مەملەكەت باسشىسى امەريكا قۇراما شتاتتارىنىڭ سايلانعان پرەزيدەنتى دونالد ترامپپەن تەلەفون ارقىلى سويلەستى دەپ حابارلايدى akorda.kz.
نۇرسۇلتان نازارباەۆ د.ترامپتى پرەزيدەنت سايلاۋىنداعى جەڭىسىمەن قۇتتىقتاپ, وعان سايلاۋالدى باعدارلاماسىن ىسكە اسىرۋ بارىسىندا تابىس تىلەدى.
اقش-تىڭ سايلانعان پرەزيدەنتى مەملەكەت باسشىسىن قازاقستان تاۋەلسىزدىگىنىڭ 25 جىلدىعىمەن قۇتتىقتادى. د.ترامپ تاۋەلسىزدىك جىلدارىندا رەسپۋبليكامىز نۇرسۇلتان نازارباەۆتىڭ باسشىلىعىمەن عاجاپ جەتىستىكتەرگە قول جەتكىزگەنىن اتاپ ءوتتى.
اڭگىمە بارىسىندا الەمدەگى جانە ورتالىق ازيا وڭىرىندەگى قاۋىپسىزدىك پەن تۇراقتىلىقتى نىعايتۋ ماسەلەلەرى جونىندە پىكىر الماسىلدى.
قازاقستان پرەزيدەنتى ەلىمىزدىڭ يادرولىق قارۋ-جاراقتان ءوز ەركىمەن باس تارتىپ, يادرولىق قارۋسىز الەم جولىنداعى كۇرەستى حالىقارالىق قوعامداستىقپەن بىرلەسە جالعاستىراتىنىن ايتتى.
د.ترامپ بۇل ۇستانىممەن تولىقتاي كەلىسەتىنىن جەتكىزدى.
– جاھاندىق دەڭگەيدە شەشىلۋگە ءتيىس يادرولىق قارۋسىزدانۋ مەن ونى تاراتپاۋدان اسقان ماڭىزدى ماسەلە جوق, – دەدى اقش-تىڭ سايلانعان پرەزيدەنتى.
بۇدان بولەك, نۇرسۇلتان نازارباەۆ د.ترامپتىڭ نازارىن رەسەي مەن امەريكا ىنتىماقتاستىعىن نىعايتۋعا مۇمكىندىك بەرەتىن باستى ءۇش سالاعا اۋداردى. ولار: تەرروريزممەن كۇرەس, ۋكرايناداعى داعدارىستى رەتتەۋ جانە جاھاندىق يادرولىق قاۋىپسىزدىكتى نىعايتۋ.
رەسەي پرەزيدەنتى ۆ.پۋتينمەن بولعان تەلەفون ارقىلى سويلەسۋ قورىتىندىسىن ەسكەرىپ, اقش-تىڭ سايلانعان پرەزيدەنتى ۆاشينگتون مەن ماسكەۋ ىنتىماقتاستىعىن دامىتۋدىڭ پەرسپەكتيۆاسىنا ءوزىنىڭ زور وپتيميزممەن قارايتىنىن اتاپ ءوتتى.
تاراپتار قازاقستان مەن امەريكانىڭ دوستىق قارىم-قاتىناسىن, سونىڭ ىشىندە ساۋدا-ەكونوميكالىق سەرىكتەستىكتى جاڭا دەڭگەيگە كوتەرۋگە ءازىر ەكەنىن مالىمدەدى. د.ترامپ جاقىن ارادا ەكى كوشباسشىنىڭ كەزدەسۋىن وتكىزۋگە مۇددەلىلىك ءبىلدىردى.
اڭگىمەلەسۋ سوڭىندا اقش-تىڭ سايلانعان پرەزيدەنتى بارشا قازاقستان حالقىنا رەسپۋبليكا تاۋەلسىزدىگىنىڭ 25 جىلدىعى قارساڭىندا يگى تىلەگىن جولدادى.