اقتاۋ تۇرعىندارى وبلىستىق سوتتى «العىس حاتپەن» ماراپاتتادى

2013 جىلى «اقتاۋ قالاسىنىڭ مەديتسينالىق كوللەدجى» مەن «الفا-تۋر اكتاۋ» جشس اراسىندا قۇرىلىس جۇمىسىن جۇرگىزۋ تۋرالى كەلىسىم-شارت جاساقتالادى. كەلىسىم-شارت نەگىزىندە قۇرىلىس كومپانياسى ەمحانا, مەدكوللەدج, سپورت كەشەنى مەن تۇرعىن ءۇي سالۋعا كىرىسەدى. تۇرعىن ءۇي قۇرىلىسىن سالۋ كەزىندە ەكى اراداعى كەلىسپەۋشىلىك تۋىندايدى دا, داۋدا ۇلەسكەرلەر زارداپ شەگەدى. ءوز ەسەبىنەن تۇرعىن ءۇي سالعان سەرىكتەستىك جەكە تۇلعالارمەن پاتەر ساتۋ-ساتىپ الۋ تۋرالى كەلىسىم-شارتتارعا وتىرىپ, ۇلەسكەرلەر قۇرىلىس نىساندارىن قارجىلاندىرىپ كەلگەن. الايدا, جەر پايدالانۋشى مەن باس مەردىگەر اراسىندا كەلىسپەۋشىلىكتەر سالدارىنان كوللەدج ديرەكتورى مەن سەرىكتەستىك اراسىنداعى كەلىسىمشارت بۇزىلىپ, نىسان قۇرىلىسىن جۇرگىزگەن سەرىكتەستىك اكىمشىلىك جاۋاپكەرشىلىككە تارتىلىپ, عيماراتتىڭ قۇرىلىس-مونتاجداۋ جۇمىستارى اياقتالماي قالادى. ناتيجەسىندە, تۇرعىن ۇيلەر سالىنىپ بىتكەنىمەن, پايدالانۋعا قابىلدانباعاندىقتان جانە كوممۋنيكاتسيالىق جەلىلەر تارتىلماعاندىقتان, پاتەر يەلەرى بەلگىلەنگەن مەرزىمدە ۇيلەرىنە كىرە الماي قالادى.   قۇرىلىس جۇمىسىن سوڭىنا دەيىن جەتكىزە الماعان باس مەردىگەر ورتاق پايدالانۋعا بەرىلگەن جەر ۋچاسكەسىندەگى ءوز ۇلەسىن انىقتاۋ تۋرالى جەر پايدانالۋشىعا قارسى سوتقا تالاپ ارىزبەن جۇگىنەدى. سوت پروتسەسى باستالعان سوڭ ۇلەسكەرلەر دە سوتقا جۇگىنىپ, ورتاق ۇلەستەگى جەرلەرىن ءبولىپ, انىقتاپ بەرۋدى, ءوز مىندەتتەرىن اتقارىپ, تۇرعىن ءۇي ماسەلەسىن بارلىق جاققا ءتيىمدى ەتىپ شەشۋدى سۇرايدى.  ۇزاق مەرزىمگە سوزىلعان سوت وتىرىسى ءۇش تاراپتىڭ مەدياتيۆتىك كەلىسىمگە كەلۋىمەن اياقتالىپ, ەكى تاراپ ءوزارا ءتيىمدى شەشىمگە كەلسە, ءۇشىنشى تاراپ – ۇلەسكەرلەر تۇرعىن ءۇي كەشەنىنىڭ تەحنيكالىق قۇجاتتارىن جاساپ, كوممۋنالدىق جەلىلەردىڭ تارتىلۋىنا قول جەتكىزدى. سەبەبى, سوت پروتسەسىن جۇرگىزگەن سۋديا جاس بولسا دا كاسىبي بىلىكتىلىگىن تانىتىپ, ءۇش تاراپقا دا ءتيىمدى شەشىم شىعارۋدىڭ جولىن قاراستىرىپ, دۇرىس باعىت-باعدار بەرۋىنىڭ ارقاسىندا تاراپتار مەدياتوردىڭ كومەگىنە جۇگىنگەن ەدى. وسىلايشا, داۋ سوڭى كەلىسىممەن اياقتالدى. سوت ۇيعارىمى زاڭدى كۇشىنە ەنگەننەن سوڭ ۇلەسكەرلەردەن, «اقبۇلاق» تۇرعىن-ءۇي كەشەنى تۇرعىندارى اتىنان قازاقستان رەسپۋبليكاسى جوعارعى سوتىنىڭ توراعاسى ق.ءماميدىڭ اتىنا العىس حات كەلىپ ءتۇستى.  «سوت شەشىمى قوردالانعان ماسەلەنىڭ ءتۇيىنىن بارلىق جاققا ءتيىمدى ەتىپ شىعارىپ, ۇلەسكەرلەر اراسىنداعى الەۋمەتتىك تولقۋدى دەر كەزىندە باستى. سەبەبى, ءبىز بار جيعان-تەرگەنىمىزدى سالىپ وتىرعان جالعىز باسپانامىزدان ايىرىلعان جاعدايدا ەڭ اقىرعى ارەكەتكە بارۋعا دايىن تۇر ەدىك. سوندىقتان, ماسەلەنىڭ بايىبى مەن ونىڭ سالدارىن ءتۇسىنىپ, قاراپايىم ادامداردىڭ زاڭدى قۇقىعىن قورعاپ, سۋدياعا ءتان بىلىكتىلىگىمەن, كاسىبي شەبەرلىگىمەن سىيلاستىق پەن ىزەتتىك تانىتقانى ءۇشىن, ءادىل شەشىم شىعارعانى ءۇشىن ماڭعىستاۋ وبلىستىق سوتىنىڭ توراعاسى ج.الانوۆقا جانە وسى ءىستى اياعىنا دەيىن قاراعان ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ سۋدياسى ا.بەكبولاتوۆقا العىس بىلدىرەمىز» دەلىنگەن حاتتا.  «اق بۇلاق» تۇرعىن ءۇي كەشەنى تۇرعىندارى ءۇش تاراپتى دا ريزا ەتكەن جان-جاقتى, ساۋاتتى سوت شەشىمىنە ريزا.  گۇلايىم شىنتەمىرقىزى,  «ەگەمەن قازاقستان».  اقتاۋ