وتاندىق كاسىپكەرلەردىڭ ءتول مەرەكەسى يندۋستريالاندىرۋ كۇنىنە وراي ۇيىمداستىرىلىپ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قاتىسۋىمەن ءوتىپ جاتقان جالپىۇلتتىق تەلەكوپىر بارىسىندا ەكىباستۇز - ءشۇلبى سۋ ەلەكتر ستانساسى - وسكەمەن قۋات جەتكىزۋ جەلىسىنىڭ شىعىس قازاقستانداعى جاڭا بولىگى ىسكە قوسىلدى.
«اسا قۇرمەتتى نۇرسۇلتان ءابىش ۇلى! ءسىزدىڭ تاپسىرماڭىزعا سايكەس, KEGOC كومپانياسى «نۇرلى جول» باعدارلاماسى اياسىندا 500 كۆ-تىق سولتۇستىك-شىعىس-وڭتۇستىك ەلەكتر ەنەرگياسىن تاسىمالداۋ ترانزيتىنىڭ قۇرىلىسىن جۇرگىزۋدە. وسى جوبانىڭ ءبىرىنشى كەزەڭى 700 شاقىرىم ەكىباستۇز-سەمەي-وسكەمەن ەلەكتر جەلىلەرى مەن 500 كۆ-تىق سەمەي قوسالقى ستانتسياسى جانە دە ءۇش قوسالقى ستانتسيالارىن كەڭەيتۋ جۇمىستارى مەرزىمىنەن ءبىر جىل بۇرىن, ەلىمىزدىڭ 25 جىلدىق تاۋەلسىزدىگىنە وراي اياقتالدى. جوبا شىعىس قازاقستان وبلىسىن ەلەكتر ەنەرگياسىمەن جابدىقتاۋ سەنىمدىلىگىنە, ءوڭىردىڭ ەكونوميكاسىنىڭ دامۋىنا جانە جالپى قازاقستاننىڭ ەنەرگەتيكالىق تاۋەلسىزدىگىن ارتتىرۋعا ىقپال ەتەدى. قۇرمەتتى نۇرسۇلتان ءابىش ۇلى! وسى جوبانىڭ 1 كەزەڭىن ىسكە قوسۋعا رۇقسات ەتىڭىز!» - دەدى «KEGOC» اكتسيونەرلىك قوعامىنىڭ باسقارما توراعاسى باقىتجان قاجيەۆ.
ءوز كەزەگىندە تەلەكوپىر بارىسىندا ەلباسى نۇرسۇلتان نازارباەۆ بۇل جوبانى ىسكە قوسۋعا رۇقسات بەردى.