بۇگىن ەلباسى نۇرسۇلتان نازارباەۆتىڭ قاتىسۋىمەن ءوتىپ جاتقان جالپىۇلتتىق تەلەكوپىر بارىسىندا الماتىدا اياق كيىم شىعاراتىن فابريكا جۇمىسى ىسكە قوسىلدى. «كازلەگپروم-الماتى» جشس-نىڭ يتالياندىق تەحنولوگيا بويىنشا سۇرىپتاماسى كەڭ اياق كيىم ءوندىرىسىن قولعا العان. اتالعان جوبانىڭ قۇنى - 300 ملن تەڭگە. فابريكا جىلىنا 150 مىڭ جۇپ اياق كيىم شىعارۋدى جوسپارلاپ وتىر.
«ءوزىمىزدىڭ جەڭىل ونەركاسىپتى قولداۋ كەرەكتىگىن ۇنەمى ايتىپ ءجۇرمىن. فابريكالارىڭدا بولدىم. جاڭادان ءوندىرىس شىعارادى دەگەننەن كەيىن جينالىسقا سەندەردىڭ كوستيۋمدارىڭدى كيىپ كەلدىم. اياق كيىمدەرىڭدى دە ساتىپ الدىم. قازىر اياعىمدى كوتەرىپ, كورسەتە المايمىن. سەندەردىڭ اياق كيىمدەرىڭدى كورىپ وتىرمىن. وسىندا وتىرعان جۇرتشىلىققا, قازاقستاندىقتارعا ءوزىمىزدىڭ جەڭىل ونەركاسىپتى قولداۋ ءۇشىن ءوز تاۋارلارىمىزدى ساتىپ الۋعا شاقىرامىن. ارى قاراي وسىنى ءوندىرىپ, باسەكەگە ساي بولىپ, فرانتسۋزداردان دا, يتالياندىقتاردان دا كەم شىعارمايتىن بولىڭدار», - دەدى نازارباەۆ.
«كازلەگپروم-الماتى» جشس-نىڭ ديرەكتورى ايبەك بەكتۇرعانوۆتىڭ ايتۋىنشا, بۇل فابريكا پرەزيدەنتتىڭ وتكەن جىلى الماتىعا ساپارى بارىسىندا بەرگەن تاپسىرماسى نەگىزىندە اشىلعان جانە ول قازاقستاندىق اياق كيىم نارىعىنداعى يمپورتتى الماستىرۋدى قامتاماسىز ەتەدى.
اسحات رايقۇل, "ەگەمەن قازاقستان".