«سامۇرىق-قازىنا» قورى ءوز قۇرامىنداعى «ەير استانا», «قازاقتەلەكوم», «قازاتومونەركاسىپ», «قتج», «قازمۇنايگاز», «سامۇرىق-ەنەرگو», «قازپوشتا» كومپانيالارىنىڭ اكتسيالارىن ساتىلىمعا شىعارماق. بۇل تۋرالى بۇگىن ۇكىمەت وتىرىسىندا قور باسشىسى ومىرزاق شوكەەۆ حابارلادى.
ونىڭ ايتۋىنشا, كومپانيانىڭ نەگىزگى اكتيۆتەرى IPO ارقىلى ساتىلادى. بۇل شەشىمدى مەملەكەت باسشىسى قولدادى.
IPO-عا ءبىرىنشى بولىپ, «ەير استانا», «قازاقتەلەكوم», «قازاتومونەركاسىپ» كومپانيالارى شىعادى. «ەير استانا» كومپانياسى IPO-نى نارىقتىڭ دامۋىنا قاراي, 2017 جىلدىڭ سوڭىندا نەمەسە 2018 جىلدىڭ باسىندا وتكىزۋدى جوسپارلاۋدا. ناتيجەسىندە كومپانيا قولىندا داۋىس بەرۋشى اكتسيانىڭ 25+1 پاكەتى قالادى. اكتسيانىڭ 51 پايىزى قازاقستاندىق ينۆەستورلاردىڭ قولىندا قالۋى ءتيىس دەگەن شەشىم شىعارىلدى. «قازاقتەلەكوم» كومپانياسى - ول قازىردىڭ وزىندە 49 پايىزعا جەكە مەنشىكتە.
ءبىز كومپانيانى IPO-عا كەلەسى جىلدىڭ سوڭىندا دايىنداۋدى كوزدەپ وتىرمىز. «قازاتومونەركاسىپ» كومپانياسىنىڭ IPO باعدارلاماسى 2018 جىلى وتەدى دەپ مەجەلەنۋدە جانە ونىڭ 25 پايىز اكتسياسى ساتىلادى. «قازمۇنايگاز» كومپانياسىنىڭ IPO-سى دا 2018 جىلدىڭ باسىندا وتەدى جانە 25 پايىز اكتسياسى ساۋداعا شىعادى. «سامۇرىق-ەنەرگو» كومپانياسىنىڭ IPO-سى 2019 جىلى قۋاتتىلىق نارىعى تولىق كۇشىنە ەنگەن كەزدە وتەدى.
ساتىلىم كولەمى اكتسيانىڭ 25 پايىزى دەپ قاراستىرىلۋدا. اكتسيانىڭ 51 پايىزى ساۋداعا شىعارىلۋى ىقتيمال. «قازپوشتا» IPO-نى 2019 جىلى 49 پايىزعا دەيىن وتكىزۋى مۇمكىن. «قازاقستان تەمىرجولى» كومپانياسى جاڭعىرتۋدان كەيىن IPO-نى 2020 جىلى وتكىزۋدى جوسپارلاۋدا. اكتسيانىڭ ساتىلىمعا شىعاتىن كولەمى - 25-49 پايىز.
"سونىمەن قاتار ءبىز قوردىڭ ەندى عانا ءوسىپ كەلە جاتقان اكتيۆتەرى «قازاق ەير» مەن «تاۋ-كەن سامۇرىق» كومپانيالارىن ساۋداعا شىعارامىز", - دەدى ول. ونىڭ ايتۋىنشا, جەكەشەلەندىرۋگە جاتاتىن قور اكتيۆتەرىنىڭ تىزىمىندە 217 نىسان بار, ونىڭ ءىرى اكتيۆتەر كورسەتىلگەن ءبىرىنشى بولىگىندە 44 نىسان بار بولسا, ەكىنشىسىندە - 173 اكتيۆ بار.
«ءبىرىنشى تىزىمدەگى 44 اكتيۆتەرگە توقتالاتىن بولساق, 11 اكتيۆ بويىنشا مەملەكەتتىك كوميسسيانىڭ شەشىمى شىعارىلدى», - دەدى ءو. شوكەەۆ. ولاردىڭ قاتارىندا قتج, قازمۇنايگاز, سامۇرىق-ەنەرگو كومپانيالارىنىڭ - «ترانستەلەكوم», «ەۋرازياەير», «ماڭعىستاۋ رەك», «شقو رەك», اقتوبە جەس, تەڭگىزمۇناي سىندى اكتيۆتەرى بار.
"بۇل نىساندار اشىق ساتىلىم ارقىلى ساۋداعا تۇسەدى. «ترانستەلەكوم», «ەۋرازياەير» بويىنشا جاقىن ارادا حابارلاندىرۋ بولادى. «قازاقستان تەمىرجولى» كومپانياسىنىڭ ءتورت اكتيۆى - «لوكوموتيۆ قۇراستىرۋ زاۋىتى» اق, «ەلەكتروۆوز قۇراستىرۋ زاۋىتى» اق, «تۇلپار-تالگو» اق, «KTZE - Khorgos Gateway» كومپانياسى تىكەلەي «General Electric», «الستوم», «تالگو», ليانيۋنگان پورتى سىندى كومپانيالارعا ساتىلادى. ەكى نىسان 2016 جىلدىڭ سوڭىندا, قالعان ەكەۋى 2017 جىلدىڭ ءبىرىنشى جارتىجىلدىعىندا ساتىلادى دەپ جوسپارلاپ وتىرمىز. ولاردىڭ ساتىلىمىنان تۇسەتىن جالپى سوما - شامامەن 400 ملرد. تەڭگە", - دەپ اتاپ ءوتتى قور باسشىسى.