قىتاي سوتى شىڭجاڭ-ۇيعىر اۆتونوميالىق اۋدانىنىڭ ءتورت تۇرعىنىن جاپپاي بەرەكەسىزدىك ۇيىمداستىرعاندارى ءۇشىن ءولىم جازاسىنا كەستى. سونداي-اق تاعى ەكى ادامدى 19 جىلعا سوتتادى.
«نيۋ-يورك تايمس» باسىلىمىنىڭ جازۋىنشا, ءولىم جازاسىنا كەسىلگەندەر مەن ۇزاق مەرزىمگە سوتتالعان ازاماتتار – وسى ەلدەگى ۇيعىر ەتنوسىنىڭ وكىلدەرى. ولار تەررورلىق توپتارعا جەتەكشىلىك ەتتى, ادام ءولتىردى, زاڭسىز جارىلعىش زاتتار جاسادى دەگەن باپتار بويىنشا ءىستى بولعان كورىنەدى. بۇكىلالەمدىك ۇيعىر كونگرەسىنىڭ باس حاتشىسى دولكۋن يسا قىتاي سوتىنىڭ ۇكىمىن «بۇل قىلمىستىق جازا ەمەس, ساياسي جازا» دەپ مالىمدەگەن.
ەل تاريحىندا تۇڭعىش رەت...
دانيادا 15 قىركۇيەكتە وتكەن پارلامەنتتىك سايلاۋدا سولشىل «قىزىلدار بلوگى» مەن سولشىل كۇشتەر جەڭىسكە جەتتى. DR تەلەراديو كومپانياسىنىڭ حابارلاۋىنشا, سولشىلدار سايلاۋشىلاردىڭ 50,2 پايىز داۋىسىنا يە بولىپ, ەل پارلامەنتىنەن 89 ورىن العان.
ەلدەگى اسا ءىرى پارتيالاردىڭ ءبىرى – «قىزىلدار بلوگىن» سوتسيال-دەموكراتتاردىڭ جەتەكشىسى حەللە تورنينگ-شميدت حانىم باسقارادى. ح.ت.شميدت دانيا تاريحىندا ۇكىمەت باسقاراتىن تۇڭعىش ايەل بولماق. ال سوڭعى ون جىل بويى بيلىك باسىندا بولعان ليبەرال-كونسەرۆاتورلار سايلاۋدا 49,7 پايىز داۋىس العان.
ارداگەرگە 15 ميلليون دوللار سىياقى
ۆەتنام سوعىسىنىڭ ارداگەرى, 63 جاستاعى ريچارد ۋەست ءىرى مەديتسينالىق كومپانياداعى الاياقتىقتى اشقانى ءۇشىن 15 ميلليون دوللار الدى. «نيۋ-يورك پوست» گازەتىنىڭ اقپاراتىنا قاراعاندا, ءدارى-دارمەكتى ءجيى پايدالاناتىن ول مەديتسينا قىزمەتكەرلەرىنىڭ قىلمىسىن بىرنەشە جىل تەكسەرگەن.
تەكسەرۋ بارىسىندا مۇگەدەكتەر مەن ماتەريالدىق جاعىنان از قامتىلعان وتباسىلار ءۇشىن ءدارى-دارمەك ساتىپ الۋعا بولىنگەن قارجىعا ءدارى-دارمەك الىنبايتىنىن انىقتاعان. ادۆوكات جالداي وتىرىپ, كومپانيانى سوتقا بەرىپ, اقش بيلىگىنىڭ نازارىن اۋدارتىپتى. ناتيجەسىندە ەلدىڭ 40 شتاتىندا 300 ءوفيسى بار ماxim مەديتسينالىق كومپانياسى زاڭسىز جولمەن 61 ميلليون دوللار تاپقانىن مويىنداعان. وسى الاياقتىق ارەكەتتەردى اشقانى ءۇشىن سوعىس ارداگەرىنە 15 ميلليون دوللار سىياقى بەرىلىپتى.
ۇيىمداعى وكىلەتتىگىن كەڭەيتۋدى ۇسىنادى
«رەيتەر» اقپارات اگەنتتىگىنىڭ حابارلاۋىنشا, ەۋروپا وداعى پالەستينا ۇلتتىق اكىمشىلىگىنىڭ باسشىلارىن ءوز تاۋەلسىزدىگىن جاريالاۋدان باس تارتۋعا كوندىرگىسى كەلەدى. وعان بالاما رەتىندە ەۋروپا وداعى پالەستينا اكىمشىلىگىنە بۇۇ-داعى وكىلەتتىگىن كەڭەيتۋدى ۇسىنادى.
