بۇگىن پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا قازاقستان رەسپۋبليكاسىنىڭ «2017-2019 جىلدارعا ارنالعان بيۋدجەت تۋرالى» زاڭىن جۇزەگە اسىرۋ تۋرالى» ۇكىمەت قاۋلىسى قابىلداندى.
قۇجاتتا 2017 جىلداعى رەسپۋبليكالىق بيۋدجەت كورسەتكىشتەرى, جۇمىسپەن قامتۋدىڭ جول كارتاسى 2020 باعدارلاماسىن ناتيجەلى جۇمىسپەن قامتۋ جانە جاپپاي كاسىپكەرلىك باعدارلاماسىنا ترانسفورماتسيالاۋ اياسىنداعى شارالاردىڭ جۇزەگە اسىرىلۋى كورىنىس تاپتى. ەرەكشە ماڭىزدى باعدارلامالاردى جۇزەگە اسىرۋعا باعىتتالعان باسىمدىققا يە رەسپۋبليكالىق بيۋدجەت ينۆەستيتسيالارىنىڭ ءتىزىمى بەكىتىلگەن, قازاقستان رەسپۋبليكاسى ۇكىمەتىنىڭ اعىمداعى ترانسفەرتتەرى مەن رەزەرۆتەرى رەتتەلگەن.
بيۋدجەت باعدارلامالارىنىڭ جەكەلەي اكىمشىلەرىنە ماقساتتى اعىمداعى ترانسفەرتتەردى پايدالانۋ جانە ونى رەتتەۋ ءتارتىبىن جاساۋ تۋرالى تاپسىرما بەرىلدى. قۇجاتتا كورسەتىلگەندەي, جوبالاردى جۇزەگە اسىرۋ قازاقستان رەسپۋبليكاسىنىڭ 2016 جىلعى 29 قاراشاداعى «2017-2019 جىلدارعا ارنالعان بيۋدجەت تۋرالى» زاڭىندا كورسەتىلگەن قارجىدان بولەك شىعىنداردى قاجەت ەتپەيدى.
ەسكە سالا كەتەيىك, وسىنىڭ الدىندا مەملەكەت باسشىسى «2017-2019 جىلدارعا ارنالعان بيۋدجەت تۋرالى» زاڭعا قول قويدى. بۇل زاڭ ەلىمىزدىڭ الەۋمەتتىك-ەكونوميكالىق دامۋىنىڭ ماكروەكونوميكالىق كورسەتكىشتەرىن ناقتىلاۋعا باعىتتالعان.
ارنۇر اسقار, "ەگەمەن قازاقستان".