ەلىمىزدىڭ 100-دەن استام ستارتاپشىسى Seedstars World بايقاۋىنا قاتىسۋعا نيەت ءبىلدىردى. بۇل تۋرالى ورتالىق كوممۋنيكاتسيالار قىزمەتىندە «تەحنولوگيالىق ستارتاپتى دامىتۋ جانە كاسىپكەرلىكتى قولداۋ» تاقىرىبىندا وتكەن بريفينگ بارىسىندا MOST بيزنەس-ينكۋباتورىنىڭ نەگىزىن قالاۋشى پاۆەل كوكتىشەۆ ءمالىم ەتتى.
«ءبىر اي ىشىندە قازاقستاندىق جوبالار اراسىندا ىرىكتەۋ جۇرگىزىلدى. ەلىمىزدىڭ بارلىق وڭىرىنەن بارلىعى 100-دەن استام ءوتىنىم ءتۇستى, ونىڭ ىشىنەن ىرىكتەلگەن 10 ستارتاپ كونفەرەنتسيا بارىسىندا تانىستىرىلادى. ناتيجەسىندە ساراپشىلار ءبىر قازاقستاندىق جوبانى تاڭداپ, ول وزگە دە الىمدىك ستارتاپتارمەن باس جۇلدەگە تالاساتىن بولادى. اقتىق سايىس 2017 جىلعى 6 ساۋىردە شۆەيتساريانىڭ لوزاننا قالاسىندا وتەدى. ستارتاپ بايقاۋىنىڭ سىيلىق قورى 1 ملن دوللاردى قۇرايى», – دەدى پ.كوكتىشەۆ.
ايتا كەتەيىك, وڭىردەگى ستارتاپ-ەكوجۇيەنى دامىتۋ ماقساتىنداعى Seedstars World بايقاۋ-كونفەرەنتسياسى 3 جەلتوقسان كۇنى استانا قالاسىندا وتەدى.
جوبانىڭ ماقساتى - دامۋشى ەلدەردە جۇمىسسىزدىق دەڭگەيىن تومەندەتۋ ارقىلى تەحنولوگيالىق جانە يننوۆاتسيالىق كومپانيالارمەن جۇمىس ورىندارىن قۇرۋ جانە كاسىپكەرلىكتى دامىتۋ.
ايدار ورىسباەۆ,
"ەگەمەن قازاقستان".