استانادا وتاندىق كاسىپكەرلەردىڭ ءتول مەرەكەسى يندۋستريالاندىرۋ كۇنىنە وراي ۇيىمداستىرىلىپ, قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ قاتىسۋىمەن ءوتىپ جاتقان جالپىۇلتتىق تەلەكوپىر بارىسىندا اقتوبە وبلىسىندا تۇرعىن ءۇي قۇرىلىسىن دامىتۋعا نەگىزدەلگەن كاسىپورىن ىسكە قوسىلدى. بۇل وندىرىسكە 3 ملرد. تەڭگەگە جۋىق قارجى ينۆەستيتسيالانعان. سونىمەن قاتار زاۋىتتان شىققان ءونىم قۇرىلىستىڭ وزىندىك قۇنىن 15-20 پايىزعا تومەندەتەدى دەپ جوسپارلانۋدا.
جاڭادان سالىنعان كومبيناتقا گەرمانيالىق «Wekcenmann» كومپانياسىنىڭ ۇزدىك جابدىقتارى ورناتىلعان. «ءۇي قۇرىلىسى كومبيناتى» جشس-نىڭ قۇرىلتايشىسى نۇركەن تۇرباەۆتىڭ ايتۋىنشا, اتالعان كومبينات قۇرىلىس مەرزىمىن ەكى ەسەگە قىسقارتادى. اتاپ ايتقاندا, ءبىرىنشى كەزەڭدە كاسىپورىن جىلىنا 50 مىڭ شارشى مەتر باسپانانى تۇرعىزۋعا مۇمكىندىك بەرەدى.
«بۇل ءوندىرىستى ىسكە قوسۋ وتە ماڭىزدى. وسى ورايدا اقتوبە قازاقستاننىڭ ەڭ دامىعان مەگاپوليستەرىنىڭ ءبىرى بولۋى ءتيىس. سوندىقتان تۇرعىن ءۇي قۇرىلىسىنا نازار اۋدارىلۋدا جانە وسى باعىتقا قارجى ءبولىنىپ جاتىر. قالانىڭ جانىندا جاڭا شاعىن اۋدان سالىنىپ جاتىر. سونىمەن قاتار بۇعان دەيىن ەسكەرتكەنىمدەي, بىرتەكتەس, تارتىمسىز ۇيلەردى ەمەس, ساۋلەتتى ءارى ادەمى نىسانداردى سالىڭىزدار. كومبينات جۇمىسى تابىستى بولۋىن تىلەيمىن», - دەدى مەملەكەت باسشىسى نۇرسۇلتان نازارباەۆ.