كەشە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وقۋدا ۇلگەرىمى جوعارى, عىلىمي-زەرتتەۋ جۇمىسىمەن بەلسەنە شۇعىلداناتىن جانە قوعامدىق شارالارعا بارىنشا اتسالىساتىن ماگيسترانتتارعا قازاقستان رەسپۋبليكاسى پرەزيدەنتى شاكىرتاقىسىنىڭ كۋالىكتەرى تاپسىرىلدى.
سالتاناتتى راسىمگە ءبىلىم جانە عىلىم ءمينيسترى ەرلان ساعاديەۆ قاتىسىپ, بولاشاعىنان ءۇمىت كۇتتىرەتىن جاس عالىمدارعا ىزگى تىلەگىن جەتكىزدى, سونداي-اق, قازىرگى تاڭدا جاستاردىڭ ءبىلىم الۋىنا, عىلىممەن اينالىسۋىنا مەملەكەت تاراپىنان جاسالىپ وتىرعان قامقورلىق تۇرعىسىندا اڭگىمەلەپ بەردى.
قۇرامىندا ءبىلىم جانە عىلىم مينيسترلىگىنىڭ, كاسىپتىك ءبىلىم جانە عىلىم قىزمەتكەرلەرى كاسىپوداعىنىڭ وكىلدەرى, جوعارى وقۋ ورىندارىنىڭ رەكتورلارى مەن پروفەسسورلارى, مادەنيەت قايراتكەرلەرى, «نۇر وتان» پارتياسى «جاس وتان» جاستار قاناتىنىڭ جانە قازاقستان جاستار كونگرەسىنىڭ اتقارۋشى حاتشىلارى كىرەتىن كونكۋرستىق كوميسسياعا بيىل 43 ماگيسترانتتىڭ قۇجاتتارى ۇسىنىلىپتى. اتالعان كوميسسيانىڭ شەشىمىمەن بۇلاردىڭ اراسىنان 10 ۇمىتكەر ىرىكتەلىپ, قازاقستان رەسپۋبليكاسى پرەزيدەنتى شاكىرتاقىسىن الۋعا لايىقتى دەپ تانىلدى. ولار: ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ماگيسترى ماريا اباديەۆا, ءال-فارابي اتىنداعى قازاق ۇلتتىق ۋنيۆەرسيتەتىنىڭ ماگيسترى گاۋھار اسقاروۆا, قۇرمانعازى اتىنداعى قازاق ۇلتتىق كونسەرۆاتورياسىنىڭ ماگيسترى يرينا گاۆريلەنكو, قازاق ۇلتتىق ونەر ۋنيۆەرسيتەتىنىڭ ماگيسترى ايگەرىم داۋىتباەۆا, ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ ماگيسترى ناۋرىزحان دىلدابەكوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ماگيسترلەرى رايحان جانبولاتوۆا مەن ليا وماروۆا, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ماگيسترى مايرا نۇركە, قازاق ۇلتتىق اگرارلىق ۋنيۆەرسيتەتىنىڭ ماگيسترى اياۋلىم نۇرىمباي, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ ماگيسترى ەميل راحيمباەۆ.
شارا بارىسىندا اتالعان شاكىرتاقى يەلەرى وزدەرىنىڭ ەڭبەكتەرى ەسكەرىلىپ, ەرەكشە كوڭىل بولىنگەنىنە رازى ەكەندەرىن جەتكىزدى. سونداي-اق, ولار ەلباسى نۇرسۇلتان نازارباەۆتىڭ جۇرگىزىپ وتىرعان ساياساتىنىڭ ارقاسىندا جاستارعا بارلىق جاعداي جاسالىنىپ جاتقانىن ءسوز ەتتى.
جولدىباي بازار,
«ەگەمەن قازاقستان»