رەجيسسەر, پروديۋسەر اقان ساتاەۆتىڭ ەسىمى وتاندىق ستۋديانىڭ «رەكەتير», «اعايىندى», «اداسقان», «جاۋجۇرەك مىڭ بالا» سەكىلدى فيلمدەرىنەن كوپكە تانىمال. ونەرلى جانداردىڭ وتباسىندا دۇنيەگە كەلگەن دارىندى بالا اكە-شەشەسىنىڭ تاعدىرى ەلەڭ ەتكىزەر ادامداردىڭ ءومىرى تۋرالى ءجيى ايتىپ وتىراتىن اڭگىمەلەرىن تىڭداپ وسەدى. بالالىق شاقتان ەستە قالعان بۇنداي اڭگىمەلەردىڭ كەيبىرى كەيىن ونىڭ ونەر جولىندا ونى كينو ەتىپ تۇسىرۋگە تۇرتكى دە بوپ جاتتى. ونىڭ ءبىرى بيىلعى جىلى ۇسىنىلعان رەجيسسەردىڭ جاڭا تۋىندىسى – «اناعا اپارار جول» ءفيلمى. بۇل فيلم از ۋاقىتتىڭ ىشىندە حالىقارالىق «ەۋرازيالىق كوپىر» كينوفەستيۆالىندە باس جۇلدەگە يە بولعانى ەسىمىزدە.
رەجيسسەر «استانا اقشامى» گازەتىنە بەرگەن سۇحباتىندا «مۇندا ەڭ باستىسى, ءىزگىلىك, پاتريوتتىق سەزىم, اناعا, ادامزاتقا, تۋعان وتانعا, وتانداستارعا دەگەن سۇيىسپەنشىلىك دارىپتەلگەن. كينو بۇگىنگى تاڭدا قوعامداعى ەڭ ۇلكەن تاربيە, يدەولوگيا قۇرالى ەكەنى راس بولسا, بۇل كارتينا تالاي جۇرەككە جىلۋ بەرەدى عوي دەپ ويلايمىن», دەدى. بۇل ءفيلمنىڭ شىنشىلدىعى كينوتەاترعا كورۋ ءۇشىن بارعان اعا بۋىن كورەرمەندەردىڭ قىزىعۋشىلىعىنان دا اڭعارىلدى. تالاي كورەرمەن كوزىنە جاس الدى...
اقان قارعامباي ۇلىنىڭ قاي كينوسى دا يدەياسى ىزگىلىكتى ناسيحاتتايدى. جالپى كوپكە ءمالىم دەرەكتىڭ ءبىرى, اقاننىڭ شىعارماشىلىعى ارقىلى ءوز جولىن كينو ونەرىندە تاۋىپ, ايقىنداپ جۇرگەن جاس اكتەرلەردىڭ (جۇلدىزداردىڭ) شىعۋى. ماسەلەن, رەجيسسەردىڭ ءوز سوزىمەن ايتقاندا «رايونى» فيلمىنەن 4-5 دارىندى بالالار شىقپاق. بۇل دا ونىڭ كاسىبيلىگىنىڭ ءبىر كورىنىسى بولسا كەرەك.
اقان قارعامباي ۇلى ءوز ەڭبەك جولىن ت.جۇرگەنوۆ اتىنداعى ونەر شاڭىراعىندا ءبىلىم العان توقسانىنشى جىلدارى «اللاجار» (1993) جانە «جاس اككوردەونشىنىڭ ءومىربايانى» (1999) فيلمدەرىنە تۇسۋدەن باستادى. ونەر جولىن اكتەرلىك ويىنداردان باستاعان رەجيسسەر تالابى ارقاشان دا وزگەشە جانە جوعارى بولماق. سوندىقتان بولار, اقاننىڭ كەيىپكەرلەرىنىڭ رولدەرى كورەرمەننىڭ كوڭىل تۇيتكىلىندەگى ويلارمەن استاسىپ, ادامنىڭ جان سارايىنداعى ايتىلا بەرمەيتىن سىرلاردى قوزعايدى. ونىڭ قاي ءفيلمى ۇسىنىلسا دا, كوپشىلىكتىڭ جىلى قابىلداۋىنا بولەنىپ وتىردى. ول قوعامداعى وزەكتى ماسەلەلەردى قوزعاۋمەن قاتار, شىعارماشىلىعىندا تاريحي, پاتريوتتىق تاقىرىپتارعا دا ورىن بەردى.
ءبىر قىزىعى, ونىڭ تۇسىرگەن تۋىندىلارى جاستى دا, كارىنى دە كينوتەاترعا شاقىرادى. جانە دە جاڭا ءتۇسىرىلىمدى تاماشالاپ قايتقان ادام وكىنبەي, رۋحاني ازىق الىپ قايتادى دەسەك, ارتىق ەمەس.
قازاقستاننىڭ ەڭبەك سىڭىرگەن قايراتكەرى, ىزدەنىمپاز رەجيسسەر اقان ساتاەۆتىڭ قازاق كينوسىنىڭ وركەندەۋىنە قوسارى ءالى الدا. ول الدا الاتىن بيىك اسۋلارى بار ناعىز شىعارماشىلىق ادامى.
باقىت جولدىبايقىزى