ازىرلەنگەن بۇل ۇسىنىسپەن ەۋروپا وداعىنىڭ شەت ەل ىستەرى جونىندەگى جوعارعى وكىلى كەترين ەشتون اينالىسىپ جاتقان كورىنەدى. كەيبىر مالىمەتتەرگە قاراعاندا, پالەستينا اۆتونومياسىنىڭ بۇۇ-عا تولىققاندى مۇشە بولۋى جايىندا ءسوز بولىپ جاتقان جوق. قازىرگى اڭگىمە تەك پالەستينانىڭ بۇۇ-داعى مارتەبەسىن كوتەرۋ تۋرالى عانا سىڭايلى.
ءۇش قىرعىزستاندىق دۋشانبەدە ۇستالدى
دۋشانبەدە قىرعىزستان پرەزيدەنتى اكىمشىلىگىنىڭ بۇرىنعى باسشىسى مەدەت سادىرقۇلوۆتىڭ ولىمىنە قاتىسى بار دەگەن كۇدىكپەن قىرعىزستاننىڭ بىرنەشە ازاماتى ۇستالدى. بۇل تۋرالى «ازيا-پليۋس» اقپارات اگەنتتىگى حابارلادى.
اگەنتتىكتىڭ تاراتقان اقپاراتتارىنا قاراعاندا, ءۇش ادام – كوديربەك دوسونوۆ, شىڭعىس جۇماعۇلوۆ جانە مارلان شاكۋليەۆ ۇستالعان. قىرعىزستان ىشكى ىستەر ءمينيسترىنىڭ ورىنباسارى م.تۇرعانباەۆتىڭ مالىمدەۋىنشە, جوعارىدا اتالعانداردىڭ ءبىرى – ك.دوسونوۆ وش وبلىسىنداعى ىقپالدى قىلمىستىق توپتىڭ باسشىسى بولعان كورىنەدى. قىرعىزستان تارابى تاجىكستان ىشكى ىستەر مينيسترلىگىنە ۇستالعان ازاماتتاردى قىرعىزستانعا ەكستراديتسيالاۋ جونىندە ءوتىنىش جاسادى.
مەشىتتىڭ يمامىن اتىپ كەتتى
داعىستاننىڭ بۋيناك اۋدانى چانكۋربە سەلوسىنداعى مەشىتتىڭ يمامى ءوز ۇيىندە اتىپ ءولتىرىلىپتى. «نوۆوستي» اقپارات اگەنتتىگىنىڭ حابارلاۋىنشا, قىلمىس 15 قىركۇيەك كۇنى تۇندە جاسالعان.
اۆتونوميا قۇقىق قورعاۋ ورگاندارىنىڭ مالىمەتتەرى بويىنشا, يمامعا اۆتوماتتان وق اتىلعان. يمامنىڭ اتى-ءجونى زاينۋدين دايزيەۆ, 1984 جىلى تۋعان. يمام ءولىمىنىڭ استارىندا ءدىني قىزمەت جاتقان سەكىلدى. جەرگىلىكتى اقپارات كوزدەرىنىڭ تاراتقان دەرەكتەرىنە قاراعاندا, ز.دايزيەۆ ءبىراز جىلدان بەرى كارماحي جانە چابانماحي سەلولارىنداعى ۆاحابشىل قاۋىمنىڭ ءدىني ارەكەتتەرىنە قارسى بەلسەندى قيمىل تانىتىپ كەلە جاتقان كورىنەدى.
قىسقا قايىرىپ ايتقاندا:
«ەۆروسەتتىڭ» بۇرىنعى ۆيتسە-پرەزيدەنتى بوريس لەۆين ءوزىن نەگىزسىز قىلمىستىق قۋدالاعانى ءۇشىن مەملەكەتتەن 20 ميلليون رۋبل الاتىن بولدى. مۇنداي شەشىمدى ماسكەۋ قالالىق سوتى شىعاردى.
تۇركيا پرەزيدەنتى ابدۋللا گۇل گەرمانيانىڭ ۆيزا ساياساتىنا بايلانىستى سىن ايتتى. مۇنىڭ ەكى ەل اراسىنداعى تىعىز قاتىناسقا سالقىنىن تيگىزۋى ىقتيمال.
كەمەروۆ وبلىسىنىڭ گۋبەرناتورى امان تولەەۆ كوممۋنيستەردىڭ پارتيالىق سايتىندا جاريالانعان ەكى جاريالانىمداعى اقپاراتتاردى سوتقا بەرىپ, مورالدىق شىعىن ءۇشىن 720 مىڭ رۋبل الاتىن بولدى.
اقش-تىڭ مەملەكەتتىك دەپارتامەنتى سيرياداعى ءوز ازاماتتارىن شۇعىل تۇردە ەلدەن كەتۋگە شاقىردى. وعان سيرياداعى تۇراقسىزدىق سەبەپ بولىپ وتىر.
ينتەرنەت ماتەريالدارى نەگىزىندە ازىرلەندى.