جامبىل وبلىسىنىڭ «ارايسترويماركەت-2003» كومپانياسى كەڭەستىك كەزدە باستالعان كوپىر قۇرىلىسىن اياقتاۋعا بەل بۋىپ وتىر, دەپ حابارلايدى قازاقپارات.
قۇرىلىسى 1987 جىلى باستالعان نىساننىڭ جوبالىق قۇنى 1,8 ميلليارد تەڭگەنى قۇرايدى. 2016 جىلدىڭ اياعىندا قايتا جاندانعان قۇرىلىستى 2018 جىلدىڭ قىركۇيەك ايىندا اياقتاۋ جوسپارلانىپ وتىر. مەردىگەر كومپانيا «ارايسترويماركەت-2003» جشس وڭىردە الەۋمەتتىك نىسانداردى, عيماراتتاردى تۇرعىزاتىن, اۆتوكولىك جولدارىن سالاتىن, اسفالتبەتون شىعاراتىن كوپسالالى قۇرىلىس كومپانياسى رەتىندە تانىمال. ءدال وسى جامبىلدىق سەرىكتەستىك قازاقستاندا العاش رەت جوبالىق قۋاتى جىلىنا 250 مىڭ سەكتسيا بولاتىن الليۋميني جانە بيمەتالل رادياتورلارىن ءوندىرۋدى باستادى. ونىڭ قۇنى 1 ميلليون دوللاردان اساتىن. ودان بولەك, كومپانيا تارازدا جەكە ءبىلىم بەرۋ كەشەنىن اشتى - «ءىنجۋ-تاراز» بالاباقشا-مەكتەبىندە 600-دەن استام بالا وقىپ جاتىر. «ارايسترويماركەت-2003» جشس باسشىلىعىنىڭ حابارلاۋىنشا, «قۇمشاعىل» جانە «قيىر قاراسۋ» تۇرعىن ءۇي الاپتارىن جالعايتىن كوپىردىڭ ۇزىندىعى 315 مەتر جانە ەنى 28 مەتر بولماق. قۇرىلىس جۇمىستارىنا 30 ادام جانە 40 تەحنيكا جۇمىلدىرىلدى. كومپانيا ماقساتتى تۇردە تەك قانا وتاندىق ءوندىرىستىڭ ماتەريالدارىن پايدالانۋدا. تاراز اكىمدىگىنىڭ ايتۋىنشا, بولاشاقتا «قۇمشاعىل» جانە «قيىر قاراسۋ» تۇرعىن ءۇي الاپتارى اۋماعىندا بارلىق ينفراقۇرىلىمى بار جەكە ۇيلەر قۇرىلىسىنا 250 گەكتار جەر بولىنەدى. مۇندا 1 104 جەر ۋچاسكەسى بولادى, 2 گا اۋماقتا 280 ورىندىق بالاباقشا, 3,6 گا جەرگە 600 ورىندىق مەكتەپ, ەمحانا جانە وزگە دە الەۋمەتتىك, مادەني جانە مادەني تۇرمىستىق نىساندار تۇرعىزىلادى.