ, م.گوركي اتىنداعى دەمالىس ساياباعىندا مارەسىنە جەتەدى. ۆەلوشەرۋ اياقتالعان سوڭ شاعىن كونتسەرت ۇيىمداستىرىلىپ, جانكۇيەرلەر اراسىندا باعالى سىيلىقتار ويناتىلادى. شوگەن كەشە گەرمانيانىڭ ميۋنحەن قالاسىندا شوگەن سپورتىنان «Munich Gold Cup-2017» حالىقارالىق ءتۋرنيرى باستالدى. الەمنىڭ ەڭ مىقتى شوگەنشىلەرى باق سىنايتىن بۇل باسەكەدە قازاقستاننان قوس كوماندا – «Astana Polo Club» جانە «Almaty Polo Club» ۇجىمدارى ونەر كورسەتەدى. اۆتوراللي ماڭعىستاۋدا «راللي قازاقستان-2017» ءتۋرنيرىنىڭ ءتورتىنشى كەزەڭى اياقتالدى. FIA حالىقارالىق اۆتوموبيل فەدەراتسياسى رەيدىنىڭ رالليدەن الەم كۋبوگىنىڭ بەسىنشى كەزەڭىنە جاتاتىن بۇل جارىستا قاتاردىڭ ناسسەر ءال-اتتيا باستاعان ەكيپاجى ءبىرىنشى كەلدى. Aktau Motorsport كومانداسىنىڭ ەكيپاجى اتالعان كەزەڭدە ءتاۋىر ونەر كورسەتىپ, ءوزىنىڭ وسى تۋرنيردەگى جالپى ناتيجەسىن جاقسارتىپ الدى.
ازىرلەگەن قايرات جۇنىس ۇلى